អាយុថ្លៃមែន! បុរសម្នាក់ សំងំតោងទូកដែលស្ទើរតែលិចចូលសមុទ្រអស់រយៈពេលជិត២ថ្ងៃ ត្រូវបានគេជួយសង្គ្រោះ

សហរដ្ឋអាមេរិក៖ បុរសអាមេរិកម្នាក់ ដែលបានបាត់ខ្លួនអស់រយៈពេលជិត២ថ្ងៃ នៅឯកំពង់ផែ Canaveral នៃឆ្នេររដ្ឋផ្លរីដា ត្រូវគេរកឃើញថានៅមានជីវិត បន្ទាប់ពីលោកខំព្យាយាមតោងជាប់នឹងទូក ដែលលិចស្ទើរតែស្រុងចូលក្នុងសមុទ្រ នៅចម្ងាយប្រហែល ១៣៨គឺឡូម៉ែត្រពីច្រាំង។

យោងតាមឆ្មាំសមុទ្រសហរដ្ឋអាមេរិកបានឲ្យដឹងថា លោក Stuart Bee វ័យ៦២ឆ្នាំ បានបាត់ខ្លួនជាមួយទូកប្រវែង ៣២ហ្វីត (ឬប្រហែល២៨ម៉ែត្រ) បន្ទាប់ពីគាត់បានចេញដំណើរនៅវេលាម៉ោង​ ៤:០០នាទីរសៀលកាលពីថ្ងៃសុក្រ។ ហើយក្រុមគ្រួសាររបស់គាត់ បានរាយការណ៍ដំណឹងនេះ នៅពេលមិនឃើញគាត់វិលត្រលប់មកវិញ ព្រោះជាធម្មតាគាត់មិនដែលស្នាក់នៅលើទឹករយៈពេលលើស ២៤ម៉ោងបែបនេះទេ។

យ៉ាងណាមិញ ក្រុមឆ្មាំសមុទ្របានចុះល្បាត ហើយថែមទាំងបានបញ្ជូនយន្ដហោះមួយគ្រឿង ដើម្បីចូលរួមក្នុងការរុករកនេះ។ លុះដល់វេលាម៉ោង ១១:០០នាទីព្រឹកថ្ងៃអាទិត្យ សមាជិកនៃនាវាដឹកទំនិញធំមួយ ក៏បានប្រទះឃើញលោក Bee នៅតោងជាប់លើទូកកម្សាន្ដរបស់គាត់ ដែលតួនៃទូកទាំងមូលស្ទើរតែលិចបាត់ចូលក្នុងទឹកសមុទ្រទៅហើយ។ បន្ទាប់មក ពួកគេបានជួយសង្គ្រោះគាត់ និងនាំគាត់ទៅដល់ច្រាំងវិញ ដោយសុវត្ថិភាពផងដែរ។

គួរឲ្យដឹងថា ទូកកម្សាន្ដរបស់លោក Bee ចាប់ផ្ដើមមានបញ្ហាម្ដងម្កាលនៅថ្ងៃសៅរ៍ ដោយសារបញ្ហាផ្នែកមេកានិក។ ហើយរហូតដល់កណ្ដាលអាធ្រាត្រថ្ងៃអាទិត្យ ទឹកបានហូរចូលក្នុងកាប៊ីន បណ្ដាលឲ្យទូកនោះចាប់ផ្ដើមលិច ពោលគឺលិចនៅសល់ចុងទូកបន្ដិចប៉ុណ្ណោះ៕

សូមទស្សនារូបភាពខាងក្រោម៖