អង់គ្លេស៖ បន្ទាប់ពីការប្រកួតរវាងហង្សក្រហម Liverpool និង Manchester United បានចប់សព្វគ្រប់ក្នុងលទ្ធផល០ ទល់នឹង ០ អ្នកគាំទ្រទាំងអស់បានសង្កេតឃើញកាយវិការខ្លះៗរបស់ ខ្សែបម្រើសញ្ជាតិព័រទុយកាល់ Bruno Fernandes ខណៈត្រូវលោកគ្រូបង្វឹក Ole Gunnar Solskjaer ប្ដូររូបគេចេញនៅនាទីទី៨៩ដែលជិតចុងម៉ោងនៃការប្រកួតទៅហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កាលណោះ Bruno Fernandes បានបង្ហាញទឹកមុខមាំដូចមិនសូវសប្បាយចិត្តពេលដឹងថាលោកគ្រូប្ដូររូបគេចេញដោយដាក់ខ្សែប្រយុទ្ធ Mason Greenwood ចូលជំនួសហើយ Bruno ថែមទាំងបានព្យាយាមដើរយឺតៗដូចចង់ពន្យារពេលចេញពីទីលានទៀតផង។
យោងតាមសេចក្ដីរាយការណ៍ Bruno ក៏បានត្អូញត្អែរខណៈសម្លឹងមើលទៅទិសដៅនៃការប្រកួតតែក៏យល់ព្រមដើរចេញមកអង្គុយកៅអីបម្រុងវិញទាំងទឹកមុខមាំ។
បន្ទាប់ពីឃើញដូច្នេះ ក្រោយអាជ្ញាកណ្ដាលផ្លុំកញ្ចែបញ្ចប់ការប្រកួត លោកគ្រូបង្វឹក Ole Gunnar Solskjaer បានលាតត្រដាងពីហេតុផលដែលលោកគ្រូសម្រេចប្ដូរខ្សែបម្រើឆ្នើមម្នាក់នេះចេញថា៖
វាជាការសម្រេចចិត្តដោយផ្អែកលើយុទ្ធសាស្ត្រនៃការប្រកួត ការពិតទៅ Bruno គេលេងអស់ពីកម្លាំងកាយចិត្តនៅក្នុងការប្រកួតនីមួយៗរបស់ពួកយើងតាំងពីគេមកចូលរួមជាមួយយើងម៉្លេះ ប៉ុន្តែយើងគិតថាវត្តមានរបស់ Paul Pogba នឹងបង្កើតឱកាសឲ្យយើងមានឱកាសស៊ុតបញ្ចូលទី។ ហើយ Mason (Greenwood)ក៏អាចបង្កើតឱកាសដូច Pogba ដែរដូច្នេះហើយទើបខ្ញុំសម្រេចចិត្តប្ដូរគេ(Bruno) ចេញ ជំនួសដោយ Mason វិញ បើទោះបើជាគេត្រូវប្រឈមនឹងខ្សែការពារ (Andrew)Robertson របស់ខាង Liverpool ក៏ដោយ។
គួរបញ្ជាក់ផងដែរថាក្នុងការប្រកួតនេះ ខ្សែបម្រើ Bruno Fernandes ធ្វើមិនសូវបានល្អទេព្រោះគេបានបញ្ចូនបាល់ខុសគោលដៅដល់ទៅ៥៨%ក្នុងការប្រកួតដែលចំនួននេះគឺគ្មានកីឡាករ Man UTD ឬ Liverpool ណាដែលបង្កើតកំហុសដូច្នេះទេ៕
ប្រភព៖ metro
Bong I.T