សម្តេចនាយករដ្ឋមន្ត្រី ហ៊ុន សែន នៅថ្ងៃ ៣០វិច្ឆិកានេះ បានបញ្ចេញសារជាសំឡេងតាមតេលេក្រាម ដោយប្រាប់ឲ្យមន្ត្រីពាក់ព័ន្ធផ្សាយដំណឹងលើវិធានការផ្អាករាល់ការជួបជុំដែលមានមនុស្សច្រើន រាប់ទាំងអាពាហ៍ពិពាហ៍ផង រយៈពេល ១៥ថ្ងៃជាបណ្តោះអាសន្ន ទាំងនៅភ្នំពេញ និងសៀមរាប។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនាយករដ្ឋមន្ត្រី៖ «ហាមការជួបជុំតែម្តង! ចាប់ពីថ្ងៃទី ១ ដល់ ១៥ ឬ ១៦ធ្នូ ហាមមិនឲ្យមានការជួបជុំ ទោះការជួបជុំណាក៏ដោយ រាប់ទាំងអាពាហ៍ពិពាហ៍ដែរ ទាំងនៅភ្នំពេញ និងខេត្តសៀមរាប។»
សម្តេចបន្តថា៖ «សូមអនុវត្តបន្ទាន់ចាប់ពីពេលទទួលបទបញ្ជានេះទៅ។ មនុស្សលើសពី ២០នាក់ គឺមិនត្រូវមានការជួបជុំទេ។ តែបើ ២០នាក់ចុះក្រោម គឺត្រូវមានគម្លាតឲ្យឆ្ងាយពីគ្នា។ យើងមិនហាមឃាត់រឿងចេញក្រៅផ្ទះទេ តែសូមកុំឲ្យមានការកកស្ទះ ហើយសូមកាត់បន្ថយការចេញក្រៅផ្ទះ។ បើមិនធ្វើថ្ងៃនេះទេ គឺយើងនឹងយឺតពេល»។
សូមបញ្ជាក់ថា ថ្មីៗសម្តេចនាយករដ្ឋមន្ត្រី បានបង្ហើបពីការបញ្ចេញសាច់ប្រាក់ ខ្ទង់ពាន់លានដើម្បីជួយដល់គ្រួសារក្រីក្រ ដែលត្រូវធ្វើចត្តាឡីស័ក។
សម្តេច៖ «ព្រឹកមិញនេះ ខ្ញុំសំរេចឱ្យបញ្ចេញសាច់ប្រាក់ជាង ១០០០លានរៀល ជូនទៅរាជធានី ខេត្តនៅទូទាំងប្រទេសសម្រាប់ជួយដល់គ្រួសារក្រីក្រ ដែលត្រូវធ្វើចត្តាឡីស័ក។ គ្រួសារនីមួយៗនឹងទទួលបាន ២ម៉ឺនរៀលក្នុងមួយថ្ងៃ ដែលមានរយៈពេល ១៥ថ្ងៃ។ ថវិកាសរុបទទួលបាន ៣០ម៉ឺនរៀលក្នុងមួយគ្រួសារ»។
ជាការកត់សម្គាល់ ក្រសួងសុខាភិបាល បានប្រកាសពីលទ្ធផលតេស្តវិជ្ជមាន ៨ករណីបន្ថែមទៀតពីព្រឹត្តិការណ៍សហគមន៍ ២៨វិច្ឆិកា ដែលធ្វើឲ្យចំនួនសរុបឡើងដល់ ១៤នាក់ រីឯលទ្ធផល ២២៣៤នាក់អវិជ្ជមាន។
គិតមកទល់ថ្ងៃ ៣០វិច្ឆិកានេះ កម្ពុជាមានករណីកូវីដ ១៩ ចំនួន ៣២៣នាក់ និងសះស្បើយ ៣០១៕