ដល់ថ្នាក់ហ្នឹងផង! Ramos ខំលេបថ្នាំបំបាត់ការឈឺចាប់មុនប្រកួតទល់នឹង Athletic Bilbao ដោយសារ...

អេស្ប៉ាញ៖ ការពិតមួយត្រូវបានទម្លាយធ្វើឲ្យអ្នកគាំទ្រ Real Madrid ទាំងអស់មានការភ្ញាក់ផ្អើលក្រោយប្រភពមួយបានរាយការណ៍ថាខ្សែការពារនិងជាប្រធានក្រុម Sergio Ramos ចូលលេងក្នុងការប្រកួតទល់នឹង Athletic Bilbao ក្នុងពានរង្វាន់ Spanish Super Cup ដោយផឹកថ្នាំបំបាត់ការឈឺចាប់មុនការប្រកួតចាប់ផ្ដើមឡើងដោយសារគេមានបញ្ហារបួសត្រង់ជង្គង់ខាងឆ្វេង។

Ramos ស្ទើរតែមិនបានចូលលេងទៅហើយពេលមានអារម្មណ៍ថាគេមិនសូវស្រួលក្នុងខ្លួនកំឡុងពេលហ្វឹកហាត់ប៉ុន្តែបន្ទាប់ពីពិភាក្សាជាមួយក្រុមគ្រូពេទ្យ គេក៏សម្រេចចិត្តថានឹងចូលលេងទាំងបែបនេះតែម្ដង។

ការពិតទៅនេះមិនមែនជាលើកទី១ទេដែល ខ្សែការពារវ័យ៣៤ឆ្នាំរូបនេះបានប្រើប្រាស់ថ្នាំបំបាត់ការឈឺចាប់ដើម្បីទប់អាការៈរបួសព្រោះកាលពីលេងបាល់ទាត់ពិភពលោកឆ្នាំ២០១៤ ដែលធ្វើឡើងនៅប្រទេសប្រេស៊ីល គេក៏បានផឹកថ្នាំនេះដែរបន្ទាប់ពីមានបញ្ហាទាក់ទងជាមួយសរសៃជើង។

ប៉ុន្តែលើកនេះស្ថានភាពរបស់គេរាងធ្ងន់ជាងលើកមុននិងបង្កក្ដីកង្វល់ដល់ក្លិបទើបក្រុមគ្រូពេទ្យនឹងធ្វើការពិនិត្យរាងកាយគេម្ដងទៀតយ៉ាងលម្អិតនៅប៉ុន្មានថ្ងៃបន្ទាប់ខាងមុខ។

ក្នុងនោះដែរ យោងតាមសេចក្ដីរាយការណ៍ Ramos អាចនឹងមានភាគរយខ្ពស់ក្នុងការខកខានការប្រកួតទល់នឹងក្លិប Alcoyano ក្នុងពាន Copa Del Rey នៅថ្ងៃពុធឈានចូលថ្ងៃព្រហស្បតិ៍ខាងមុខ ដោយគេអាចនឹងវិលត្រឡប់មកលេងទល់នឹង Alaves ក្នុងក្របខណ្ឌ La Liga នៅសប្តាហ៍ក្រោយនេះ។

យ៉ាងណាមិញទោះបី Sergio Ramos ចូលលេងទាំងក្នុងស្ថានភាពរបួសក៏ដោយក៏រូបគេនៅតែបង្ហាញទម្រង់លេងល្អដូចសព្វដងបើទោះបីជា Real Madrid ប្រកួតចាញ់ Athletic Bilbao និងភ្លាត់ធ្លាក់ចេញពីពាន Spanish Super Cup ក៏ដោយ៕

ប្រភព៖ marca