អេស្ប៉ាញ៖ ខ្សែការពាររបស់ក្លិបអ្នកមានបុណ្យ Barcelona គឺ Jordi Alba បានចេញមុខថ្លែងដោយផ្ទាល់ថាគេយល់ថាហេតុអីមនុស្សជាច្រើននាក់មិនចូលចិត្តគេក្នុងកិច្ចសម្ភាសន៍មួយជាមួយកម្មវិធី El Dia Despues នៅលើកញ្ចក់ទូរទស្សន៍ Movistar+ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ពេលមានការជជែកវែកញែកពាក់ព័ន្ធនឹងប្រតិកម្មរបស់អ្នកគាំទ្រចំពោះរូបគេ កីឡាករវ័យ៣១ឆ្នាំរូបនេះបានថ្លែងទាំងមុខស្ងួតថា៖
មនុស្សទាំងអស់ស្គាល់ខ្ញុំច្បាស់ណាស់ក្នុងពិភពបាល់ទាត់នេះ ខ្ញុំគិតថាខ្ញុំជាកីឡាករដែលមានអ្នកស្អប់ច្រើនជាងគេបង្អស់ ខ្ញុំដឹង។ខ្ញុំគិតថាស្ទាយ៍នៃការលេងបាល់របស់ខ្ញុំធ្វើឲ្យពួកគេស្អប់ខ្ញុំ។ខ្ញុំបានក្លាយជាខ្លួនខ្ញុំហើយព្រោះបាល់ទាត់នេះហើយទើបធ្វើឲ្យខ្ញុំមានថ្ងៃនេះ។
Alba បានថ្លែងបន្តទៀតថា៖
ខ្ញុំជឿជាក់ថាបើអ្នកទាំងអស់គ្នាដែលធ្លាប់បានស្គាល់ខ្ញុំ ដឹងពីចរិតរបស់ខ្ញុំ ប្រាកដជាដឹងហើយថាខ្ញុំតែងតែចេះដាក់ខ្លួន ហើយខ្ញុំពិតជាផ្ដល់តម្លៃដល់អ្វីៗគ្រប់យ៉ាងក្នុងជីវិតខ្ញុំ។ ពួកគេនឹងនិយាយថា Jordi ក្នុងរូបភាពជាកីឡាករមានភាពខុសប្លែកពី Jordi ក្នុងនាមជាមនុស្សម្នាក់ក្នុងសង្គមនិងមនុស្សម្នាក់ដែលមានសម្ពន្ធភាពល្អជាមួយមិត្តរួមក្រុម។វាពិតណាស់ដែលខ្ញុំមើលទៅពិតជាគួរឲ្យស្អប់ណាស់ ប៉ុន្តែខ្ញុំយល់ថាហេតុអីអ្នកមិនទាន់ស្គាល់ខ្ញុំច្បាស់ថាគេស្អប់ខ្ញុំ។
ខ្សែការពារ Jordi Alba ចាប់ផ្ដើមចូលលេងជាមួយក្លិប Barcelona តាំងពីឆ្នាំ១៩៩៨ ដោយលេងនៅថ្នាលយុវជនប៉ុន្តែនៅឆ្នាំ២០០៥ ក្លិបក៏បានសម្រេចចិត្តដោះលែងគេឲ្យចាកចេញទើបកីឡាករសញ្ជាតិអេស្ប៉ាញរូបនេះបានទៅចូលរួមជាមួយក្លិប UD Cornella រហូតដល់ឆ្នាំ ២០០៧ មុននឹងប្ដូរទៅលេងឲ្យក្លិបអេស្ប៉ាញ Valencia ដោយបានចូលលេងជាមួយក្រុមឈុត B របស់ Valencia នៅពីរឆ្នាំបន្ទាប់ពីនោះ។ ក្រោយមកនៅឆ្នាំ ២០១២ Alba បានវិលត្រឡប់មកទឹកដី Camp Nou សាជាថ្មីជាមួយ Barcelona ម្ដងទៀតហើយចាប់ពីពេលនោះមក គេក៏លេងក្នុងនាមជាកីឡាកររបស់ Barcelona មកទល់នឹងពេលនេះដោយបង្ហាញខ្លួនបាន២៤១ប្រកួត ហើយរកគ្រាប់បាល់បាន១១គ្រាប់។ ក្រៅពីនោះ Alba ក៏បានចូលលេងឲ្យក្រុមជម្រើសជាតិអេស្ប៉ាញដែរ តែផ្លាស់មកលេងឲ្យក្រុមជម្រើសជាតិកាតាឡាន់នៅឆ្នាំ២០០៨ ដោយចូលលេងបាន៥ប្រកួត៕
ប្រភព៖ marca
Bong I.T