ស្ងាត់ៗ លោក គីម ជុងអ៊ុន និងមន្ត្រីជាន់ខ្ពស់កូរ៉េខាងជើងជាច្រើននាក់ទៀត បានទទួលការចាក់វ៉ាក់សាំងកូវីដ១៩ រួចជាស្រេច

កូរ៉េខាងជើង៖ យោងតាម​ការចុះផ្សាយរបស់សារពត៌មាន Reuters បានឱ្យដឹងថា លោក គីម ជុងអ៊ុន រួមជាមួយក្រុមគ្រួសារ ក៏ដូចជាមន្ត្រីជាន់ខ្ពស់កូរ៉េខាងជើងជាច្រើននាក់ បានទទួលការចាក់វ៉ាក់សាំងការពារជំងឺកូវីដ១៩ តាំងតែពី ២-៣ សប្តាហ៍មុន ក្រោមការឧបត្ថម្ភពីសម្ព័ន្ធមិត្តចិន។

យ៉ាងណាមិញ គេនៅមិនទាន់ដឹងច្បាស់ទេ ថាតើថ្នាំវ៉ាក់សាំងការពារនេះ ផលិតចេញដោយក្រុមហ៊ុនចិនមួយណា ហើយ​មានប្រសិទ្ធិភាពឬ​ក៏យ៉ាងណា។ គួរឱ្យដឹងផងដែរថា យ៉ាងហោចណាស់មានក្រុមហ៊ុនឱសថចិនចំនួន ៣ កំពុងបង្កើតវ៉ាក់សាំងការពារកូវីដ១៩ ដោយក្នុងនោះរួមានក្រុមហ៊ុន Sinovac Biotech Ltd, CanSinoBio និងក្រុមហ៊ុន Sinophram Group។

គួរបញ្ជាក់ថា មកទល់ឥឡូវនេះ ប្រទេសកូរ៉េខាងជើងមិនទាន់បានបញ្ជាក់ពីការរីករាលដាលនៃជំងឺឆ្លង​កូវីដ១៩នៅឡើយទេ។ ប៉ុន្តែទីភ្នាក់ងារស៊ើបការណ៍សម្ងាត់ជាតិរបស់ប្រទេសកូរ៉េខាងត្បូងបាននិយាយថា ការផ្ទុះឡើងនៃ​ជំងឺនេះពិតជាមាន ព្រោះថា​កូរ៉េខាងជើងមានការដោះដូរពាណិជ្ជកម្ម និងមានការបញ្ជូន​ ដោះដូរប្រជាជនចុះឡើងជាមួយនឹងចិន មុននឹងសម្រេចបិទព្រំដែនរបស់ខ្លួននៅចុងខែមករាដើមឆ្នាំនេះ៕