អង់គ្លេស៖ ខ្សែបម្រើ Hakim Ziyech បានចេញមុខសារភាពត្រង់ៗតែម្ដងថាអ្នកគាំទ្ររបស់ក្លិបតោខៀវ Chelsea ពិតជាមិនទាន់បានឃើញគេបង្ហាញទម្រង់លេងល្អដូចកាលមុននៅក្លិប Ajax នៅឡើយទេនិងបានបង្ហើបទៀតថាកត្តាពីរយ៉ាងដែលធ្វើឲ្យគេលេងមិនសូវបានល្អគឺមកពី បញ្ហារបួស និងជំងឺនឹកផ្ទះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កាលពីមួយឆ្នាំមុន Chelsea បានចុះកិច្ចសន្យាទិញយក Ziyech ពីក្លិប Ajax ប៉ុន្តែកីឡាករសញ្ជាតិម៉ារ៉ុករូបនេះទើបតែធ្វើដំណើរមកលេងនៅទឹកដីកីឡដ្ឋាន Stamford Bridge នៅរដូវក្ដៅមុននេះឯង ដោយរកបានតែ២គ្រាប់គត់ក្នុងការបង្ហាញខ្លួនសរុប១៨ដងនៅរដូវកាលនេះដែលកាលណោះលោកគ្រូបង្វឹក Frank Lampard នៅដឹកនាំនៅឡើយ។
ថ្មីៗនេះ Ziyech បានបង្ហើបក្ដីសង្ឃឹមមួយថាគេនឹងអាចលេងល្អជាងមុនក្រោមការដឹកនាំរបស់លោកគ្រូបង្វឹកថ្មី Thomas Tuchel និងបាននិយាយថាឥលូវនេះគេកំពុងសម្របខ្លួនក្នុងការរស់នៅក្នុងមជ្ឈដ្ឋានថ្មីបានល្អជាងមុន។
Ziyech បានថ្លែងប្រាប់គេហទំព័រ់ផ្លូវការរបស់ Chelsea ថា៖
ឥលូវនេះខ្ញុំផ្ទេរមក Chelsea ប្រមាណ៦ទៅ៧ខែហើយ អ៊ីចឹងហើយខ្ញុំចាប់់ផ្ដើមសម្របខ្លួនបានច្រើនជាងមុន។កាលពីដំបូងៗគ្រប់យ៉ាងមើលទៅថ្មីសម្រាប់ខ្ញុំ តែវាល្អដែលបានស្នាក់នៅទីក្រុងនេះ គ្រាន់តែថាពេលខ្លះខ្ញុំចង់នៅជិតគ្រួសារខ្ញុំ ម្ដាយខ្ញុំ បងប្រុសខ្ញុំ និងមិត្តភក្តិខ្ញុំ ប៉ុន្តែពេលនេះគ្រប់យ៉ាងមិនអីទេ។អ៊ីចឹងហើយទើបកាលណោះខ្ញុំពិបាកក្នុងការស្នាក់នៅទីនេះ ប៉ុន្តែខ្ញុំព្យាយាមបន្សុាំខ្លួនជារឿយៗ។ខ្ញុំមិនទាន់បានជួបជាមួយអ្នកគាំទ្រជាផ្លូវការនោះទេ ក្នុងការប្រកួតទល់នឹងក្លិប Leeds គឺមានអ្នកគាំទ្រចូលទស្សនាដែរប៉ុន្តែលេងបានតែ២៥នាទី ខ្ញុំបែរជារងរបួស ដូច្នេះខ្ញុំសង្ឃឹមថានៅពេលខាងមុខ អ្នកគាំទ្រនឹងបានចូលទស្សនានៅកីឡដ្ឋាន។
ខ្សែបម្រើវ័យ២៧ឆ្នាំរូបនេះបានបន្តទៀតថា៖
ពិតណាស់ថាពេលវេលា៦ខែដែលខ្ញុំចំណាយជាមួយ Chelsea វាមិនទាន់គ្រប់គ្រាន់សម្រាប់ខ្ញុំទេព្រោះខ្ញុំចង់លេងឲ្យល្អជាងនេះហើយខ្ញុំនឹងខិតខំប្រឹងប្រែងបន្តទៀត។ខ្ញុំស៊យណាស់ដែលបានរងរបួសនៅពេលខ្ញុំទើបតែផ្ទេរមក ប៉ុន្តែនៅសល់ពេលច្រើនទៀត។ខ្ញុំដឹងថាខ្ញុំត្រូវតែជឿជាក់លើខ្លួនឯង ហើយខ្ញុំនឹងអាចត្រឡប់ទៅលេងល្អដូចកាលនៅ Ajax ។
គួរបញ្ជាក់ផងដែរថាកាលស្នាក់នៅជាមួយ Ajax គឺ Hakim Ziyech បានជួយក្រុមឲ្យឡើងមកដល់វគ្គពាក់កណ្ដាលផ្ដាច់ព្រ័ត្រពានធំ Champions League ក្នុងឆ្នាំ២០១៩ ហើយគេសង្ឃឹមថាគេនឹងអាចជួយ Chelsea បែបនេះដែរ៕
ប្រភព៖ metro
Bong I.T