ថ្ងៃ ២០តុលានេះ ស្ថានទូតស៊ុយអែតបានប្រកាសចាប់ផ្ដើមអនុវត្តកម្មវិធីឆ្លើយតបចំពោះជំងឺកូវីដ-១៩ ដើម្បីផ្ដល់ការគាំទ្រផ្នែកហិរញ្ញវត្ថុដល់សហគមន៍ជនបទតាមរយៈសកម្មភាពដាំដើមឈើ។ កម្មវិធីនេះមានគោលបំណងជម្រុញឱ្យមានការចូលរួមពីប្រជាពលរដ្ឋដែលរស់នៅជនបទចំនួន១៦០០គ្រួសារ ក្នុងខេត្តពោធិ៍សាត់ និងសៀមរាប ដើម្បីដាំដើមឈើនៅក្នុងមូលដ្ឋានរបស់ពួកគេ បង្កើតជាស្ថានីយ៍បណ្ដុះកូនឈើ និងចូលរួមក្នុងសកម្មភាពអភិរក្សដទៃទៀតទូទាំងប្រទេស។ កម្មវិធីនេះនឹងត្រូវអនុវត្តក្រោមការដឹកនាំរបស់ក្រសួងបរិស្ថានដោយមានការគាំទ្រផ្នែកបច្ចេកទេសពី UNDP តាមរយៈគម្រោងកសាងបរិយាកាសអំណោយផលសម្រាប់ការអភិវឌ្ឍប្រកបដោយចីរភាព (BESD)។ នេះបើតាមការបញ្ជាក់ពីស្ថានទូតស៊ុយអែតប្រចាំកម្ពុជា។
បើតាមស្ថានទូត ព្រៃឈើ និងជីវចម្រុះ នៅបន្តរងសម្ពាធក្នុងកម្រិតខ្ពស់ ហើយវាកំពុងមានការកើនឡើងដោយសារតែការរាតត្បាតជាសកលនៃជំងឺកូវីដ-១៩។ នៅទូទាំងព្រះរាជាណាចក្រកម្ពុជា មនុស្សរាប់ម៉ឺននាក់បាត់បង់ការងារធ្វើ ហើយពលករចំណាកស្រុកជាង ១០ម៉ឺននាក់បានវិលត្រឡប់ពីប្រទេសជិតខាងទៅកាន់ស្រុកកំណើតនៅតំបន់ជនបទវិញ។ ការស្វែងរកប្រាក់ចំណូល និងស្បៀងអាហារ កាន់តែលំបាកទៅៗសម្រាប់ប្រជាជនមួយចំនួន។ ដើម្បីជីវភាពរស់នៅជាពិសេសក្នុងអំឡុងពេលនៃជម្ងឺរាតត្បាតនេះ ប្រជាជនកាន់តែច្រើនចាប់ផ្ដើមចូលព្រៃដើម្បីកាប់ឈើ បរបាញ់សត្វព្រៃ និងនេសាទជាដើម ដែលជាការដាក់សម្ពាធបន្ថែមទៀតមកលើប្រព័ន្ធអេកូឡូស៊ីដែលកំពុងមានភាពផុយស្រួយរួចទៅហើយនោះ។
ឯកឧត្តម ប៊្យន ហេកម៉ាក ឯកអគ្គរាជទូតស៊ុយអែតប្រចាំកម្ពុជាមានប្រសាសន៍ថា៖ «ការកាត់បន្ថយផលវិបាកដែលបង្កឡើងដោយសារជំងឺរាតត្បាតជាសកលជារឿងចាំបាច់។ ការគាំទ្ររបស់ប្រទេសស៊ុយអែត ចំពោះកញ្ចប់ថវិកា សង្គ្រោះបន្ទាន់ក្នុងទំហំទឹកប្រាក់ ