នៅក៏មិនសូវបានលេង! Man UTD នឹងដាក់កីឡាករម្នាក់របស់ខ្លួនឲ្យក្លិប Nice ខ្ចីជើង

អង់គ្លេស៖ យោងតាមសារព័ត៌មាន Sky Sports គឺភ្នាក់ងារតំណាងក្លិបបិសាចក្រហម Manchester United កំពុងបើកការចរចាជាមួយក្លិបបារាំង Nice ទាក់ទងនឹងការដាក់ឲ្យខ្សែបម្រើ Jesse Lingard ទៅខ្ចីជើងនៅទីនោះក្រោយកីឡាករវ័យ២៧ឆ្នាំម្នាក់នេះត្រូវលោកគ្រូបង្វឹក Ole Gunnar Solskjaer បោះបង់ចោលដោយមិនទាន់បានបង្ហាញខ្លួនក្នុងការប្រកួតនាក្របខណ្ឌ Premier League សូម្បីតែម្ដង។

Lingard ចូលលេងឲ្យ Man UTD បានតែ៣ប្រកួតគឺការប្រកួតពាន Carabao Cup និងFA Cup ដោយសរុបមកគេបង្ហាញខ្លួនបានតែ១៧៩នាទីប៉ុណ្ណោះដោយចំណាយពេលអង្គុយកៅអីបម្រុងដល់ទៅ១៧ប្រកួតឯណោះ។

កាលពីខែមុនក៏ធ្លាប់ផ្ទុះពាក្យចចាមអារ៉ាមដែរថា Lingard នឹងទៅចូលរួមជាមួយ Real Sociedad នៅអេស្ប៉ាញក្នុងលក្ខខណ្ឌខ្ចីជើង ប៉ុន្តែមកទល់ពេលនេះមិនទាន់ឃើញមានការប្រកាសណាមួយឡើយ ហើយឥឡូវនេះខាង Nice បានដាក់សំណើខ្ចីជើងរូបគេ។

Jesse Lingard បានបង្ហាញខ្លួនឲ្យ Man UTD បាន២១០ប្រកួតដោយស៊ុតបញ្ចូលទីបាន៣៣គ្រាប់និងបញ្ជូនបាល់ឲ្យមិត្តរួមក្រុម២០គ្រាប់ទៀត ប៉ុន្តែមើលតាមស្ថានភាពជាក់ស្ដែងនៅពេលនេះ លោកគ្រូ Ole មិនទុកចិត្តឲ្យគេចូលប្រកួតឡើយ ប៉ុន្តែ Man UTD ក៏មិនចង់បាត់បង់ខ្សែបម្រើម្នាក់នេះងាយៗដែរទើបរកឱកាសរុញច្រាន Lingard ទៅខ្ចីជើងនៅក្លិបផ្សេងព្រោះកន្លងមករូបគេធ្លាប់ត្រូវដាក់ឲ្យខ្ចីជើងនៅក្លិបដូចជា Leicester City, Birmingham City, Brighton និង Derby County រួចមកហើយ៕

ប្រភព៖ thesun