ក្រុមហ៊ុនតូយ៉ូតានឹងបញ្ឈប់ការផលិតរថយន្ត Land Cruiser ចាប់ពីឆ្នាំ2021ទៅ

អាមេរិក៖ ក្រុមហ៊ុន Toyota បានបញ្ជាក់ពីពាក្យចចាមអារ៉ាមកាលពីដើមឆ្នាំ2020 ដោយប្រកាសថាត្រកូលរថយន្ត Land Cruiser នឹងចូលនិវត្តន៍បន្ទាប់ពីម៉ូឌែលឆ្នាំ2021។ ម៉ូឌែលជំនាន់ក្រោយនឹងត្រូវបានណែនាំនៅក្នុងប៉ុន្មានខែខាងមុខនេះ ប៉ុន្តែយើងមិនដឹងទេថាតើរថយន្តនេះនឹងផលិតនៅសហរដ្ឋអាមេរិកវិញឬអត់។

ក្រុមហ៊ុនតូយ៉ូតាបាននិយាយនៅក្នុងសេចក្តីថ្លែងការណ៍មួយផ្ញើទៅកាន់ Road & Track ថា  «Land Cruiser គឺជាឈ្មោះដ៏ល្បីល្បាញមួយអស់រយៈពេលជាង60ឆ្នាំមកហើយ។ ខណៈពេលដែលវានឹងត្រូវបញ្ចប់ការផលិតនៅសហរដ្ឋអាមេរិកបន្ទាប់ពីឆ្នាំ2021 យើងនៅតែប្តេជ្ញាចិត្តចំពោះផ្នែករថយន្តប្រភេទ SUV ហើយនឹងបន្តស្វែងរកផលិតផលនាពេលអនាគតដែលអបអរសាទរប្រវត្តិសាស្ត្រ off-road ដ៏សម្បូរបែបរបស់ Land Cruiser ជាបន្តបន្ទាប់ទៀត។ យើងសូមលើកទឹកចិត្តដល់អ្នកគាំទ្រដ៏ស្មោះត្រង់ទាំងឡាយឱ្យរង់ចាំតាមដានបន្តទៀតចំពោះការអភិវឌ្ឍនាពេលអនាគត។»

វាមានសារៈសំខាន់ណាស់ក្នុងការយល់ថា ផលិតផលនាពេលអនាគតដែលអបអរសាទរប្រវត្តិសាស្ត្រ off-road ដ៏សម្បូរបែបរបស់ Land Cruiser ដែលក្រុមហ៊ុន Toyota បានលើកឡើងគឺមិនមែនមានន័យថាជាការផលិត Land Cruiser ប្រភេទថ្មីនោះទេ។ វាអាចជាការផលិតឡានប្រភេទថ្មីណាមួយដែលវាស្រដៀងគ្នា។​

តាមការរាយការណ៍ពីមុនដែលគួរឱ្យទុកចិត្តបានអះអាងថា ម៉ូឌែលជំនាន់ក្រោយនឹងលែងមានម៉ាស៊ីនស៊ីឡាំង8 តែនឹងមានម៉ាស៊ីន turbocharged V6 វិញ។ ទំនោរទៅរកបច្ចេកវិទ្យាបៃតងមិនមែនមានន័យថាអន់នោះទេ ហើយគេលឺថា Land Cruiser នឹងនៅតែបន្តផ្តល់ជូននូវសមត្ថភាព off-road ដ៏ពិសេសដដែល។

រថយន្ត Land Cruiser គឺជាផ្នែកមួយនៃក្រុមហ៊ុនតូយ៉ូតារបស់អាមេរិកតាំងពីដំបូង។ ក្រុមហ៊ុនជប៉ុនបានបង្កើតក្រុមហ៊ុនអាមេរិចរបស់ខ្លួននៅថ្ងៃទី31 ខែតុលា ឆ្នាំ1957 ហើយការលក់បានចាប់ផ្តើមនៅឆ្នាំបន្ទាប់។ ក្រុមហ៊ុននេះបានលក់រថយន្តចំនួន288គ្រឿងនៅសហរដ្ឋអាមេរិកក្នុងឆ្នាំ1958ដោយក្នុងនោះមានឡានដឹកទំនិញ Land Cruiser មួយគ្រឿង។ ឡានមួយគ្រឿងនេះចំណាយពេលស្ទើរតែពេញមួយជីវិតវានៅកាលីហ្វ័រញ៉ា ហើយបច្ចុប្បន្នវាត្រូវបានដាក់បង្ហាញនៅក្នុងសារមន្ទីរមួយនៅទីក្រុង Salt Lake៕