មិនដែលឃើញសោះ! កូនឆ្កែមួយក្បាលនេះកើតមក មានរោមពណ៌បៃតងខុសគេ

អ៊ីតាលី៖ នៅក្នុងឆ្នាំនេះ មានរឿងរ៉ាវជាច្រើនដែលពិបាកនឹងស្មានដល់ ហើយរឿងចម្លែកមួយនេះក៏បានបង្កឲ្យមានការភ្ញាក់ផ្អើលផងដែរ។ រឿងរ៉ាវដ៏កម្រមួយបានកើតឡើងទៅលើកសិករអ៊ីតាលី លោក Cristian Mallocci ដែលឆ្កែញីរបស់គាត់មានឈ្មោះថា Spelacchia បានផ្ដល់កំណើតឲ្យកូនឆ្កែមួយក្បាល ដែលមានរោមពណ៌បៃតង។

កូនឆ្កែតូចម្លែកមួយក្បាលនេះត្រូវបានគេដាក់ឈ្មោះឲ្យភ្លាម ថា Pistachio។ មេឆ្កែមួយក្បាលនេះបានផ្ដល់កំណើតឲ្យកូនសរុបចំនួន៥ក្បាល ប៉ុន្តែមានកូនឆ្កែមួយក្បាលដែលមានសម្បុរ ខុសប្លែកពីកូនឆ្កែផ្សេងទៀត ដែលកើតនៅក្នុងកសិដ្ឋាន នៅលើកោះ Sardinia នៃសមុទ្រមេឌីទែរ៉ាណេ។

បងប្អូនរបស់កូនឆ្កែចម្លែកមួយក្បាលនេះ សុទ្ធតែមានរោមពណ៌ស ដែលមានពណ៌ដូចគ្នានឹងមេរបស់ពួកវាដែរ។ ឆ្កែដែលកើតមកជាមួយរោមពណ៌បៃតងដូចនេះ គឺជារឿងមួយដ៏កម្រខ្លាំងណាស់។ រឿងរ៉ាវនេះត្រូវបានគេជឿថា បានជាប់ពាក់ព័ន្ធជាមួយសារធាតុពណ៌បៃតង ហៅថា ប៊ីលីវឺដិន ក្នុងពេលមេឆ្កែកំពុងពពោះ។

ប៉ុន្តែវាបានក្លាយជាដំណឹងមួយដ៏ក្រៀមក្រំ នៅពេលរោមរបស់កូនឆ្កែ Pistachio ចាប់ផ្ដើមហើរពណ៌។ លោក Mallocci បាននិយាយថា បៃតងគឺជាពណ៌តំណាងឲ្យក្ដីសង្ឃឹមនិងសំណាង សម្រាប់ឆ្នាំ២០២០នេះ៕