អេស្ប៉ាញ៖ កាលពីយប់ថ្ងៃអង្គារឈានចូលថ្ងៃពុធកន្លងទៅ ក្លិបអ្នកមានបុណ្យ Barcelona បានអញ្ជើញក្រុមភ្ញៀវ SD Eibar មកកាន់ទឹកដីកីឡដ្ឋាន Camp Nou ក្នុងការប្រកួតនៃក្របខណ្ឌ La Liga ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លទ្ធផលនៃការប្រកួត៩០នាទីពេញគឺ Barcelona លេងបានត្រឹមស្មើ ១ ទល់នឹង ១ជាមួយ Eibar ខណៈគ្មានវត្តមានខ្សែប្រយុទ្ធឆ្នើម Lionel Messi ចូលប្រកួតនោះឡើយព្រោះរូបគេទើបតែត្រឡប់មកពីស្រុកកំណើតគឺទីក្រុង Rosario ប្រទេស អាហ្សង់ទីន បន្ទាប់ពីប្រារព្ធពិធីបុណ្យណូអែលតែរូបគេក៏បានមកអង្គុយមើលក្រុមប្រកួតពីកន្លែងអង្គុយរបស់ទស្សនិកជន។
នៅតង់ទី១ កីឡាកររបស់ Eibar បានប៉ះទង្គិចគ្នាជាមួយខ្សែការពារ Ronald Araujo ទើបលោកអជ្ញាកណ្ដាលសម្រេចផ្ដល់បាល់ប៉េណាល់ទីដោយខ្សែប្រយុទ្ធ Martin Braithwaite របស់ Barcelona តែបែរជាខុសទីទៅវិញ។
រហូតដល់តង់ទី២ទើបគ្រាប់បាល់បើកឆាកដំបូងរកបានដោយក្រុមភ្ញៀវ Eibar នៅពេលខ្សែប្រយុទ្ធម្ចាស់អាវលេខ១៧ Kike ស៊ុតមួយជើងឆ្វេងទម្លុះសំណាញ់អ្នកចាំទីសញ្ជាតិអាល្លឺម៉ង់ Marc Andre Ter Stegen ដែលប្រហែសដើរចេញពីខាងមុខប្រអប់គ្រោះថ្នាក់ដើម្បីឡើងមកជួយក្រុមទើប Stegen សង្គ្រោះមិនទាន់។
លទ្ធផល១ទល់នឹង០នេះធ្វើឲ្យកីឡាករ Barcelona កាន់តែរងសំពាធប៉ុន្តែ១០នាទីក្រោយមកគឺនៅនាទីទី ៦៧ ខ្សែប្រយុទ្ធសញ្ជាតិបារាំង Ousmane Dembele ជួយឲ្យ Barcelona តាមស្មើ Eibar ពេលគេអូសបាល់ស៊ុតមួយជើងស្តាំពីចំហៀងតារាងក្រោយមានការបញ្ជូនពីខ្សែការពារ Junior Firpo និងរក្សាលទ្ធផល១ ទល់នឹង ១នេះ រហូតដល់ចប់ការប្រកួត។
នៅចុងម៉ោងមុនការប្រកួតជិតនឹងបញ្ចប់ ខ្សែបម្រើ Philippe Coutinho បានរងរបួសត្រង់ជង្គង់និងត្រូវបញ្ជូនចេញពីទីលានទើប Barcelona ប្រកួតដោយមានគ្នីគ្នាតែ១០នាក់។
តាំងពីលោកគ្រូបង្វឹកសញ្ជាតិហូឡង់ Ronald Koeman ចូលកាន់តំណែងមក Barcelona ទើបតែបានឈ្នះ៧ប្រកួតប៉ុណ្ណោះក្នុងការប្រកួតសរុបទាំងអស់១៥ប្រកួតរបស់ពួកគេ ដែលនេះរាប់ថាជាការចាប់ផ្ដើមរដូវកាលដ៏អាក្រក់មួយតាំងពីឆ្នាំ២០០៣មកម៉្លេះ ខណៈដែលលោកគ្រូក៏បានចេញមុខទទួលស្គាល់ថាក្រុមពិតជាមានភាពលំបាកក្នុងការប្រជែងយកពានរង្វាន់ណាស់។
ខ្ញុំនឹងនិយាយឲ្យត្រង់ៗថាវាពិតជាពិបាកណាស់ក្នុងការដណ្ដើមពានរង្វាន់La Liga គេថាគ្មានអ្វីដែលមិនអាចទៅរួចទេ ប៉ុន្តែយើងត្រូវតែទទួលស្គាល់និងប្រុងប្រៀបទុកជាមុន Atletico ពិតជាធ្វើបានល្អណាស់សម្រាប់ខ្ញុំ ពួកគេជាក្រុមខ្លាំង ពួកគេមិនសូវរបូតគ្រាប់បាល់ទេ។អ្នកមិនអាចនិយាយថា Barca លេងល្អដោយគ្មាន Messi ឡើយព្រោះគេជាកីឡាករមួយដែលមានកម្រិតខុសពីកីឡាករដទៃ។
លោកគ្រូ Koeman បានថ្លែងបន្តទៀតថា៖
បើនិយាយជាទូទៅគឺយើងលេងបានល្អ ប៉ុន្តែកំហុសរបស់កីឡាករខ្លះធ្វើឲ្យយើងបាត់បង់ពិន្ទុ ពួកយើងសមនឹងឈ្នះ ពួកយើងប្រឹងប្រែងធ្វើអ្វីដែលគួរធ្វើ ពួកយើងបានបង្កើតឱកាស ប៉ុន្តែពួកយើងស៊ុតប៉េណាល់ទីមិនចូល ហើយតំបន់ការពារក៏បង្កើតកំហុសច្រើនដែរ សរុបពួកយើងលេងបានល្អ ប៉ុន្តែរឿងបែបនេះកើតឡើងលើពួកយើងញឹកញាប់ណាស់។
ដោយឡែកយោងតាមសារព័ត៌មាន Marca ខ្សែប្រយុទ្ធ Lionel Messi ដែលមកចូលរួមទស្សនានៅកៅអីទស្សនិកជនវិញត្រូវគេបានឃើញថារូបគេបានគ្រវីក្បាលនិងដើរចេញដោយឈ្ងោកមុខចុះក្រោយអជ្ញាកណ្ដាលផ្លុំកញ្ចែបញ្ចប់ការប្រកួតដែលនោះជាកាយវិការមួយបញ្ជាក់ថា Messi គិតថា Barcelona ពិតជាដុនដាបកាន់តែខ្លាំងហើយ។
គួរបញ្ជាក់ផងដែរថា ក្លិបអ្នកមានបុណ្យ Barcelona នឹងត្រឡប់មកលេងវិញនៅឆ្នាំ២០២១ ដែលការប្រកួតដំបូងរបស់គេគឺទល់នឹងក្លិប Huesca នៅថ្ងៃអាទិត្យឈានចូលថ្ងៃច័ន្ទនេះឯង៕
សូមទស្សនាវីដេអូការប្រកួតខាងក្រោមនេះ៖
ប្រភព៖ goal
Bong I.T