ក្រសួងសុខាភិបាលថ្មីៗ បានប្រកាសពីលទ្ធផលតេស្តវិជ្ជមានថ្មីជាប់ៗគ្នាសរុប ១៦ករណីពាក់ព័ន្ធព្រឹត្តិការណ៍សហគមន៍ ២៨វិច្ឆិកា ដែលធ្វើឲ្យចំនួនអ្នកឆ្លងក្នុងសហគមន៍សរុបឡើងដល់ ១៧នាក់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រៅពីនោះ នៅមានបុគ្គលពាក់ព័ន្ធជាច្រើនទៀតដែលត្រូវធ្វើចត្តាឡីស័ក ដោយសារអ្នកទាំងនោះមានទំនាក់ទំនងទាំងផ្ទាល់និងប្រយោលជាមួយអ្នកជំងឺ (ភរិយាឯកឧត្តម ឆែម សាវុធ)។
ឆ្លើយតបទៅនឹងស្ថានភាពនេះ អ្នកនាំពាក្យ និងជារដ្ឋលេខាធិការក្រសួងសុខាភិបាល លោកស្រី ឱ វណ្ណឌីន បានស្នើឲ្យអ្នកពាក់ព័ន្ធផ្ទាល់នឹងបុគ្គលមានកូវីដ១៩ មានភាពស្មោះត្រង់ក្នុងការរាយការណ៍ ដើម្បីរកប្រភពចម្លងកូវីដ១៩ ឲ្យបានលឿន។
លោកស្រី ឱ វណ្ណឌីន៖ «បងប្អូនអ្នកប៉ះពាល់ផ្ទាល់ទាំងអស់ សូមឲ្យមានភាពស្មោះត្រង់ ក្នុងការរាយការណ៍ព័ត៌មានផ្សេងៗ ដែលពាក់ព័ន្ធនឹងទំនាក់ទំនង ដើម្បីរកប្រភពចម្លងកូវីដ១៩ ឲ្យបានលឿន។ កាលណា យើងទុកការរុករកនេះកាន់តែយូរ យើងរកក្រឃើញ ចឹងលទ្ធភាពនៃការចម្លងក៏មានលក្ខណៈទ្រង់ទ្រាយពិបាក ដែលយើងពិបាកស្មាន ថាតើទំហំនៃការចម្លងនឹងមានកម្រិតប៉ុណ្ណា!»
សូមបញ្ជាក់ថា ព្រឹត្តិការណ៍ ២៨វិច្ឆិកា មានករណីអ្នកឆ្លងសរុប ១៧នាក់។ បើតាមក្រសួងសុខាភិបាល មកទល់ពេលនេះ ខ្លួនបានធ្វើតេស្តអ្នកពាក់ព័ន្ធចំនួន ៧,១៣១នាក់ ក្នុងចំណោមអ្នកត្រូវធ្វើតេស្តសរុប ៨,២១២នាក់។ ហើយនៅថ្ងៃ ២ធ្នូនេះ នឹងធ្វើតេស្តបន្តអ្នកនៅសល់ចំនួន ១,០៨១នាក់បន្ថែមទៀត។
គិតត្រឹមថ្ងៃ ០២ ធ្នូនេះ កម្ពុជាមានករណីកូវីដ ១៩ សរុបចំនួន ៣២៩នាក់ (រកឃើញករណីវិជ្ជមានថ្មី ០៣នាក់ទៀត នាំចូលមកពីក្រៅប្រទេស) និងសះស្បើយ ៣០៤៕