អេស្ប៉ាញ៖ កាលពីយប់ថ្ងៃពុធឈានចូលថ្ងៃព្រហស្បតិ៍កន្លងទៅនេះ ក្លិបអ្នកមានបុណ្យ Barcelona បានធ្វើដំណើរទៅទឹកដីទីក្រុងម៉ាឌ្រីដដើម្បីប្រកួតជាមួយក្លិប Rayo Vallecano ដែលជាការប្រកួតពានរង្វាន់ Copa Del Rey វគ្គ១៦ក្រុម ខណៈការប្រកួតនេះធ្វើឡើងត្រឹមតែមួយជើងប៉ុណ្ណោះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងនោះដែរខ្សែប្រយុទ្ធឆ្នើម Lionel Messi បានត្រឡប់មកចូលលេងជាមួយក្រុមវិញហើយក្រោយជាប់បម្រាមពីរប្រកួតដោយសារបានប្រើដៃគ្រវាសលើខ្សែប្រយុទ្ធ Villalibre កាលប្រកួតទល់នឹងក្លិប Athletic Bilbao ក្នុងពាន Spanish Super Cup កន្លងទៅនេះ។
លទ្ធផលនៃការប្រកួតគឺ Barcelona យកឈ្នះក្រុមម្ចាស់ផ្ទះ ២ ទល់នឹង ១ ដោយទម្លាក់ Rayo Vallecano ចេញពីពាន Copa Del Rey បានសម្រេចបើទោះអ្នកគាំទ្រត្រូវប្រហោងពោះបន្តិចព្រោះ Rayo Vallecano ជាអ្នកភាគីបើកឆាករកគ្រាប់បាល់បានមុនក៏ដោយ។
ខ្សែការពារ Fran Garcia របស់ខាងក្រុម Rayo Vallecano ស៊ុតមួយជើងនៅនាទីទី៦៣ខណៈឈរកៀកនឹងមាត់តារាងស្រាប់ ដោយមានការបញ្ជូនបាល់ពីមិត្តរួមក្រុម។
តែកីឡាករ Barcelona មិនអស់សង្ឃឹមងាយៗឡើយបើទោះបីជាសល់តែជាងកន្លះម៉ោងទៀតក៏ដោយ រហូតនៅនាទីទី៦៩ ខ្សែប្រយុទ្ធ Antoine Griezmann បោះបាល់ពីចំហៀងតារាងទម្លាក់មកឲ្យ ខ្សែប្រយុទ្ធ Lionel Messi ទើបរូបគេស៊ុតមួយជើងឆ្វេងចំប្លង់ពាក់កណ្ដាលតារាងល្អណាស់ ធ្វើឲ្យអ្នកចាំទី Dimitrevski ចាប់មិនទាន់។
នៅនាទីទី៨០ចុងម៉ោងទៅហើយ Barcelona បានពន្លត់ក្ដីសង្ឃឹមរបស់ Rayo Vallecano ពេលខ្សែប្រយុទ្ធ Lionel Messi បន្តក់បាល់យ៉ាងល្អទៅឲ្យ ខ្សែការពារ Jordi Alba ទើបរូបគេបញ្ជូនបាល់បន្តពីចំហៀងតារាងលើកមកឲ្យ ខ្សែបម្រើ Frenkie De Jong ដែលនៅម្ដុំប្រអប់គ្រោះថ្នាក់របស់ Rayo Vallecano ស្រាប់បានស៊ុតថែម១គ្រាប់ទៀតជួយឲ្យ Barca យកឈ្នះក្រុមម្ចាស់ផ្ទះ ២ ទល់នឹង ១។
គួរបញ្ជាក់ផងដែរថា ១ គ្រាប់របស់ Messi ក្នុងការប្រកួតនេះជាគ្រាប់បាល់ផ្លូវការទី ៧២០របស់គេ។
ជ័យជម្នះនេះមានន័យថា Barcelona បានកក់កៅអីឡើងទៅវគ្គ៨ក្រុមក្នុងពាន Copa Del Rey ហើយ៕
ចំពោះស្ថិតិនៃការប្រកួតគឺ Rayo Vallecano គ្រប់គ្រងបាល់បានតែ៣០%ខណៈ Barcelona បានដល់ទៅ៧០% និងស៊ុតចំគោលដៅ ៦ដង ច្រើនជាងក្រុមម្ចាស់ផ្ទះ ២ ដង។
សូមទស្សនាវីដេអូនៃការប្រកួតខាងក្រោមនេះ៖
ប្រភព៖ espn