អ្នកណាថា Single មានអីមិនល្អ? ការពិតទៅស្រីៗ នៅ Single តែងតែលួចមានអារម្មណ៍ស្អប់ និងធុញទ្រាន់ខ្លួនឯងបំផុតនៅចំណុច១០យ៉ាងនេះ

ជីវិតគូ អ្នកណាៗក៏ត្រូវតែមានដែរ ​តែគ្រាន់តែពេលវេលាសមស្របមិនទាន់មកដល់ ឬរកមនុស្សត្រូវចិត្តមិនបាន ​ដែលជាហេតុធ្វើឱ្យមនុស្សជាច្រើនសម្រេចចិត្តនៅម្នាក់ឯងសិនតែម្តងទៅខ្ជិលខ្វល់ច្រើន ហើយមិនសូវឈឺក្បាលនឹងការមានទំនាក់ទំនងស្នេហាផង។ តែក្នុងនោះការពិតទៅ ការដែលនៅ Single យូរពេក វាមិនមែនជារឿងដែលគ្រប់គ្នាចង់បានទេ ហើយថែមទាំងមានអារម្មណ៍ធុញទ្រាន់ខ្លាំងចំពោះខ្លួនឯងទៀត។

ដូច្នេះមកដឹងពីផលវិបាក១០យ៉ាង ដែលស្រីៗដែលនៅ Single តែងតែជួបប្រទះ និងធុញទ្រាន់ខ្លាំងបំផុត ៖

១. គ្មានអ្នកចែករំលែករឿងជាមួយ

ទោះបីជាអ្នកមានមិត្តភក្តិល្អៗច្រើន មិនប្រាកដថាគេជាមនុស្សដែលអាចឱ្យអ្នកនិយាយប្រាប់ និងពិភាក្សាគ្រប់រឿងដែរ។ ការនៅ​ Single ធ្វើឱ្យស្រីៗមានអារម្មណ៍ថាធុញថប់ និងស្អប់អារម្មណ៍មួយ ដែលមិនអាចចែករំលែករឿងរីករាយ សប្បាយចិត្ត និងបញ្ហារបស់ខ្លួន ដល់មនុស្សដែលទុកចិត្តបានដែលជាគូស្នេហ៍។

២. អ្នកនិយាយក្រោយខ្នង

បើអ្នកជាមនុស្សស្រី Single តែម្នាក់ដែលមិនមានស្នេហា ឬមានសង្សារ នៅក្នុងចំណោមមិត្តភក្តិក្នុងក្រុម និងចំណោមមនុស្សដទៃ ​អ្នកអាចនឹងមានអារម្មណ៍ចម្លែកៗ រអៀសខ្លួន ធ្វើខ្លួនមិនត្រូវ ហើយសង្ស័យខ្លួនឯងថា តើអ្នកខុសគេមែនទេ? តើមានអ្នកកំពុងតែនិយាយដើមអ្នកក្រោយខ្នងទេដឹង?  

៣. ត្រូវគ្រប់គ្នាចម្អន់ និងចាប់គូឱ្យ

មិត្តភក្តិ និងអ្នកជិតដិតនឹងអ្នក ចង់ឱ្យអ្នកល្អ មានក្តីសុខ និងមានគូដូចគេដូចឯង បានជាពួកគេតែងតែនិយាយចម្អន់អ្នក និងចាប់គូអ្នកទៅនឹងអ្នកនេះអ្នកនោះ ដើម្បីឱ្យអ្នកពិចារណាសារជាថ្មីរកដៃគូនឹងគេ។ តែការធ្វើបែបនេះ បែរជាធ្វើឱ្យយើងមានអារម្មណ៍មិនល្អ ធុញទ្រាន់ និងមានស្រួលចិត្តប៉ុន្មានទេ ពេលគេចេះតែចាប់គូឱ្យទាំងមិនយល់ថាអ្នកកំពុងតែគិតអ្វី ឬចង់បានមនុស្សបែបណា។

៤. មានអារម្មណ៍ថាខ្លួនជាជនទី៣ ឬឆ្អឹងទទឹងក

ក្នុងនាមជាជនដែលនៅ Single តែឯង ​អ្នកប្រហែលជាមានអារម្មណ៍ឯកា និងខុសគេនៅក្នុងក្រុមអ្នកដែលមានស្នេហា វាប្រហែលជាមិនមានបញ្ហាអ្វីធំដុំទេ ដែលយើងនៅតែចូលរួមក្រុមមិត្តភក្តិដែលមានគូធម្មតា។ តែការដែលស្ថិតនៅក្នុងកាលៈទេសៈ ម្នាក់ឯងដែលគ្មានគូនៅក្នុងក្រុមមនុស្សដែលមានគូ យូរៗទៅអ្នកប្រហែលជាមានអារម្មណ៍ថាខ្លួនឯងខុសគេ ហើយអាចជាឆ្អឹងទទឹងក រំខានវេលាក្តីសុខលក្ខណៈជាគូរបស់ពួកគេក៏ថាបាន។

