នៅក្នុងទំនាក់ទំនងស្នេហាមិនថាជាគូសង្សារ ឬប្តីប្រពន្ធនោះទេ វាតែងតែមិនផ្អែមដូចស្ករកាលពីស្រលាញ់គ្នាដំបូងទេ វាតែងតែមានការប្រែប្រួលខ្លះតាមកាលៈទេសៈ និងការរស់នៅប្រចាំថ្ងៃ។ តែការប្រែប្រួលខ្លះ វាក៏អាចបញ្ជាក់បានថាទំនាក់ទំនងស្នេហារបស់អ្នកទំនងជាកំពុងតែប្រេះឆាហើយដោយអំពើលួចលាក់ និងក្បត់ចិត្តក្រោយខ្នង ដោយរឿងខ្លះអ្នកដែលជាដៃគូអាចនឹងមានអារម្មណ៍ដឹងច្បាស់ពីការប្រែប្រួលទាំងនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សដូច្នេះមកតាមដានសញ្ញាដាស់តឿនទាំង ២៨ ដែលបញ្ជាក់ថាដៃគូស្នេហារបស់កំពុងតែមានចិត្តប្រែប្រួល លួចលាក់មានថ្មីក្បត់ចិត្តអ្នក ខាងក្រោមនេះ ៖
១. គេបានចាប់ផ្តើមប្រែប្រួលចេះតុបតែងខ្លួន និងប្រែប្រួលស្ទាយ៍តុបតែងខ្លួនថ្មីស្អាតប្លែក ជាពិសេសគឺម៉ូតសំលៀកបំពាក់ ម៉ូតសក់ ចេះបាញ់ទឹកអប់ និងតែងខ្លួនខ្ញង់ៗរាល់ពេលចេញទៅខាងក្រៅ។
២. គេចេះផ្តើមចេះតែកាន់ទូរស័ព្ទជាប់ដៃ និងបារម្ភហួងហែងទូរស័ព្ទដៃ ដូចមានរឿងលាក់បាំងនៅក្នុងទូរស័ព្ទ ពិសេសចេះដាក់មុខងារការពារ (Password, Face ID) ការចុចមើលទូរស័ព្ទ ឬកម្មវិធីឆាតផ្សេងៗ។
៣. ជាធម្មតាជាដៃគូស្នេហា ឬគូសង្សារតែងតែដឹងពីទម្លាប់រាល់ថ្ងៃរបស់គ្នា តែគេបែរជាចាប់ផ្តើមប្តូរកាលវិភាគ ឬមានសកម្មភាពខុសប្រក្រតី ដូចជា ពេលទៅណាមកណាលែងប្រាប់ដូចមុន ពេលខ្លះអ្នកបែរជាមិនអាចខល ឆាត ឬទាក់ទងគេបាន ទាំងដែលរាល់ដងពេលវេលាណាមួយនោះជាពេលទំនេររបស់គេ ដែលអ្នកចំណាំដឹងថាជាពេលទំនេរមិនរវល់ ឬទៅណាមកណាឡើយ។
៤. នៅពេលដែលគេលែងចាត់ទុកអ្នកសំខាន់ មានក៏បានអត់ក៏បាន ជួបក៏បានអត់ក៏បាន និយាយរួមលែងចង់ស្និទ្ធស្នាល លែងចង់និយាយ ឬជួបគ្នាញឹកញាប់ដូចមុន ព្រោះគេកំពុងតែចាប់អារម្មណ៍អ្នកថ្មី និងផ្តល់ពេលវេលាទៅឱ្យអ្នកថ្មី។
៥. នៅពេលដែលគេលែងមានអារម្មណ៍ស្និទ្ធស្នាល យូរៗជួបខែទើបជួបអ្នកម្តង ពិសេសមានអារម្មណ៍ថាកាន់តែឃ្លាតឆ្ងាយពីគ្នាដោយគ្មានហេតុផលសមរម្យនោះ វាក៏ជាសញ្ញានៃការក្បត់ចិត្តដែរ។
៦. គេបែរជាប្រែប្រួលអត្តចរិត តែងតែខឹង និងមានអារម្មណ៍មួរម៉ៅត្រគោះបោះបោកដាក់អ្នករាល់ពេល ពិសេសតែងតែបង្ករឿងឈ្លោះប្រកែក ទាំងដែលកាលពីមុនគេថ្នមចិត្តអ្នក និងតែងតែមានចិត្តអំណត់ជាមួយអ្នក។
