ម៉ូស្គូ៖ ក្រសួងការពារជាតិរុស្ស៊ីនិយាយថា នាវាចម្បាំងរុស្ស៊ីមួយគ្រឿងបានបើកបណ្តេញនាវាពិឃាដរបស់កងទ័ពជើងទឹកអាមេរិក បន្ទាប់ពីពួកគេបើករំលោភចូលក្នុងដែនទឹកប្រទេសរុស្ស៊ី កាលពីថ្ងៃអង្គារ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សទីក្រុងម៉ូស្គូបានចោទប្រកាន់នាវាពិឃាដ USS John S McCain អាមេរិក ថាបានធ្វើដំណើរឆ្លងកាត់ដែនសមុទ្ររបស់ខ្លួនចម្ងាយ ២គីឡូម៉ែត្រ ហើយក៏បានព្រមានថា នឹងបាញ់កម្ទេចនាវានោះផងដែរ។
ឧប្បត្តិហេតុនេះបានកើតឡើងកាលពីថ្ងៃអង្គារ នៅឯតំបន់ឈូងសមុទ្រ Peter The Great ក្នុងសមុទ្រជប៉ុន ឬហៅថាសមុទ្រខាងកើត ដែលជាព្រំដែនទឹករវាងប្រទេសជប៉ុន រុស្ស៊ី និងឧបទ្វីបកូរ៉េ។
យោងតាមក្រសួងការពារជាតិរុស្ស៊ីបានឱ្យដឹងទៀតថា នាវាចម្បាំងរុស្ស៊ីឈ្មោះថា Admiral Vinogradov បានប្រើប៉ុស្តិ៍បណ្តាញទំនាក់ទំនងអន្តរជាតិ ដើម្បីធ្វើការព្រមានដល់នាវាអាមេរិកឱ្យចេញពីដែនទឹករបស់ខ្លួនជាបន្ទាន់។
គួរជម្រាបថា ឧប្បត្តិហេតុនៅលើសមុទ្របែបនេះគឺកម្រណាស់។ ហើយប្រទេសទាំង២ គឺសហរដ្ឋអាមេរិកនិងរុស្ស៊ី តែងតែចោទប្រកាន់គ្នាទៅវិញទៅមក ថាបានកម្លាំងយោធាដ៏មានគ្រោះថ្នាក់ ក្រោមលេសធ្វើសមយុទ្ធ ទាំងនៅលើសមុទ្រនិងលើអាកាស៕