អាកាសធាតុចាប់ផ្តើមត្រជាក់ខ្លាំង ដូច្នេះការការពារស្បែកជារឿងចាំបាច់បំផុតនាពេលបច្ចុប្បន្ននេះ។ តើយើងគួរធ្វើបែបណា ដើម្បីឲ្យស្បែកយើងនៅតែស្រស់ស្អាតជានិច្ច?
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស៥ ចំណុច ខាងក្រោមនេះ នឹងជួយអោយស្បែកអ្នកនៅតែស្អាតទោះអាកាសធាតុប្រែប្រួលត្រជាក់បែបណាក៏ដោយ។
1/ ឡេសំណើម
កុំស្ដាយលុយអី ល្មមចាយលុយខ្លះទិញឡេយកមកប្រើខ្លះទៅ ព្រោះឡេជួយការពារស្បែកបានច្រើនយ៉ាងណាស់។ ការជ្រើសរើសឡេដែលត្រឹមត្រូវសម្រាប់អាកាសធាតុត្រជាក់គឺពិតជាសំខាន់។ អ្នកគួរតែជ្រើសរើសឡេដែលផ្ដល់សំណើមខ្លាំងប្រភេទបែប moisturizers ព្រោះឡេបែបនេះនឹងផ្ដល់សំណើមការពារស្បែកកុំឲ្យជ្រីវជ្រួញ ជាពិសេសក្នុងអាកាសធាតុត្រជាក់បែបនេះ។ បើទោះបីជាថ្ងៃខ្លះមេឃស្រទុំត្រជាក់ក៏ពិតមែន តែអ្នកក៏ត្រូវប្រើប្រាស់ ឡេការពារកំដៅថ្ងៃ (Sun cream)ផងដែរ ព្រោះឡេប្រភេទនេះសំខាន់បំផុតសម្រាប់សុខភាពស្បែកនៅពេលដែលអ្នកត្រូវចេញទៅក្រៅម្តងៗ។
2/ ការសំអាតខ្លួនប្រាណ
មេឃត្រជាក់ហើយ មិនសូវបែកញេីសទេ អញ្ចឹងមួយថ្ងៃមុជទឹកតែពីរដងអីបានហើយ។ ការមុជទឹកច្រើនក៏អាចធ្វើឲ្យស្បែកឆាប់ស្ងួតដែរ។ ជាក់ស្តែង ប្រសិនបើអ្នកប្រើប្រាស់សាប៊ូដុសខ្លួន ឬ សាប៊ូលាងមុខ ដែលជាប្រភេទមានជាតិកាត់ស្បែកអោយស នោះកាន់តែគ្រោះថ្នាក់ ព្រោះសាប៊ូប្រភេទនេះធ្វើឲ្យស្បែកស្ងួតខ្លាំងណាស់។ ដូច្នេះការកាត់បន្ថយការមុជទឹកក៏អាចការពារកុំឲ្យស្បែកស្ងួតបានផងដែរ។ សម្រាប់អ្នកមុជទឹកក្តៅ សូមកុំមុជទឹកដែលមានកំដៅខ្លាំងពេក ព្រោះវាប៉ះពាល់ដល់ជាលិកាស្បែក ដែលអាចបណ្តាលអោយរលាក ឬស្រអាប់ខ្លាំង។ ជាការអនុវត្តបានល្អនោះ សូមមុជទឹកក្នុងសីតុណ្ណភាពល្មម ហើយក្រោយពីមុជទឹកក្តៅហើយ អ្នកក៏គួរតែមុជទឹកត្រជាក់វិញផង ដើម្បីឱ្យស្បែកបិទរន្ធញេីសបានល្អវិញ។
3/ ការស្លៀកពាក់
កុំចង់ស្លៀកខ្លីចេញស្បែកអី ព្រោះអាកាសធាតុត្រជាក់ណាស់។ ទោះអ្នកលាបឡេខ្លាំងឬច្រើនប៉ុណ្ណាក៏ដោយ ក៏មិនអាចការពារស្បែកមិនឲ្យស្ងួតបានដែរប្រសិនបើអ្នកនៅតែស្លៀកខោរអាវវាលៗនោះ។ ការស្លៀកពាក់ខោអាវដៃវែងជើងវែងមិនត្រឹមតែការពារអ្នកមិនឲ្យត្រជាក់នោះទេ ថែមទាំងការពារស្បែករបស់អ្នកមិនឱ្យជ្រីវជ្រួញដោយសារការត្រូវខ្យល់ផងដែរ។
4/ ការញ៉ាំទឹក
ទឹកពិតជាសំខាន់ណាស់មិនថាពេលអាកាសធាតុត្រជាក់ឬខាងក្តៅឡើយ។ មេឃត្រជាក់ធ្វើអោយអ្នកមិនសូវស្រេកទឹកទេ តែអ្នកត្រូវចាំថាអ្នកត្រូវផឹកទឹកអោយបានយ៉ាងតិច មួយលីត្រកន្លះ ឬ 2 លីត្រក្នុងមួយថ្ងៃ ដើម្បីឲ្យសុខភាពស្បែករបស់អ្នកនៅតែស្រស់ស្អាតរលោង។ ប្រសិនបើភ្លេចផឹកទឹក អ្នកក៏អាចធ្វើការកំណត់ក្នុងទូរស័ព្ទដៃ ដើម្បីជាការរំលឹកអោយអ្នកផឹកទឹក។
5/ របបអាហារ
សូមរក្សាការញ៉ាំបន្លែ ផ្លែឈេី និងសាច់អោយបានគ្រប់គ្រាន់ព្រោះសុខភាពស្បែដែលស្អាតគឺចេញមកពីខាងក្នុងមិនមែនស្អាតដោយសារការលាបឡេតែខាងក្រៅនោះទេ។ របបអាហារត្រឹមត្រូវនិងផ្ដល់សំណើមដល់សុខភាពស្បែកបានល្អ និងធ្វើអោយអ្នកមានសុខភាពល្អ ពោរពេញដោយអារម្មណ៍ស្រស់ស្រាយផងដែរ។
លោកអ្នកអាចសាកល្បងតិចនិកទាំងនេះបាន ហើយប្រសិនបើមានប្រសិទ្ធភាពសូមចែករំលែកទៅកាន់មិត្តភក្តិផង៕