៧. នៅសុខៗស្រាប់តែកាលវិភាគការងារ កាលវិភាគប្រចាំថ្ងៃគេប្រែប្រួលខុសពីធម្មតា ហើយតែងតែយកលេសរវល់នេះរវល់នោះខុសពីមុនខ្លាំង ក៏ជាសញ្ញាកំពុងតែក្បត់ដែរ។
៨. ទាំងដែលកាលពីមុនអ្នកធ្លាប់តែមានភាពជិតស្និទ្ធជាមួយមិត្តភក្តិរបស់គេ ហើយមានកម្មវិធីជួបជុំគ្នាជាប្រចាំ ស្រាប់តែពួកគេហាក់ដូចជាចម្លែក ចាប់ផ្តើមចេះប្រែទឹកមុខ ឬមានសកម្មភាពមិនសូវជារួសរាយ និងជិតស្និទ្ធជាមួយអ្នកដូចមុន វាក៏ជាសញ្ញាមិនប្រក្រតីនៃការក្បត់ចិត្តដែរ។
៩. ទាំងដែលមួយរយៈមុនគេហីៗ ព្រងើយកន្តើយ និងមិនរវល់នឹងអ្នកសោះ ស្រាប់តែសុខៗគេចេះយកចិត្ត ដោយការទិញនេះទិញនោះជូនអ្នក នាំអ្នកទៅញ៉ាំអីឆ្ងាញ់ៗ ឬដើរកម្សាន្តកន្លែងណាមួយ ដើម្បីឱ្យអ្នករីករាយ វាក៏ជាសញ្ញានៃការក្បត់ចិត្ត ព្រោះតែរអៀសចិត្តជាមួយអ្នកដែរ។
១០. ស្រាប់តែមួយរយៈនេះគេប្រែប្រួលខ្លាំង អារម្មណ៍ផ្លាស់ប្តូរឡើងចុះមិនឈប់ ពេលមានកំហុសមិនចេះសុំទោសដូចមុន ហើយរកលេសចាប់កំហុសអ្នក និងរករឿងអ្នកមិនឈប់ ជាពិសេសនៅពេលអ្នកសួរនាំតិចតួចទាំងដែលគ្មានរឿងធំដុំអីផង មើលទៅគេបែរហាក់ដូចជាមានអាថ៌កំបាំង លាក់លៀម និងមានអារម្មណ៍រអៀសខ្លាំង រហូតប្រែទឹកមុខ ខឹងសម្បារ និងបង្កជម្លោះជាញឹកញយ។
១១. គេចាប់ផ្តើមផ្លាស់ប្តូរចំណង់ចំណូលចិត្ត ចាប់ផ្តើមចូលចិត្តអ្វីថ្មីផ្សេងប្លែកៗទៅវិញ ជាពិសេសរឿងដែលធ្លាប់បានធ្វើរួមគ្នា ហើយគេក៏ចូលចិត្តគេបែរជាមានអារម្មណ៍មិនសប្បាយចិត្ត និងមិនពេញចិត្តដូចមុន។
១២. គេលែងខ្វល់ ឬចាប់អារម្មណ៍លើអ្នកដូចមុន មិនថាអ្នកធ្វើល្អប៉ុនណា មិនថាអ្នកធ្លាប់មានទម្លាប់អាក្រក់បែបម៉េច គេមិននិយាយ គេមិនរអ៊ូ គេមិនចង់កែប្រែអ្នកដូចមុននោះឡើយ ចង់អ្នកក្លាយជាអ្វីក៏គេលែងខ្វល់ដែរ។
១៣. គេលែងចង់ស្និទ្ធស្នាល លែងចង់កាន់ដៃ លែងចង់ថើប និងប៉ះពាល់អ្នកដូចមុន ប្រសិននេះជាអ្វីដែលគេធ្លាប់ធ្វើ និងចូលចិត្តធ្វើ។ ហើយសម្រាប់ទំនាក់ទំនងមួយទៀតដែលអ្នកទាំង២ជ្រុលជ្រួស ខាងទំនាក់ទំនងផ្លូវភេទជាមួយគ្នាជាធម្មតា តែគេបែរជាមិនសូវមានអារម្មណ៍ជាមួយអ្នក និងមានពេលវេលាច្រើនរួមភេទដូចមុន នេះក៏ជាសញ្ញានៃការក្បត់ចិត្តដែរ។
