អង់គ្លេស៖ ក្លិបបិសាចក្រហម Manchester United នឹងផ្ដល់កុងត្រាថ្មីដល់ខ្សែប្រយុទ្ធ Marcus Rashford ខណៈដែលផ្ទុះពាក្យចចាមអារ៉ាមថា ក្លិបយក្សនៅអេស្ប៉ាញទាំងពីរគឺ Real Madrid និង Barcelona កំពុងដាក់រ៉ាដាចង់បានរូបគេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមសេចក្ដីរាយការណ៍ ក្លិប Man UTD នឹងចាប់ផ្ដើមបើកការពិភាក្សាចរចាលើការបន្តកុងត្រាថ្មីដល់ Rashford នៅដើមឆ្នាំ២០២១ នេះក្នុងគោលបំណងចង់ចងជើងរូបគេឲ្យស្នាក់នៅទឹកដីកីឡដ្ឋាន Old Trafford ឲ្យបានយូរអង្វែង ខណៈដែលកុងត្រាបច្ចុប្បន្នរបស់ Rashford នឹងមានសុពុលភាពរហូតដល់ឆ្នាំ២០២៣អមជាមួយលក្ខខណ្ឌអាចបន្តកុងត្រា១២ខែទៀតឯណោះ។
ក្លិបយក្សធំៗនៅអឺរ៉ុបកំពុងបង្ហាញការចាប់អារម្មណ៍ចំពោះខ្សែប្រយុទ្ធសញ្ជាតិអង់គ្លេសរូបនេះ អ៊ីចឹងហើយ Man UTD ចង់ផ្ដល់រង្វាន់ពិសេសដល់រូបគេ។ ម្យ៉ាងទៀតថ្មីៗនេះ Rashford ក៏បានប្រកាសដែរថា រូបគេចង់ស្នាក់នៅបន្តជាមួយ ក្លិបបិសាចក្រហមរហូតទាល់តែបញ្ចប់អាជីពជាកីឡាករបាល់ទាត់និងថែមទាំងនិយាយទៀតថាគេស្រមៃរូបភាពខ្លួនឯងពាក់អាវក្រុមផ្សេងក្រៅពី Manchester United មិនចេញទេ។
Marcus Rashford ជាកីឡាករដែលរកគ្រាប់បាល់បានច្រើនបំផុតឲ្យ Man UTD រដូវកាលនេះដោយស៊ុតបញ្ចូលទីបាន១២គ្រាប់ហើយ គីតគ្រប់កម្មវិធីទាំងអស់ ព្រមទាំងបញ្ជូនបាល់ឲ្យមិត្តរួមក្រុមបាន៤គ្រាប់ផងដែរធ្វើឲ្យគេបានក្លាយទៅជាកីឡាករស្នូលដ៏សំខាន់របស់ក្រុមលោកគ្រូបង្វឹកសញ្ជាតិន័រវេស Ole Gunnar Solskjaer ជាពិសេសគឺនៅក្នុងការប្រកួតទល់នឹង Sheffield United ដែល Rashford ស៊ុតយក២គ្រាប់នាំជោគនាំជ័យឲ្យ Man UTD ។
ក្រៅពីអាជីពជាកីឡាករបាល់ទាត់ Rashford ក៏បានចូលរួមយ៉ាងសកម្មក្នុងយុទ្ធនាការណ៍ប្រឆាំងនឹងភាពអត់ឃ្លាននិងលើកកម្ពស់ជីវភាពរស់នៅរបស់ក្មេងៗរស់នៅប្រទេសអង់គ្លេសថែមទៀតផង។
ដោយសារតែគេជាមនុស្សមានទឹកចិត្តនិងស្មោះត្រង់បូកផ្សំនឹងសមត្ថភាពលេងបាល់លើវាលស្មៅផងនោះទើប ក្លិប Man UTD ចង់ផ្ដល់កុងត្រាថ្មីដែលមានរយៈពេល៥ឆ្នាំបន្ថែមទៀតដែលអាចឲ្យ Rashford ទទួលបានប្រាក់ចំនួន ៣សែនផោន (ស្មើនឹងប្រមាណ៤សែនដុល្លារ)ក្នុងមួយសប្តាហ៍ ខណៈក្លិបអធិរាជស Real Madrid និង ក្លិបអ្នកមានបុណ្យ FC Barcelona ព្រមទាំងក្លិបសេដ្ឋី Paris Saint-Germain សុទ្ធតែចាប់អារម្មណ៍ចង់យក Rashford មកចូលរួមជាមួយក្រុមរបស់ពួកគេ នេះបើយោងទៅតាមការរាយការណ៍ពី Daily Star។
Marcus Rashford ត្រូវបានគេរំពឹងទុកថានឹងក្លាយជាកីឡាករដ៏សំខាន់ក្នុងការជួយ Man UTD លេង UCL រដូវកាលក្រោយនេះ ទើបលោកប្រធានរងរបស់ក្លិបគឺ Ed Woodward ចង់ចងជើងរូបគេមុននឹងក្លិបផ្សេងៗជាច្រើនទៀតដេញតាមយក។
គួរបញ្ជាក់ផងដែរថាតាំងពីបង្ហាញខ្លួននៅ Man UTD ជម្រើសជាតិអង់គ្លេស Rashford រកបាន៧៩គ្រាប់ ក្នុងការប្រកួតចំនួន២៣៤លើក៕
ប្រភព៖ express