៥. សម្បូរអ្នកនិយាយដើម និងវែកញែកអ្នកពីក្រោយខ្នង

ជិវិតជារបស់អ្នកសោះ នៅនៅពេលដែលអ្នកនៅ​ Single មិនសូវជាមានអ្នកយល់ចិត្ត និងយល់ស្របនូវអ្វីដែលអ្នកជ្រើសរើសទេ តែពួកគេបែរជាចាប់អារម្មណ៍និយាយដើមអ្នក និងវែកញែកពីអ្នក ថាអ្នកមានចរិតបែបនេះបែបនោះ។ ជាពិសេសគឺផ្តុំគ្នា វិភាគពិជីវិតរបស់អ្នកក្រោយខ្នងទាំងមិនដឹងពីស្ថានភាពអ្នកច្បាស់ ហើយពិតណាស់ការលួចនិយាយក្រោយខ្នងបែបនេះធ្វើឱ្យអ្នកធុញទ្រាន់ខ្លាំងនឹងមាត់ចាបមាត់ព្រាបទាំងនោះ។

៦. សល់ពេលទំនេរនៅម្នាក់ឯងច្រើនពេក

អ្នកខ្លះប្រហែលជាមិនសូវសប្បាយចិត្តដែលខ្លួនមិនសូវមានទំនេរឱ្យខ្លួនឯងរំសាយអារម្មណ៍ ឬមានពេលវេលាផ្ទាល់ខ្លួន តែសម្រាប់មនុស្សស្រីនៅ Single គឺអាចនិយាយបានថាមានពេលវេលាដែលនៅម្នាក់ឯងច្រើនខ្លាំងតែម្តង។ អ្នកអាចទៅណាមកក៏បាន នៅម្នាក់ឯងក៏បាន ហើយមានពេលវេលាធ្វើការងារផ្ទាល់ខ្លួនដោយគ្មានការរំខានទៀត តែការមានពេលវេលានៅម្នាក់ឯងច្រើនពេក នឹងធ្វើឱ្យអ្នកកើតមានអារម្មណ៍អផ្សុក​ធុញទ្រាន់ និងស្ត្រេសបាន។

៧. អារម្មណ៍ខ្លាច និងស្ទាក់ស្ទើរពេលមានការណាត់ជួប

នៅពេលដែលមនុស្សស្រីនៅ ​Single យូរពេកទៅ នឹងប្រែជាមានអារម្មណ៍ថាលែងចង់មានស្នេហា ពេលខ្លះពេលមានការណាត់ជួបណាមួយ បែរជាមានអារម្មណ៍ ភ័យ ខ្លាច រអារ ស្ទាក់ស្ទើរ និងលែងចង់ជួបមនុស្សថ្មីៗ ឬបង្កើតស្នេហាថ្មីម្តងទៀត។

៨. មិនមាននរណាម្នាក់ដែលអាចទៅណាមកណាជាមួយ

ជីវិត Single ពេលខ្លះពិតជាពិបាកណាស់ អ្នកមិនមានអ្នកណាម្នាក់ដែលអាចទៅរក និងពឹងពាក់គ្រប់ពេលត្រូវការ ពិសេសចង់ទៅណាមកណាមិនមានអ្នកកំដរ ព្រោះទោះអ្នកមានមិត្តជិតស្និទ្ធតែមិនប្រាកដថាគេអាចទៅណាមកណាជាមួយអ្នកគ្រប់ពេលឡើយគេអាចនឹងរវល់ ឬមានដៃគូស្នេហាដែលត្រូវចំណាយពេលនៅជាមួយក៏ថាបាន។

៩. បាត់បង់មិត្តភក្តិ

ពេលមិត្តភក្តិរបស់អ្នកមានសង្សារ មានស្នេហា ​ឬរៀបការ ​ពួកគេប្រហែលជាត្រូវបែងចែកពេលវេលាសម្រាប់មនុស្សជាទីស្រលាញ់ និងការរៀបចំសាងគ្រួសាររបស់គេហើយ ដែលធ្វើឱ្យពួកគេមានការរវល់ លែងមានពេលជួបជុំ និងទាក់ទងមិត្តភក្តទៀត។ ចំនុចនេះហើយបានជាមនុស្សជាច្រើនតែងតែមានការពេញចិត្ត និងរអ៊ូរទាំចំពោះមិត្តដែលរៀបការហើយបែរជាលែងរាប់រកមិត្តភក្តិទៀត។ ដូច្នេះប្រសិនជាអ្នកនៅ Single យូរពេល​មិត្តរបស់អ្នកគេមានគូ ពួកគេរៀបការម្តងម្នាក់ៗអស់ អ្នកនឹងលែងមានមិត្តភក្តិច្រើនដូចមុនទៀតហើយ។

១០. ហេតុផលដោះសារឱ្យខ្លួនឯងក្នុងការសម្រេចចិត្តនៅ Single

អ្នកខ្លះសម្រេចិត្តនៅ Single ព្រោះតែមានហេតុផលផ្ទាល់ខ្លួន ឯអ្នកខ្លះមិនចង់មានស្នេហា ខ្លាចឈឺចាប់ មិនចង់មានស្នេហាព្រោះរវល់ការងារ និងហេតុផលជាច្រើនទៀត។ ហេតុផលខ្លះមើលទៅវាសមរម្យ និងជាក់ស្តែង តែអ្នកនៅ Single ខ្លះទៀតប្រឹងរកនឹកហេតុផលដោះសារឱ្យខ្លួនឯង ទាំងដែលការពិតមិនចង់នៅ Single ទេ តែមកពីរកមនុស្សត្រូវចិត្តមិនបានតែប៉ុណ្ណោះ៕