១៤. មិនសូវមានទំនាក់ទំនងជិតស្និទ្ធដូចមុន ទាំងកាលពីមុនគេចូលចិត្តទៅណាមកណាជាមួយអ្នក កាន់ដៃអ្នក និងនៅក្បែរអ្នកជានិច្ច តែគេបែរជាព្យាយាមចៀសវាងមិននៅជិតអ្នកដូចមុនទៀតឡើយ ជាពិសេសការទំនាក់ទំនងតាមការនិយាយគ្នា ឆាត ឬផ្ញើសា កាន់តែតិចទៅៗឬលែងមានតែម្តង។
១៥. ទិញរបស់ប្រើប្រាស់ សំលៀកបំពាក់ថ្មីៗ និងគ្រឿងតុបតែងថ្មីៗជានិច្ច ដើម្បីតុបតែងខ្លួនឱ្យបានស្អាតខុសកាលពីមុនទាំងស្រុង ហាក់ដូចជាកំពុងតែផ្គាប់ផ្គន់ភ្នែកអ្នកដទៃ។
១៦. ធ្លាប់តែទៅណាមកណាជាមួយគ្នា ឬបើគ្មានវត្តមានអ្នកទេ គេតែងតែខលប្រាប់ ឬថតរូបផ្ញើ តែគេបែរជាផ្លាស់ប្តូរទៅណាមកដោយមិនខ្វល់ពីចិត្តរបស់អ្នក ពិសេសសកម្មភាពប្រចាំថ្ងៃដែលគេធ្លាប់ធ្វើជាមួយអ្នក បែរជាផ្លាស់ប្តូរបន្តិចម្តងៗ។
១៧. កាលពីមុនគេជាមនុស្សដែលធ្លាប់ជឿជាក់លើអ្នក និងមានចិត្តធ្ងន់ ស្រាប់តែគេចេះរករឿងដោយគ្មានមូលហេតុ និងចោទប្រកាន់អ្នកគ្រប់រឿង។
១៨.អ្នកចាប់មានអារម្មណ៍ថាមានភាពស្រងោះស្រងោច ឯកា ខ្លួនឯងលែងសំខាន់ ព្រោះតែគេតែងតែតោះតើយ លែងខ្វល់ លែងចាប់អារម្មណ៍នឹងអ្នក ហើយតែងតែទុកអ្នកចោលជាញឹកញយ និយាយរួមអ្វីៗបែរជាប្រែប្រួលខុសពីគ្រាមុនដែលធ្វើឱ្យអ្នកមានអារម្មណ៍ថាឈឺចាប់ខ្លាំង។
១៩. គេស្រាប់តែប្រាប់អ្នកថាគេមានការរវល់ខ្លាំង គេត្រូវទៅណាឆ្ងាយមួយរយៈ ឬត្រូវមានរឿងចាំបាច់ដែលត្រូវបំពេញជាចាំបាច់ ដែលមិនអាចទាក់ទងអ្នកបាន ហើយសុំឱ្យឃ្លាតឆ្ងាយពីគ្នាមួយរយៈសិន។
២០. គេចាប់ផ្តើមខ្វែងគំនិតអ្នក ធ្វើអ្វីលែងត្រូវគ្នា អ្នកគិតផ្សេងគេគិតផ្សេងខុសកាលពីមុនទាំងស្រុង រហូតបង្កជាជម្លោះនឹងគ្នាជារឿយៗដូចគូសត្រូវ។
២១. គេចាប់ផ្តើមចាយច្រើន ខ្ទង់ចំណាយកាន់តែកើនឡើង និងតែងតែមានការចាំបាច់ប្រើប្រាស់លុយជានិច្ច ហាក់កំពុងតែយកធ្វើអី ឬទិញអ្វីផ្គាប់ផ្គន់នរណាម្នាក់។
២២. ស្រលាញ់គ្នាយូរៗវាមិនផ្អែមល្ហែមដូចជាកាលដំបូងក៏ពិតមែន តែគេបែរជាប្លែកខ្លាំងឡើងៗ លែងចេះនិយាយសម្តីល្អៗពីរោះៗ តែងតែនិយាយពាក្យត្រគោះបោះបោក រករឿង ហើយភាពស្និទ្ធស្នាលរសាត់ទៅបន្តិចៗម្តងរហូតក្លាយជាគម្លាតមួយ។
២៣. សុខៗគេបែរជាសួរសំណួរប្លែកៗខុសពីមុន ដូចជាកំពុងតែស្ទាបស្ទង់ចិត្តអ្នកដូចជា តើស្រលាញ់គ្នាបានយូរប៉ុនណាទៀត? ធ្វើយ៉ាងណាបើបែកគ្នា? តើគិតបែបណាបើគេក្បត់ចិត្ត?
