គ្រាន់តែឃើញក៏ស្រៀវដែរ! ជណ្ដើរយោងតាមច្រាំងថ្មខ្ពស់បំផុតលើពិភពលោក បង្ហាញខ្លួននៅប្រទេសចិន (មានវីដេអូ)

ចិន៖ ជណ្ដើរយោងតាមច្រាំងថ្មកម្ពស់ជាង ៣០០ម៉ែត្រ ដែលបំផុសគំនិតសាងសង់តាមទេសភាពនៃខ្សែភាពយន្ដ Avata បានក្លាយជាជណ្ដើរយោងកញ្ចក់លៀនចេញក្រៅខ្ពស់បំផុតនៅលើពិភពលោក។

ជណ្ដើរយោងពីរជាន់ ហើយមានបីដាច់ពីគ្នានេះ ស្ថិតនៅក្នុងឧទ្យានព្រៃ ​Zip (Forest Park zip) ភាគកណ្ដាលប្រទេសចិន អាចឡើងតាមច្រាំងថ្មរហូតដល់កំពូលប្រើពេលតែ ៨៨វិនាទីប៉ុណ្ណោះ ដោយក្នុងជណ្ដើរយោងនីមួយៗ (ទាំងពីរជាន់) អាចផ្ទុកមនុស្សបានចំនួន៥០នាក់ក្នុងពេលតែមួយ។ ហើយចំពោះតម្លៃសំបុត្រសម្រាប់មនុស្សម្នាក់ ត្រូវចំណាយ១២៩យ័ន ឬប្រហែល ១៩ដុល្លារអាមេរិក។

ជារៀងរាល់ថ្ងៃ មានភ្ញៀវទេសចរប្រមាណ ៨,០០០នាក់បានមកជិះលេងកម្សាន្ដ ប៉ុន្ដែចំនួននេះនៅតែទាបជាងចំនួនភ្ញៀវទេចរមុនពេលមានជំងឺរាតត្បាត ដែលជាមធ្យមមានចំនួន១៤,០០០នាក់ឯណោះ។

តែទោះជាយ៉ាងណា នាពេលបច្ចុប្បន្នវាក៏កំពុងក្លាយជាកន្លែងទាក់ទាញភ្ញៀវទេសចរក្នុងប្រទេសចិនយ៉ាងឆាប់រហ័ស នៅពេលវិស័យទេសចរណ៍ក្នុងស្រុកចាប់ផ្ដើមស្ទុះឡើងវិញបណ្ដើរៗ បន្ទាប់ការរីករាលដាលនៃវីរុសកូរ៉ូណា បានបង្ខំឲ្យរឹតត្បិតលើការធ្វើដំណើរ និងបិទតំបន់រងគ្រោះខ្លាំងមួយចំនួន កាលពីដើមឆ្នាំ៕

សូមទស្សនារូបភាព និងវីដេអូខាងក្រោម៖