ផ្លូវការ! អតីតតារាឆ្នើមរបស់ Real Madrid ម្នាក់ត្រឡប់មកចូលរួមជាមួយក្លិបវិញហើយ!

អេស្ប៉ាញ៖ ក្លិបអធិរាជស Real Madrid បានប្រកាសជាផ្លូវការកាលពីយប់ថ្ងៃអង្គារ ទី២២ថា អតីតអ្នកចាំទីឆ្នើមរបស់ក្លិបគឺ Iker Casillas បានត្រឡប់មកចូលរួមជាមួយ Real Madrid វិញហើយតែលើកនេះរូបគេមិនមែនមកក្នុងនាមជាកីឡាករឡើយតែមកចូលកាន់តំណែងជានាយកប្រតិបត្តិរង នៃមូលនិធិ Real Madrid។

ព័ត៌មានចចាមអារ៉ាមដំបូងពាក់ព័ន្ធនឹងការវិលវិញរបស់អតីតអ្នកចាំទី Iker Casillas បានផ្ទុះឡើងតាំងពីថ្ងៃទី១៧ហើយថ្ងៃនេះ Real Madrid បានធ្វើការប្រកាសជាផ្លូវការហើយ។

ភ្នាក់ងារតំណាងរបស់ក្លិប Real Madrid បានជម្រាបថា៖

Casillas បានឈ្នះពានរង្វាន់សរុបទាំងអស់ចំនួន ១៩ ក្នុងកំលុងអាជីពជាអ្នកចាំទីជាង២៥ឆ្នាំ នៅឯក្លិប Real Madrid ក្នុងនោះគឺពានរង្វាន់ Champions League ៣ដង , Club World Cup ៣ដង,ពាន La Liga ៥ដង ,ពាន Copa Del Rey ២ដង ព្រមទាំងពាន Supercopa de Espana ៤ បន្ថែមទៀត។

បន្ទាប់ពីចាកចេញពី Real Madrid ទាំងទឹកភ្នែក Casillas បានទៅចូលរួមជាមួយក្លិប Porto និងបានជួយឲ្យក្រុមឈ្នះពានរង្វាន់ចំនួន២គឺ ពានលីគកំពូលព័រទុយកាល់ និង ពាន SuperCup របស់ព័រទុយកាល់១ទៀត។

ដោយឡែក ជាមួយជម្រើសជាតិអេស្ប៉ាញវិញ Iker Casillas បានបង្ហាញខ្លួនចំនួន១៦៧ប្រកួតនិងឈ្នះពាន បាល់ទាត់ពិភពលោក World Cup ១​ដង ពាន European Championship ២ដង និងពានបាល់ទាត់ពិភពលោកក្រោមអាយុ២០ឆ្នាំ ១ទៀត។

ក្រឡេកមកមើលជីវិតរបស់គេនៅខាងក្រៅពិភពបាល់ទាត់វិញគឺ Casillas ធ្លាប់ទទួលពានរង្វាន់ជាច្រើនដូចជា ពានរង្វាន់ Prince of Asturias ,មេដាយកិត្តិយសនៃពាន Royal Order of Sporting Merit , មេដាយមាស Royal order of Sporting Merit និង មេដាយមាសលើពានសហគមន៍នៃទីក្រុងម៉ាឌ្រីដទៀតផង៕

ប្រភព៖ marca