អ៊ីរ៉ង់៖ ក្រោយពីអ្នកជំនាញកំពូលផ្នែកវិទ្យាសាស្ត្រនុយក្លេអ៊ែររអ៊ីរ៉ង់គឺលោក ម៉ូហ៍សេន ហ្វាគ្រីហ្សាដេហ៍ ត្រូវបានគេធ្វើឃាត លោក អាន់តូនីញ៉ូ ហ្គូដទែរ៉េស ជាអគ្គលេខាធិការអង្គការសហប្រជាជាតិបានអំពាវនាវឱ្យគ្រប់គ្នារក្សាភាពអត់ធ្មត់។ នេះបើតាមអ្នកនាំពាក្យរបស់អង្គការសហប្រជាជាតិ ចុះផ្សាយដោយសារព័ត៌មាន CNN នៅថ្ងៃទី២៨ ខែវិច្ឆិកា ឆ្នាំ២០២០ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ការអំពាវនាវរបស់ប្រមុខអង្គការសហប្រជាជាតិ តាមរយៈអ្នកនាំពាក្យរបស់ខ្លួនខាងលើនេះ បានកើតមានឡើងក្រោយអ្នកជំនាញកំពូលផ្នែកវិទ្យាសាស្ត្រនុយក្លេអ៊ែររអ៊ីរ៉ង់លោក ម៉ូហ៍សេន ហ្វាគ្រីហ្សាដេហ៍ បានបាត់បង់ជីវិតនៅថ្ងៃសុក្រនេះ នៅក្នុងការវាយប្រហារមួយនៅខាងក្រៅទីក្រុងតេហេរ៉ង់ ខណៈអ៊ីរ៉ង់បានចោទប្រកាន់ហេតុការនេះថាជាស្នាដៃរបស់អ៊ីស្រាអែល និងព្រមានអំពីការសងសឹកធ្ងន់ធ្ងរតបតវិញ។
យ៉ាងណាមិញអ្នកនាំពាក្យរបស់លោក អាន់តូនីញ៉ូ ហ្គូដទែរ៉េស បានលើកឡើងថា៖ «ថ្ងៃនេះយើងបានទទួលដំណឹងថា អ្នកជំនាញកំពូលផ្នែកវិទ្យាសាស្ត្រនុយក្លេអ៊ែររអ៊ីរ៉ង់ ត្រូវបានគេធ្វើឃាតស្ថិតនៅក្បែរទីក្រុងតេហេរ៉ង់…។ យើងសូមជម្រុញឱ្យគ្រប់គ្នារក្សាភាពអត់ធ្មត់ ហើយត្រូវជៀសវាងការធ្វើសកម្មភាពណាមួយ ដែលអាចនាំទៅរកការផ្ទុះភាពតានតឹងខ្លាំងឡើងនៅក្នុងតំបន់»៕
Bong I.T