McTominay បំបែកកំណត់ត្រាពិសេសមួយក្រោយជួយ Man UTD លត់ Leeds ៦ ទល់នឹង ២យប់មិញ(មានវីដេអូ)

អង់គ្លេស៖ កាលពីថ្ងៃអាទិត្យឈានចូលថ្ងៃច័ន្ទកន្លងទៅនេះ ក្លិបបិសាចក្រហម Manchester United បានបើកទ្វារកីឡដ្ឋាន Old Trafford ស្វាគមន៍ក្រុមភ្ញៀវក្ងោកស Leeds United ក្នុងជំនួបនៃក្របខណ្ឌ Premier League បន្ទាប់ពីក្រុមទាំង២នេះខានជួបគ្នាជាង១៦ឆ្នាំមកហើយ។

ក្នុងនោះដែរ Man UTD បានបង្កភាពភ្ញាក់ផ្អើលដល់អ្នកគាំទ្រព្រមទាំងអ្នកវិភាគបាល់ទាត់ទាំងអស់នៅពេលពួកគេអាចយកឈ្នះ Leeds ក្នុងលទ្ធផល ៦ ទល់នឹង ២ ដែលធ្វើឲ្យផ្ទុះការសរសើរគគ្រឹគគគ្រេងហើយកីឡាករដែលពួកគេកត់សម្គាល់ខ្លាំងគឺ Scott McTominay ដែលបានរួមចំណែកស៊ុត២គ្រាប់ដោយចំណាយពេលត្រឹមតែ៣នាទីដែលធ្វើឲ្យរូបគេបំបែកកំណត់ត្រាក្លាយជាកីឡាករដំបូងបង្អស់អាចរកគ្រាប់បាល់បាន២គ្រាប់ក្នុងរយៈពេល៣នាទីដំបូងនៃការប្រកួតក្នុងក្របខណ្ឌ Premier League នេះ។

២គ្រាប់ដំបូងរបស់ខ្សែបម្រើ Mctominay កើតឡើងនៅនាទីទី ២ និងនៅនាទីទី៣ ខុសគ្នាមិនដល់១នាទីផងដោយរូបគេបានស៊ុតបាល់កោងពីចម្ងាយ មុននឹងស៊ុតមួយជើងស្ដាំទៀតក្រោយអូសបាល់កាត់មុខខ្សែការពារ Leeds យ៉ាងលឿន។

នៅនាទីទី២០ ខ្សែបម្រើឆ្នើមដែលទើបតែឈ្នះពានរង្វាន់កីឡាករល្អបំផុតប្រចាំខែវិច្ឆិកាគឺ Bruno Fernandes បានស៊ុតទម្លុះសំណាញ់អ្នកចាំទី Meslier ដោយមានការបញ្ជូនពី Anthony Martial ហើយនៅនាទីទី៣៧ ខ្សែការពារ Victor Lindelof ដាក់មួយជើងស្តាំពេលមិត្តរួមក្រុមទាត់បាល់ជ្រុង ជួយឲ្យ Man UTD កាន់តែមានសង្ឃឹមក្នុងការយកឈ្នះ។

ការប្រកួតកាន់តែក្ដៅគគុកពេលក្រុមក្ងោកស Leeds United ចាប់ផ្ដើមវាយបកទៅវិញដោយនៅនាទីទី ៤១ប្រធានក្រុម Liam Cooper ហក់តែងបញ្ចូលទីក្រោយ Raphinha ទាត់បាល់ជ្រុង ដោយសរុបលទ្ធផលនៅតង់ទី១គឺ ៤ ទល់នឹង ១។

តង់ទី២ចាប់ផ្ដើមបាន២០នាទីជាង ភាគទីទាំង២មានឱកាសសម្រុកស៊ុតដូចគ្នា ប៉ុន្តែកីឡាកររបស់ Manchester United ម្នាក់គឺខ្សែបម្រើ Daniel James ត្រូវអជ្ញាកណ្ដាលផ្ដល់កាតលឿង តែនាទីទី៦៦ គេនេះហើយដែលអូសបាល់កាត់ខ្សែការពាររបស់ Leeds ម្នាក់ឯងនិងស៊ុតទម្លុះសំណាញ់ទីបានសម្រេចដោយមានការបញ្ជូនបាល់ពី McTominay ។

នៅនាទីទី៧០ កីឡាករម្នាក់របស់ Leeds បានបង្កកំហុសទាក់ជើង Anthony Martial ឲ្យដួលក្នុងប្រអប់គ្រោះថ្នាក់ទើបលោកអជ្ញាកណ្ដាលសម្រេចផ្ដល់បាល់ប៉េណាល់ទីដល់បិសាចក្រហមដែលពេលនោះហើយ ខ្សែបម្រើ Bruno Fernandes ដាក់មួយជើងស្ដាំ១គ្រាប់ទៀត។

ខ្សែការពារម្នាក់របស់ Leeds កីឡាករ Stuart Dallas មានឱកាសបានស៊ុតមួយជើងស្ដាំទម្លុះសំណាញ់អ្នកចាំទីសញ្ជាតិអេស្ប៉ាញ David De Gea នៅនាទីទី៧៣ដែរតែមិនអាចជួយឲ្យក្រុមយកឈ្នះបិសាចក្រហម Man UTD ឡើយ។

លទ្ធផលនៃការប្រកួត ៦ ទល់នឹង ២ នេះចាត់ទុកថាជាជ័យជម្នះដ៏ធំធេងរបស់ Manchester United ដែលធ្វើឲ្យក្លិបឡើងមកឈរនៅលេខ៣ក្នុងតារាង Premier League និងមាន២៦ពិន្ទុក្នុងដៃដោយចាញ់ក្លិបហង្សក្រហម Liverpool ដែលជាមេធំក្នុងតារាងតែ ៥ ពិន្ទុប៉ុណ្ណោះ៕

សូមទស្សនាវីដេអូការប្រកួតខាងក្រោម៖

ប្រភព៖ mirror