មិនងាយទេមើលទៅ! Pep ស្នើឲ្យ Man City តាមទិញជើងស៊ុតរបស់ Spurs រូបនេះមកស្នងតំណែង Aguero

អង់គ្លេស៖  បើតាមសេចក្ដីរាយការណ៍របស់កាសែត The Independent របស់អង់គ្លេសបានឲ្យដឹងថាក្រោយសម្រេចចិត្តបន្តកុងត្រាថ្មីជាមួយ Manchester City រហូតដល់ឆ្នាំ២០២៣ លោកគ្រូបង្វឹក Pep Guardiola បានស្នើសុំឲ្យក្លិបនៅ Premier League មួយនេះតាមប្រមាញ់យកខ្សែប្រយុទ្ធឆ្នើម Harry Kane ពីក្លិប Tottenham Hotspur ដើម្បីមកស្នងតំណែងខ្សែប្រយុទ្ធជើងចាស់ Sergio Aguero ។

របាយការណ៍ដូចគ្នានេះបានបន្ថែមទៀតថា Kane អាចនឹងមានភាគរយខ្ពស់ក្នុងការចាកចេញពី Spurs នៅចុងរដូវកាលនេះ ប្រសិនបើក្លិបលោក​ Jose Mourinho នៅតែមិនអាចមានលទ្ធភាពលើកពានសំខាន់ៗណាមួយនោះ។ យ៉ាងណាមិញនៅពេលនេះ Spurs ហាក់ដូចជាមានទម្រង់លេងល្អគួរឲ្យកត់សម្គាល់ ពោលកំពុងឈរកំពូលតារាង Premier League មាន២០ពិន្ទុស្មើនឹងក្លិបហង្សក្រហម Liverpool ។ 

ដោយឡែកសម្រាប់ក្លិប Man City វិញកំពុងតែដុនដាបខ្លាំងនៅ Premier League ដោយកំពុងឈរនៅលេខ១៣ មានតែ១២ពិន្ទុប៉ុណ្ណោះ។ ក្នុងនោះដែរលោក Pep Guardiola កំពុងតែខ្វះអ្នករកគ្រាប់បាល់ដ៏មុតស្រួចម្នាក់ ស្របពេលដែលតារាវ័យ៣២ឆ្នាំ Sergio Aguero មិនទាន់ជាសះស្បើយ១០០ភាគរយនៅឡើយនោះ៕ 

ប្រភព៖ thesun