កាប៊ុល៖ ក្រុមអាជ្ញាធរបានរាយការណ៍កាលពីថ្ងៃពុធថា មនុស្សយ៉ាងហោចណាស់ ១៥នាក់បានស្លាប់ និងជាច្រើននាក់ទៀតរងរបួស ក្នុងហេតុការណ៍រត់ជាន់គ្នា នៅទីក្រុង Jalalabad ភាគខាងកើតប្រទេសអាហ្វហ្គានី។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសោកនាដកម្មនេះបានកើតឡើង គឺនៅពេលដែលពលរដ្ឋអាហ្វហ្គានីស្ថានរាប់ពាន់បានប្រមូលផ្តុំគ្នា ដើម្បីរង់ចាំធ្វើទិដ្ឋាការនៅស្ថានកុងស៊ុលនៃប្រទេសប៉ាគីស្ថាន ខណៈនោះក៏មានមនុស្សឈ្លោះប្រកែកគ្នា ហើយក៏រុញច្រានគ្នាទៅវិញទៅមក ដែលបណ្តាលឱ្យអ្នកផ្សេងទៀតចាប់ផ្តើមដួល ហើយភ័យរត់ជាន់គ្នាបែបនេះ។
យោងតាមលោក Sohrab Qaderi ដែលជាសមាជិកក្រុមប្រឹក្សាខេត្តបានឱ្យដឹងថា ហេតុការណ៍រត់ជាន់គ្នានេះ បានកើតឡើងនៅប្រហែលម៉ោង ៥ព្រឹក ដោយជនរងគ្រោះ ១១នាក់ ក្នុងចំណោមជនរងគ្រោះទាំង ១៥នាក់គឺជាស្ត្រី ហើយក៏មានមនុស្សចាស់ជរាជាច្រើននាក់ បានរងរបួសផងដែរ។
គួរជម្រាបដែរថា ជារៀងរាល់ឆ្នាំមានពលរដ្ឋអាហ្វហ្គានីស្ថានរាប់ម៉ឺននាក់ បានធ្វើដំណើរទៅប៉ាគីស្ថានដែលជាប្រទេសជិតខាង ក្នុងគោលបំណងទៅរកសេវាព្យាបាលជំងឺ ការសិក្សា ក៏ដូចជា ទៅរកការងារធ្វើជាដើម៕