អីយ៉ាស់! Real Madrid គ្រោងនឹងយកខ្សែការពារម្នាក់នេះមកជំនួសបងធំ Ramos តែ Man UTD ក៏ចង់បានគេដែរ

អេស្ប៉ាញ៖ មួយរយៈចុងក្រោយមកនេះមានក្លិបជាច្រើនដែលកំពុងមានបញ្ហានៅតំបន់ការពារនិងកំពុងខ្វះខ្សែការពារមកបំពេញតួនាទីនេះដូចជាក្លិបបិសាចក្រហម Manchester United និង អធិរាជស Real Madrid ជាដើម។

ក្នុងនោះដែរ យោងតាមប្រភពមួយបានបង្ហើបថាខ្សែការពារឆ្នើមនិងជាប្រធានក្រុម Real Madrid កីឡាករ Sergio Ramos មិនបន្តកុងត្រាថ្មីជាមួយក្លិបឡើយនិងអាចចាកចេញពីទឹកដី Santiago Bernabeu ពេលចប់រដូវកាលទើបក្លិប Real Madrid កំពុងស្វែងរកខ្សែការពារដែលមានសមត្ថភាពអាចជំនួស Ramos បណ្ដើរៗហើយ។

ឥលូវនេះ ទាំង Real Madrid និង Man UTD កំពុងសម្លឹងចង់បានខ្សែការពារ David Carmo ដែលបច្ចុប្បន្នកំពុងលេងឲ្យក្លិប Braga ដោយអាចនឹងប្រជែងគ្នាដើម្បីដាក់សំណើជូនដល់កីឡាករសញ្ជាតិព័រទុយកាល់រូបនេះ។

តម្លៃផ្ដាច់កុងត្រារបស់គេគឺមានរហូតដល់ទៅ ៣៥លានផោន(ស្មើនឹងប្រមាណ៤៨.៥លានដុល្លារអាមេរិក) ឯណោះខណៈដែល Carmo ទើបតែចូលលេងឲ្យក្រុមឈុតធំ Braga បានជាប់លាប់ក្នុងរដូវកាលនេះប៉ុណ្ណោះ។

កីឡាករវ័យ២១ឆ្នាំរូបនេះមានកំពស់ដល់ទៅ ១ម៉ែត្រ៩៦សង់ទីម៉ែត្រ និងពូកែខាងប្រើជើងឆ្វេងគ្រាន់បើដែលចំណុចពិសេសអស់ទាំងនេះហើយធ្វើឲ្យក្លិប Real Madrid និង Man UTD ទាក់ភ្នែកនឹងរូបគេ។

យោងតាមសារព័ត៌មាន AS គឺ Real Madrid អាចមានប្រៀបជាង Man UTD ក្នុងការទិញយក David Carmo ព្រោះក្លិប Braga មានសម្ពន្ធភាពល្អជាមួយក្លិប Real Madrid ដូច្នេះបើចង់បានខ្សែការពាររូបនេះមែន បិសាចក្រហមត្រូវជះលុយក្នុងចំនួនច្រើនជាងការស្នើរបស់ Real Madrid ដើម្បីទាក់ចិត្ត Braga ។

គួរបញ្ជាក់ផងដែរថា David Carmo ចូលលេងឲ្យក្រុមឈុត B របស់ Braga នៅឆ្នាំ២០១៨ មុននឹងបានឡើងមកលេងឈុតធំនៅឆ្នាំ២០២០ នៅ Braga តែម្ដង ដោយគេបង្ហាញខ្លួនបាន៣០ប្រកួតដោយមិនទាន់រកគ្រាប់បាល់បាននៅឡើយទេ៕

ប្រភព៖ caughtoffside