អង់គ្លេស៖ ប្រធានក្រុមហង្សក្រហម Liverpool គឺខ្សែបម្រើ Jordan Henderson បានកោតសរសើរទៅលើ ខ្សែប្រយុទ្ធ Marcus Rashford របស់ក្លិបបិសាចក្រហម Manchester United ដោយសារកីឡាករសញ្ជាតិអង់គ្លេសវ័យក្មេងម្នាក់នេះបានបើកយុទ្ធាការជួយជ្រោមជ្រែងផ្ដល់អាហារដល់ក្មេងៗដែលខ្វះខាត ក្នុងចក្រភពអង់គ្លេស។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Rashford មិនមែនត្រឹមតែជាកីឡាករឆ្នើមលើវាលស្មៅនោះទេតែគេក៏ជាបុគ្គលឆ្នើមម្នាក់ក្នុងសង្គមដែលបានខិតខំជួយដល់ក្មេងៗដែលមានបញ្ហាកង្វះអាហារប្រចាំថ្ងៃកំឡុងពេលវីរុសកូវីដ១៩ រាតត្បាតទៀតផងដោយកាលពីខែតុលាកន្លងទៅ លោកគ្រូបង្វឹក Jurgen Klopp របស់ Liverpool ក៏ធ្លាប់កោតសរសើរគេដែរ។
ការងារផ្នែកសប្បុរសធម៌របស់ Rashford ធ្វើឱ្យប្រធានក្រុម Jordan Henderson មានការកោតស្ញប់ស្ញែងនិងបានថ្លែងថា៖
នេះជាលើកដំបូងដែលខ្ញុំត្រូវលើករឿងប្រកួតប្រជែងគ្នាទុកមួយឡែក និងសុំសម្ដែងការកោតសរសើរដល់កីឡាករម្នាក់របស់ Man UTD គឺ Marcus Rashford ដែលខ្ញុំដឹងថាអ្នកគាំទ្រទាំងអស់របស់ Liverpool ក៏កោតសរសើរគេដូចខ្ញុំដែរ។ អ្វីដែល Marcus បានធ្វើប្រមាណ១២ខែមកនេះវាពិតជាអស្ចារ្យណាស់ គេបានប្រយុទ្ធប្រឆាំងនឹងភាពអត់ឃ្លានរបស់កុមារ ដោយបានធ្វើជាសំឡេងមួយស្រែកជំនួសក្មេងៗអស់ទាំងនោះ។ខ្ញុំគិតថាគេសមនឹងទទួលពាក្យកោតសរសើរនិងទទួលពានរង្វាន់(ផ្នែកសប្បុរសធម៌)នេះឯង។ មិត្តរួមក្រុមរបស់ខ្ញុំម្នាក់គឺ Andy Robertson ដែលមិនសូវកោតសរសើរគូប្រជែងក៏បាននិយាយដែរថា Marcus គួរតែជាកីឡាករ Man UTD ដំបូងគេដែលសមគួរនឹងទទួលបានការឈរគោរពជាជួរពីពួកយើងនៅក្នុងទឹកដីកីឡដ្ឋាន Anfield នៅនឹងមុខអ្នកគាំទ្រទាំងអស់តែពេលនេះវាមិនអាចកើតឡើងដោយសារគ្មានអ្នកគាំទ្រចូលរួម ប៉ុន្តែខ្ញុំចង់ឲ្យគេដឹងថាពួកយើង(កីឡាករ Liverpool)ទាំងអស់ពិតជាគោរពគេណាស់។ ខ្ញុំពិតជាសំណាងណាស់ដែលបានចូលលេងក្នុងក្រុមជម្រើសជាតិអង់គ្លេសជាមួយគេ។
គួរបញ្ជាក់ផងដែរថា Marcus Rashford រកបាន១៤គ្រាប់និងបញ្ជូនបាល់ឲ្យមិត្តរួមក្រុម៩គ្រាប់ទៀតក្នុងការបង្ហាញខ្លួនក្នុងក្របបខណ្ឌទាំងអស់នៅរដូវកាលនេះ៕
ប្រភព៖ goal
Bong I.T