អាមេរិក៖ បងប្អូនប្រុសមានឈ្មោះថា Kaleb និង Aaron មានអាយុ១១ឆ្នាំ និង៩ឆ្នាំ បាននាំគ្នាទុកសក់យ៉ាងវែងអន្លាយមិនព្រមកាត់អស់រយៈពេលជាង៥ឆ្នាំ ចាប់តាំងពីខែមេសា ឆ្នាំ២០១៦មកម៉្លេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបងប្អូនប្រុសមួយគូខាងលើនេះ មកពីរដ្ឋ Pennsylvania នៃសហរដ្ឋអាមេរិក បានសម្រេចចិត្តឈប់កាត់សក់របស់ខ្លួន បន្ទាប់ពីបានទស្សនាវីដេអូឯកសារមួយ ដែលបង្ហាញឲ្យឃើញពីក្មេងម្នាក់កើតជំងឺមហារីកដោយកោរសក់ចោល ហើយទទួលបានសក់ពាក់ពីក្មេងស្រីដទៃ។
យោងតាមសម្ដីរបស់ស្ត្រីជាម្ដាយបានឲ្យដឹងថា កូនៗរបស់គាត់ បានសុំការអនុញ្ញាតពីគាត់ក្នុងការទុកសក់វែង ហើយគាត់ក៏បានយល់ព្រម។ ចាប់តាំងពីពេលនោះមក កូនៗមិនដែលកាត់សក់ម្ដងឡើយ និងថែរក្សាយ៉ាងល្អជារៀងរាល់ថ្ងៃ។
ទន្ទឹមនឹងការទុកសក់វែង ក្មេងប្រុសទាំងពីរក៏បានជួបប្រទះនឹងបញ្ហាមួយផងដែរ ដោយពេលទៅសាលារៀនម្ដងៗ ពួកគេទាំងពីរត្រូវបានក្រុមក្មេងៗសើចចំអក តែពួកគេមិនខ្វល់ខ្វាយឡើយ ដោយព្យាយាមប្រាប់ខ្លួនឯងពីមូលហេតុ និងគោលដៅនៃការទុកសក់វែង។
យ៉ាងណាមិញ សក់របស់បងប្អូនប្រុសមួយគូនេះ ត្រូវបានកាត់ចោលរួចរាល់ហើយ កាលពីដើមខែកុម្ភៈ ឆ្នាំ២០២១នេះ ដោយមានប្រវែងប្រមាណ៤៨សង់ទីម៉ែត្រ ហើយក៏យកទៅបរិច្ចាគរួចរាល់ដែរ។ មិនតែប៉ុណ្ណោះ ពួកគេទាំងពីរថែមទាំងរៃអង្គាសប្រាក់បានចំនួន៣,៤១៥ដុល្លារអាមេរិក យកទៅបរិច្ចាគជូនមហាវិទ្យាល័យវិទ្យាសាស្ត្រសុខាភិបាល Addis Abba ផងដែរ៕
សូមទស្សនារូបភាពខាងក្រោម៖