ចិន៖ យើងធ្លាប់តែបានឃើញការប្រកួតដ៏ស្វិតស្វាញរវាងកីឡាករនៅលើសមរភូមិវាលស្មៅបៃតង តែចំពោះការប្រកួតរវាងក្រុមត្រីកន្ទុយបីទាំងនេះវិញគឺមិនងាយបានជួបនោះទេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបុរសម្នាក់មកពីខេត្តក្វាងទុងប្រទេសចិនបានប្រែក្លាយអាងចិញ្ចឹមត្រីរបស់គាត់ ទៅជាកីឡដ្ឋានប្រកួតបាល់ទាត់ដ៏អស្ចារ្យ។ លោក Yang Tianxin បានឲ្យត្រីកន្ទុយបី Ranchu របស់គាត់ហ្វឹកហាត់យូរមកហើយ។ លោក Yang ស្រលាញ់កីឡាបាល់ទាត់ខ្លាំងណាស់ ទើបធ្វើឲ្យរូបគាត់នឹកឃើញគំនិតមួយនេះឡើង ដើម្បីបង្វឹកត្រីរបស់គាត់ឲ្យចេះលេងបាល់។
លោកចាប់ផ្ដើមបង្រៀនត្រីទាំងនេះបន្តិចម្ដងៗ និងឲ្យចំណីទៅកាន់ពួកវាជាការលើកទឹកចិត្ត នៅពេលស៊ុតបញ្ចូលទី។ យូរៗទៅ ពួកត្រីទាំងនេះយល់ពីអ្វីដែលលោក Yang ចង់បាន ហើយនោះគឺជាការហ្វឹកហាត់។ លោកក៏បានចិញ្ចឹមទុកត្រីកន្ទុយបី Ranchu រាប់រយក្បាលផងដែរ។
វាគឺជារឿងមួយដ៏ពិបាកបំផុតក្នុងការឲ្យត្រីទាំងនេះផ្ចង់អារម្មណ៍ ហើយនៅពេលហ្វឹកហាត់ដំបូង ត្រីទាំងនេះមិនអាចស៊ុតបញ្ចូលទីបានឡើយ ដោយសារតែត្រីបង្កាត់ពូជនេះមិនសូវមានភាពវៃឆ្លាត។ ដូច្នេះ វាត្រូវការពេលវេលាយូរក្នុងការបង្ហាត់បង្រៀនពួកវា។ ពួកត្រីទាំងនេះនឹងលែងមានអារម្មណ៍ប្រកួត ប្រសិនបើពួកវាមិនទទួលបានចំណី។ ត្រីចំនួន៥ក្បាលអាចស៊ុតបញ្ចូលទីបាន បន្ទាប់ពីការហ្វឹកហ្វឺនអស់រយៈពេល៣ខែ។
ទោះជាយ៉ាងណាក៏ដោយ ក៏មានអ្នកខ្លះបានជឿថា បាល់នេះបញ្ជាដោយដែកឆក់ដាក់នៅពីខាងក្រោមអាង។ នៅថ្ងៃខាងមុខ លោក Yang គ្រោងនឹងបង្កើតក្រុមបាល់ទាត់ចំនួនពីរ ដើម្បីឲ្យក្រុមត្រីកន្ទុយបីទាំងនេះធ្វើការប្រកួតគ្នា៕