Apple មានគោលដៅផលិតរថយន្តគ្មានមនុស្សបើកដំបូង នៅឆ្នាំ2024

បរទេស៖ សារព័ត៌មានReuters បានរាយការណ៍ថា ក្រុមហ៊ុន Apple កំពុងតែបោះជំហានទៅរកការផលិតរថយន្តនៅឆ្នាំ2024 ក៏ដូចជាការបង្កើតប្រព័ន្ធបើកបរដោយខ្លួនឯង និងបច្ចេកវិទ្យាថាមពលថ្មដ៏ខ្លាំងក្លាផងដែរ។ គេមិនច្បាស់ទេថាបច្ចេកវិទ្យាទាំងអស់នេះនឹងត្រូវដាក់ចូលទៅក្នុងរថយន្តដំបូងដែលក្រុមហ៊ុន Apple ផលិត ប៉ុន្តែវាបង្ហាញថាក្រុមហ៊ុន Apple កំពុងពិចារណាលើការផលិតរថយន្ត បន្ទាប់ពីបានបិទផែនការផលិតរថយន្តនេះកាលពីលើកមុន។

នៅឆ្នាំ2016 គម្រោងផលិតឡានរបស់ Apple ត្រូវបានលុបចោល ហើយក្រុមហ៊ុន Apple បានផ្តោតការយកចិត្តទុកដាក់ទៅលើការបង្កើត software ដែលអាចឱ្យក្រុមហ៊ុនផលិតរថយន្តផ្សេងៗទិញអាជ្ញាប័ណ្ណពី Apple វិញ។

ឥឡូវនេះក្រុមហ៊ុន Apple បានបង្វែរការយកចិត្តទុកដាក់សាជាថ្មីលើការផលិតយានយន្តវិញហើយ ទោះបីជាមានភាពមិនប្រាកដប្រជាថាវានឹងកើតឡើងពេលណាក៏ដោយ។ សារព័ត៌មានReuters បាននិយាយថាឆ្នាំ2024 គឺជាគោលដៅផលិតរថយន្តរបស់ក្រុមហ៊ុន Apple ទោះបីជាវាអាចត្រូវបានពន្យារដល់ឆ្នាំ2025 ឬយូរជាងនេះដោយសារតែជំងឺកូវិដរាតត្បាត។

របាយការណ៍បាននិយាយថាក្រុមហ៊ុន Apple នឹងពឹងផ្អែកលើភាគីទីបី ដើម្បីផ្គត់ផ្គង់នូវសមាសធាតុមួយចំនួននៃបច្ចេកវិទ្យាបើកបរដោយខ្លួនឯង រួមទាំងប្រព័ន្ធ LIDAR ផងដែរ។ ចំណែកបច្ចេកវិទ្យាថ្មរបស់ក្រុមហ៊ុន Apple ត្រូវបានគេរាយការណ៍ថា នឹងមានការរចនាបែប“monocell”។ ក្រុមហ៊ុន Apple បានបដិសេធមិនធ្វើការអត្ថាធិប្បាយ។

មានរបាយការណ៍មួយទៀតមកពីកាសែត the Economic Daily News នៅតៃវ៉ាន់បាននិយាយថា រថយន្តដែលផលិតដោយក្រុមហ៊ុន Apple អាចនឹងត្រូវបញ្ចេញឆាប់ៗនៅឆ្នាំ2021 បើពិតមែននោះវាគឺជាពេលវេលាដ៏លឿនមួយគួរឱ្យភ្ញាក់ផ្អើល៕