បរទេស៖ មជ្ឈមណ្ឌលឆ្លើយតបនឹងគ្រោះមហន្តរាយបានឱ្យដឹងថា ព្យុះទីហ្វូងម៉ូឡាវ បានសម្លាប់មនុស្សយ៉ាងហោចណាស់ ៩នាក់ និង ១៣នាក់ ផ្សេងទៀតកំពុងបាត់ខ្លួននៅហ្វីលីពីន មុនពេលវាបក់ឆ្លងកាត់តាមសមុទ្រចិនខាងត្បូង ឆ្ពោះទៅកាន់ប្រទេសវៀតណាម។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការិយាល័យឧតុនិយមហ្វីលីពីនបានរាយការណ៍ថា ព្យុះម៉ូឡាវនេះ បានបង្កជាផលប៉ះពាល់ដល់ប្រជាជនជាង ៩០០,០០០នាក់ មុនពេលវាបក់ចេញផុតពីប្រទេសហ្វីលីពីន នៅម៉ោងប្រហែល ៨ព្រឹកថ្ងៃអង្គារ។
ចំណែកការិយាល័យឧតុនិយមវៀតណាមក៏បានឱ្យដឹងដែរថា តំបន់ភាគខាងជើងនៃតំបន់ខ្ពង់រាបកណ្តាលរបស់ប្រទេសវៀតណាម ដែលជាកន្លែងផលិតកាហ្វេរបស់ប្រទេសនេះ នឹងមានភ្លៀងធ្លាក់ដល់ទៅ ២០០មីល្លីម៉ែត្រ ចាប់ពីល្ងាចថ្ងៃអង្គារនេះ។
គួរជម្រាបដែរថា អាជ្ញាធរវៀតណាមបានជម្លៀសប្រជាជនតំបន់ភាគកណ្តាលជិត ១,៣លាននាក់ ក្នុងរយៈពេល ៧ថ្ងៃចុងក្រោយនេះ ខណៈដែលប្រទេសវៀតណាម ត្រូវបានវាយប្រហារដោយព្យុះសូឌែល ហើយឥឡូវនេះកំពុងត្រៀមរងផលប៉ះពាល់ដោយព្យុះម៉ូឡាវ បន្ថែមទៀត។ យោងតាមគេហទំព័ររដ្ឋាភិបាលវៀតណាមបានចុះផ្សាយថា មនុស្សចំនួន ១១១នាក់ បានស្លាប់បាត់បង់ជីវិត នៅអំឡុងពេលខ្យល់ព្យុះនិងការរអិលបាក់ដី ដែលកើតឡើងតាមតំបន់បណ្តោយឆ្នេរ និងតំបន់ខ្ពង់រាប ចន្លោះថ្ងៃទី ៦ និង ២០ ខែតុលា។ ហើយមកទល់ពេលនេះ មានមនុស្ស ២២នាក់ គឺកំពុងបាត់ខ្លួននៅឡើយ៕