ត្រឹមតង់ទី១ Shakhtar នាំមុខមុន៣គ្រាប់! R. Madrid ភ្លាត់ចាញ់ Shakhtar ២-៣ ក្នុងវគ្គចែកពូល UCL យប់មិញ (មានវីដេអូ)

បរទេស៖ សម្រាប់ការប្រកួតបើកឆាកក្នុងពូល B ពានរង្វាន់ UEFA Champions League យប់មិញ ម្ចាស់ជើងឯក១៣សម័យ Real Madrid ភ្លាត់ស្នៀតចាញ់ក្លិបមកពីអ៊ុយក្រែន Shakhtar Donetsk នៅក្នុងកីឡដ្ឋាន Bernabeu ដោយលទ្ធផល២ទល់នឹង៣។ 

គួរបញ្ជាក់ដែរថាដោយសារតែកីឡាករឈុតធំ១៣រូបកំពុងតែសម្រាកព្យាបាលពីជំងឺកូវីដ១៩ ទើបលោកគ្រូបង្វឹករបស់ក្លិប Shakhtar Donetsk បង្ខំចិត្តកោះហៅកីឡាករក្នុងឈុតយុវជន ឲ្យមកជួយលេងពេលប៉ះ Real Madrid យប់មិញនេះ។ 

អ្វីដែលគួរឲ្យភ្ញាក់ផ្អើលនោះគឺនៅត្រឹមតង់ទី១ Shakhtar អាចមានឱកាសរកបាន៣គ្រាប់នាំមុខ Real Madrid ធ្វើបាន ដោយកីឡាករ Cardoso Lemos Martins និង Solomon  រីឯមួយគ្រាប់ទៀតជាការស៊ុតចូលទីខ្លួនឯងពីសំណាក់ខ្សែការពារ Raphael Varane ។ 

ចូលដល់តង់ទី២ទើប Real Madrid អាចតាមបាន២គ្រាប់មកវិញ ពោលរកបានដោយការស៊ុតពីលើដំបូលទូករបស់កីឡាករ Luka Modric និងមួយគ្រាប់ទៀតរកបានដោយកីឡាករ Vinícius Júnior ។ យោងតាមលទ្ធផលនេះ Real Madrid ឈរបាតតារាងពូល B មាន០ពិន្ទុ ហើយយប់មិញនេះដែរជាការចាញ់ពីរប្រកួតជាប់គ្នាហើយ របស់ក្រុមលោក Zinedine Zidane ជាក់ស្ដែងក្លិបយក្សអេស្ប៉ាញ ទើបតែចាញ់ក្លិប Cádiz ដោយលទ្ធផល០-១ក្នុងក្របខ័ណ្ឌ La Liga កាលពីចុងសប្តាហ៍នេះ៕

ប្រភព៖ bbc