អង់គ្លេស៖ អតីតកីឡាករម្នាក់របស់ក្លិបហង្សក្រហម Liverpool ដែលបច្ចុប្បន្នជាអ្នកវិភាគបាល់ទាត់នៅ Sky Sports គឺលោក Jamie Carragher បានចង្អុលបង្ហាញហេតុផលតែមួយគត់ដែល Liverpool មិនអាចក្លាយជាជើងឯកពានរង្វាន់ Premier League រដូវកាលនេះក្រោយក្លិបម្ចាស់ជើងឯក Premier League រដូវកាលមុនមួយនេះប្រកួតបានត្រឹមស្មើ ១-១ជាមួយនឹងក្រុមភ្ញៀវ West Brom ក្នុងជំនួបកាលពីថ្ងៃអាទិត្យឈានចូលថ្ងៃច័ន្ទកន្លងទៅ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ទោះបីជាយ៉ាងណាក៏ Liverpool នៅតែបន្តរក្សាតំណែងជាក្រុមកំពូលតារាង Premier League ដដែលដោយឈ្នះក្រុមស្ករគ្រាប់ Everton ដែលឈរនៅលេខ២ ចំនួន៤ពិន្ទុ។
ខ្សែប្រយុទ្ធ Sadio Mane ជាអ្នករកគ្រាប់បាល់បើកឆាកឲ្យខាង Liverpool នាំមុខនៅនាទីទី១២ ប៉ុន្តែនៅចុងម៉ោងគឺ Ayaji ក៏ហក់តែងបញ្ចូលទីនៅនាទីទី៨២ជួយឲ្យ West Brom រក្សាលទ្ធផលស្មើ Liverpool ១ ទល់នឹង ១។
ក្នុងនោះដែរអ្វីដែលគេសង្កេតឃើញគឺខ្សែការពារ Joel Matip ត្រូវបញ្ជូនចេញពីទីលានក្រោយរងរបួសនៅនាទីទី៥៩ ទើបលោក Jamie Carragher ស្វែងរកឃើញចំណុចខ្សោយមួយដែល Liverpool គួរតែពង្រឹងឡើងវិញគឺ បញ្ហាកង្វះខ្សែការពារនោះឯង។
ពេលនេះខ្សែការពារ Joe Gomez និង Virgil van Dijk សុទ្ធតែរងរបួសហើយគេមិនទាន់ច្បាស់នៅឡើយទេថាពួកគេនឹងវិលចូលទីលានវិញនៅពេលណា ដោយលោកគ្រូ Jurgen Klopp បានយក Fabinho មកជំនួសពួកគេ។
ប៉ុន្តែក្នុងករណីដែល Fabinho របួសម្នាក់ទៀត ក្លិបហង្សក្រហម Liverpool នឹងប្រឈមជាមួយបញ្ហាធំហើយ។
លោក Jamie Carragher បានថ្លែងថា៖
Joel Matip អាចនឹងមិនបានចូលលេងចាប់ពីប្រកួតបន្តបន្ទាប់ទៀតរហូតដល់ចុងរដូវកាលនេះ អ៊ីចឹងហើយខ្ញុំគិតថា Liverpool គួរតែទិញយកខ្សែការពារមកបម្រុងទុកបន្ថែមទៀតនៅទីផ្សារដោះដូរកីឡាករខែមករាខាងមុខនេះ។ ខ្ញុំមានន័យថា Fabinho បានបង្ហាញទម្រង់លេងគួរឲ្យកត់សម្គាល់នឹងអាចជំនួសខ្សែការពារឆ្នើមៗដែលរបួសបាន អីចឹងហើយទើបគ្រប់គ្នាមិនសូវចាប់អារម្មណ៍ថា Liverpool កំពុងខ្វះខ្សែការពារ។ ខ្ញុំនៅតែគិតថា Liverpool ជាក្រុមល្អបំផុតនៅក្នុងក្របខណ្ឌនេះ សូម្បីតែពេលគ្មាន van Dijk ហើយខ្ញុំគិតថាមហាជនភាគច្រើនប្រាកដជាជ្រើសរើស Liverpool ជាក្រុមពួកគេចង់ឲ្យឈ្នះពាននេះជាងគេ។
លោកបានគូសបញ្ជាក់ទៀតថា៖
ខ្ញុំគិតថាចំណុចខ្សោយតែមួយគត់ដែលរារាំង Liverpool មិនឲ្យលើកពាន Premier League បានគឺពួកគេមានបញ្ហាទាក់ទងនឹងកង្វះខ្សែការពារនោះឯង ខណៈដែល Rhys Williams និង Nat Phillips ត្រូវអូសបន្លាយពេលវេលាចូលលេងយូរយារទៀតដែលខ្ញុំគិតថាវាមិនមែនជាតំណែងដែលខ្សែការពារក្មេងៗអាចមានសមត្ថភាពទប់ទល់បាននោះឡើយទោះពួកគេធ្វើបានល្អក៏ដោយ។ ពួកគេជាកីឡាករវ័យក្មេង អ៊ីចឹងហើយពួកគេងាយនឹងបង្កើតកំហុស ពេលនេះពួកគេកំពុងរៀនសម្របខ្លួនតែចាំមើលថា Liverpool ត្រូវប្រឈមនឹងអ្វីខ្លះ។
លោក Jamie Carragher ក៏បានគូសបញ្ជាក់ទៀតថា លោកចង់ឲ្យ Liverpool ទិញខ្សែការពារមកបន្ថែមទៀតតែមិនមែនខ្សែការពារថ្លៃៗកប់ពពកណាម្នាក់ឡើយ។
ខ្ញុំមិនបានមានន័យថាឲ្យក្លិបទិញកីឡាករខ្សែការពារតម្លៃដល់ទៅ ៧០ ឬ ៨០លានផោនដូច Virgil van Dijk ឡើយ គឺត្រូវសម្លឹងរកមើលខ្សែការពារណាដែលអាចជំនួស Fabinho ដើម្បីចៀសវាងកុំឲ្យក្មេងៗទាំងពីរ(Rhys Willaims និង Nat Philipps) បានចូលលេងជាមួយគ្នា។ ព្រោះនៅខណៈនេះ Liverpool សល់តែខ្សែការពារខ្ចីចាស់បទពិសោធន៍ច្រើនតែម្នាក់ប៉ុណ្ណោះ អ៊ីចឹងហើយ Liverpool គួរតែគិតគូទិញខ្សែការពារនៅខែមករាខាងមុខនេះហើយ។
ប្រភព៖ mirror
Bong I.T