ជុំវិញពាក្យចចាមអារ៉ាមនៃការដាក់លក់ Ronaldo ថ្នាក់ដឹកនាំក្លិប Juventus លោក Fabio Paratici បានចេញមកបញ្ជាក់ថា...

អ៊ីតាលី៖ ថ្នាក់ដឹកនាំម្នាក់របស់ក្លិបសេះបង្កង់ Juventus លោក Fabio Paratici បានចេញមកច្រានចោលជុំវិញពាក្យចចាមអារ៉ាមដែលថាក្លិបមួយនេះគ្រោងដាក់លក់កំពូលខ្សែប្រយុទ្ធ Cristiano Ronaldo នៅទីផ្សារដោះដូររដូវក្ដៅឆ្នាំក្រោយ។ ជាមួយគ្នានេះដែរ លោកក៏មានបន្ថែមទៀតថា Ronaldo នឹងនៅបន្តលេងឲ្យ Juventus រហូតដល់អស់កុងត្រា ពោលដល់ឆ្នាំ២០២២។ 

មែនទែនទៅក្នុងកំឡុងពេលប៉ុន្មានសប្តាហ៍ចុងក្រោយនេះមានដំណឹងលេចឮជាច្រើនថាក្លិបលោក Andrea Pirlo មិនអាចបន្តការចំណាយលើប្រាក់ពលកម្មដ៏ថ្លៃរបស់ Ronaldo បានទៀតនោះទេ ហើយក្លិប Paris Saint-Germain របស់បារាំងមានភាគរយខ្ពស់ជាងគេក្នុងការនាំយកកីឡាកររូបនេះចេញពី Juventus ។ ប៉ុន្តែពេលនេះអ្វីត្រូវបានបញ្ជាក់យ៉ាងច្បាស់ពីលោក Fabio Paratici គឺកីឡាករវ័យ៣៥ឆ្នាំរូបនេះនឹងនៅបន្តលេងឲ្យ Juventus ជាធម្មតា។

គួរបញ្ជាក់ដែរថាសម្រាប់រដូវកាល២០២០/២១នេះ Juventus ចាប់ផ្តើមមិនសូវបានល្អដូចរដូវកាលមុនៗនោះទេ ពោល៨ប្រកួតដំបូងនេះ ឈ្នះ៤ ស្មើ៤ ឈរនៅលេខ៤មាន១៦ពិន្ទុ តាមពីក្រោយក្រុមកំពូលតារាង AC Milan ចំនួន៤ពិន្ទុ។ ដោយឡែកសម្រាប់ទម្រង់លេងរបស់ Ronaldo វិញអាចនិយាយបានថានៅតែល្អ ពោលបង្ហាញខ្លួនបានតែ៥ប្រកួតប៉ុណ្ណោះ រកបានដល់ទៅ៨គ្រាប់៕

ប្រភព៖ mirror