២៤. ធ្លាប់តែជាមនុស្សហីៗមិនខ្វល់ គេបែរជាមានចិត្តប្រយ័ត្នប្រយែង និងការពារខ្លួនជានិច្ចមិនឱ្យអ្នកចាប់ថ្នាក់បាន ពិសេសបើសួរគេរឿងការប្រែប្រួលរបស់គេដែលទំនងជាបង្ករឿងក្បត់ចិត្ត គេបែរជាប្រកែកយ៉ាងខ្លាំងចង់យកឈ្នះ ឬអាចខឹងឈ្លោះ ហើយចោទថាអ្នកមិនទុកចិត្តគេទៀតផង។
២៥. សុខៗគេស្រាប់តែសួរនាំអ្នកច្រើនខុសពីធម្មតាដូចជាអ្នកកំពុងតែធ្វើអី នៅឯណា ដែលស្តាប់ទៅដូចជាកំពុងតែនឹក ឬ Care ខ្លាំង តែការពិតសកម្មភាពខុសប្រក្រតីនេះ គេគ្រាន់តែចង់ដឹងសកម្មភាពអ្នក ថាអ្នកនៅទីណាដើម្បីកុំឱ្យជួបអ្នកដោយចៃដន្យបែកការណ៍អំពើក្បត់ចិត្តប៉ុណ្ណោះ។
២៦. ធម្មតាជាគូស្នេហ៍នឹងគ្នា យើងប្រាកដជាមិនចង់ក្លាយជាចំណាប់អារម្មណ៍អ្នកដទៃ ឬខ្វល់ពីអ្នកដទៃឡើយ តែគេបែរជាប្រឹងធ្វើអ្វីឱ្យខ្លួនឯងជាទីចាប់អារម្មណ៍របស់មនុស្សជុំវិញ ដូចជាតុបតែងខ្លួនស្អាតជាងអ្នក ធ្វើមុខធ្វើមាត់ធ្វើកាយវិកាឱ្យភ្នែកឱ្យដៃអ្នកដទៃ គេប្រហែលជាកំពុងតែមានគំនិតគិតក្បត់ចិត្តហើយ។
២៧. ធ្លាប់តែនៅជាមួយអ្នក ឬទៅណាមកណាជាមួយអ្នកគេសប្បាយចិត្ត គេបែរជានិយាយថាមិនសប្បាយចិត្ត ធុញទ្រាន់ និងមានអារម្មណ៍ថាលែងរីករាយនឹងសកម្មភាពគ្រប់យ៉ាងដែលនៅជាមួយអ្នកទៅវិញ។
២៨. គេចាប់ផ្តើមយកចិត្តទុកដាក់នឹងអ្នកកាន់តែខ្លាំង និងហាក់បីដូចជាស្រលាញ់អ្នកខ្លាំងខុសពីធម្មតា ដោយសារតែជាល្បិចកុំឱ្យអ្នកចាប់កំហុសគេបាន ហើយក៏ជាចំណុចដែលគេហាក់ដឹងកំហុសដែលសាងលើអ្នក។
សរុបសេចក្តីមក ប្រសិនជាអ្នកសង្កេតឃើញសកម្មភាពខុសប្រប្រតីទាំង២៨ចំណុចខាងលើ វាភាគច្រើនបំផុតដែលគេកំពុងតែមានអំពើក្បត់ចិត្តអ្នកក្រោយខ្នងហើយ។ អ្នកអាចសម្រេចចិត្តថាគួរតែធ្វើបែបណាបន្តចំពោះទំនាក់ទំនងរបស់អ្នកទាំង២ ដោយខ្លួនឯងថាគួរតែនិយាយគ្នាឱ្យដឹងរឿងសិន គួរតែអត់ទោស គួរតែបន្ត ឬបញ្ចប់ សូមធ្វើការពិចារណាឱ្យបានច្បាស់៕