អង់គ្លេស៖ តាំងពីត្រូវក្លិបតោខៀវ Chelsea តែងតាំងកាលពីខែមុនមក លោកគ្រូបង្វឹក Thomas Tuchel បានដឹកនាំក្រុមនេះយ៉ាងរលូនដោយបន្តភាពមិនដែលចាញ់ ហើយក្នុងនោះដែរ គេសង្កេតឃើញថាលោកគ្រូក៏មិនមានបញ្ហាជាមួយកីឡាករណាមួយដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ប៉ុន្តែឥលូវនេះ លោកគ្រូបង្វឹកសញ្ជាតិអាល្លឺម៉ង់រូបនេះបានបង្ហើបហើយថាលោកគ្រូពិតជាស្រឡាញ់ចូលចិត្តខ្សែបម្រើ Mateo Kovacic ណាស់ បន្ទាប់ពីឃើញថារូបគេបានបង្ហាញទម្រង់លេងល្អគួរឲ្យកត់សម្គាល់ក្នុងការប្រកួតទល់នឹង Newcastle ដែល Chelsea យកឈ្នះក្នុងលទ្ធផល ២ ទល់នឹង ០។
កីឡាករសញ្ជាតិក្រូអាតរូបនេះបានជាប់ជម្រើស១១នាក់ដំបូងបាន៥ប្រកួត តាំងពីលោកគ្រូ Tuchel មកដឹកនាំនៅ Stamford Bridge និងមានស្ថិតិប៉ះនិងបញ្ជូនបាល់ចំគោលដៅខ្ពស់ជាងគេបំផុតក្នុងចំណោមមិត្តរួមក្រុម។
លោកគ្រូបានបង្ហាញចំណាប់អារម្មណ៍ចំពោះ Kovacic ថា៖
ខ្ញុំស្រឡាញ់ចូលចិត្តគេណាស់ គេជាប្រភេទមនុស្សរហ័សរហួន ឧទាហរណ៍បើខ្ញុំដាស់គេនៅម៉ោង៣ទាបភ្លឺ គេនឹងមកហ្វឹកហាត់នៅទីលាន Cobham នៅម៉ោង ៣:១៥នាទី និងអាចលេងបានយ៉ាងស្វាហាប់ទៀតផង។ ពេលខ្លះខ្ញុំត្រូវប្រាប់គេកុំឲ្យហ្វឹកហាត់សកម្មខ្លាំងពេកទៀតផង វាពិតជាល្អណាស់ដែលក្នុងក្រុមមានកីឡាករដូចគេ។
ដោយឡែក កាលលោកគ្រូ Frank Lampard នៅដឹកនាំគឺ Mateo Kovacic ជាប់ជម្រើស១១នាក់ដំបូងបានតែ៤ដងគត់ នៅរដូវកាលនេះប៉ុន្តែក្រោយពេកបានចូលលេងញឹកញាប់ក្រោមការដឹកនាំរបស់គ្រូបង្វឹកថ្មី Kovacic បានចាប់ដៃគូលេងយ៉ាងស៊ីសង្វាក់គ្នាជាមួយ Jorginho ។
គួរបញ្ជាក់ផងដែរថា Mateo Kovacic អាចនឹងត្រឡប់មកចូលលេងវិញក្នុងការប្រកួតវគ្គ១៦ក្រុមពានធំ Champions League ដែល Chelsea ត្រូវជួបជាមួយ Atletico Madrid នៅថ្ងៃព្រហ្បតិ៍ម៉ោង៣ទាបភ្លឺនេះហើយ៕
ប្រភព៖ dailymail
Bong I.T