ឃើញមិនសូវបានលេង!Arsenal ដាក់គោលដៅតាមយកកីឡាករ Real Madrid ម្នាក់នេះ

អង់គ្លេស៖ យោងតាមសេចក្ដីរាយការណ៍បានឲ្យដឹងថា លោកគ្រីបង្វឹក Mikel Arteta នៃក្លិបកាំភ្លើងធំ Arsenal កំពុងដាក់រ៉ាដាសម្លឹងមើលខ្សែបម្រើម្នាក់របស់់ក្លិបអធិរាជស Real Madrid កីឡាករ Isco Alarcon ពេលទីផ្សារដោះដូរកីឡាករនៅខែមករាបើកទ្វារវិញ។

ពេលនេះ Arsenal កំពុងត្រូវការកីឡាករខ្សែបម្រើមកពង្រឹងតំបន់បម្រើខ្លាំងណាស់ ព្រោះទម្រង់លេងរបស់ក្លិបស្ថិតក្នុងស្ថានភាពដុនដាបដោយរកបានតែ១១គ្រាប់ក្នុងការប្រកួតទាំង១៣លើកនៅ Premier League រដូវកាលថ្មីនេះ។

អ្នកដឹកនាំផ្នែកកីឡារបស់ Arsenal គឺលោក Edu បានបញ្ជាក់ហើយថាសប្តាហ៍នេះក្លិបពិតជាត្រូវការកីឡាករមកបម្រើតំបន់កណ្ដាលពិតមែនបន្ទាប់ពីលោកគ្រូ Mikel Arteta មិនដាក់ឈ្មោះ Mesut Ozil ឲ្យចូលលេង។

Team Talk បានអះអាងថា លោកគ្រូបង្វឹកសញ្ជាតិអេស្ប៉ាញម្នាក់នេះចង់បានខ្សែបម្រើ Isco រួមជាមួយខ្សែបម្រើរបស់ Lyon ម្នាក់ទៀតគឺ Houssem Aouar ប៉ុន្តែ ក្លិបអាចយកបានតែមួយប៉ុណ្ណោះព្រោះប្រាក់ក្នុងហោប៉ៅមានកំណត់។

ភ្នាក់ងាររបស់ Isco Alarcon ធ្លាប់បានចេញមុខនិយាយថា កីឡាករវ័យ២៨ឆ្នាំរូបនេះពិតជាចង់ស្វែងរកការប្រកួតប្រជែងនៅក្រៅប្រទេសអេស្ប៉ាញពិតមែន ទើបក្លិប Arsenal ចាប់ផ្ដើមតាមសម្លឹងមើលរូបគេ។

គួរបញ្ជាក់ផងដែរថា Isco ដែលទើបបានចូលលេង៣ប្រកួតឲ្យ Real Madrid នៅរដូវកាលនេះអាចនឹងទទួលយកសំណើរបស់ Arsenal និង Manchester City ប៉ុន្តែបញ្ហាចម្បងគឺកុងត្រារបស់គេជាមួយ Real Madrid នៅមានសុពុលភាពរហូតដល់ឆ្នាំ២០២២ ៕

ប្រភព៖ thesun