យល់ស្របអត់?Ian Wright ថា បើគ្មានកីឡាករវ័យក្មេងម្នាក់នេះទេ Arsenal ដឹងតែយ៉ាប់ហើយ

អង់គ្លេស៖ លោក Ian Wright ជឿថាក្លិបកាំភ្លើងធំ Arsenal នឹងជួបបញ្ហាធំបើសិនគ្មានកីឡាករវ័យក្មេង Emile Smith Rowe ព្រោះភ័ស្តុតាងមានបញ្ជាក់ស្រាប់ក្នុងការប្រកួតទល់នឹង Newcastle ដែល Arsenal បានយកឈ្នះ ២ ទល់នឹង ០ ក្នុងពានរង្វាន់ FA Cup។

លោកគ្រូបង្វឹក Mikel Arteta បានធ្វើការផ្លាស់ប្ដូរយុទ្ធសាស្ត្រប្រាំពីរចំណុចកាលប្រកួតទល់នឹង Newcastle ដែលកាលណោះគឺដាក់ឲ្យខ្សែបម្រើ Emile Smith Rowe នៅកៅអីបម្រុង ប៉ុន្តែកីឡាកររបស់ Arsenal ដែលបានចូលលេងបែរជាពិបាកក្នុងការបំបែកកំផែងការពារដ៏រឹងមាំរបស់គូប្រកួត។

ស្រាប់តែពេល លោកគ្រូ Arteta ប្ដូរកីឡាករ៣នាក់គឺ Smith Rowe, Bukayo Saka និង Alexander Lacazette ចូលលេង គ្រប់យ៉ាងបែរជាក្រឡាប់ចាក់។ Arsenal ចាប់ផ្ដើមសម្រុកទៅមុខយ៉ាងខ្លាំងក្លារហូតក្រុមត្រូវប្រកួតថែមម៉ោងទៀតផង។

ខ្សែបម្រើ Emile Smith Rowe ស៊ុតបញ្ចូលទីបាន១គ្រាប់ដោយមានការបញ្ជូនពី Lacazetta នៅនាទីទី១០៩ មុននឹងខ្សែប្រយុទ្ធ Pierre -Emerick Aubameyang ដាក់ថែម១គ្រាប់ទៀតនៅនាទីទី១១៧ដែលធ្វើឲ្យ Arsenal បានឡើងទៅជុំទី៤ក្នុងពាន FA Cup ដោយជោគជ័យ។

Rowe បានក្លាយជាកីឡាករសំខាន់ម្នាក់ក្នុងក្រុមតាំងពីប៉ុន្មានសប្តាហ៍មុននេះ ដោយគេលេងជាតំណែងខ្សែបម្រើប្រយុទ្ធនិងមានចំណុចពិសេសមួយគឺអាចបង្កើតឱកាសនិងធ្វើឲ្យក្រុមមានព្រលឹងព្រលះឡើងវិញ។

ដោយឃើញពីសមត្ថភាពលេចធ្លោរបស់គេ  លោក Ian Wright មានអារម្មណ៍ថា Rowe ពិតជាបានរួមចំណែកជួយក្លិបច្រើនណាស់ ហើយបើសិនគេអវត្តមានមែន ក្លិបមុខជាប្រឈមនឹងភាពលំបាកហើយ។

គួររម្លឹកផងដែរថាខ្សែបម្រើ Emile Smith Rowe ដែលមានវ័យត្រឹមតែ២០ឆ្នាំនេះបានចូលលេងឲ្យ Arsenal ចំនួន៣ប្រកួតដោយរកគ្រាប់បាល់បាន១គ្រាប់និងបញ្ជូនបាល់បាន១គ្រាប់ទៀត៕

ប្រភព៖ metro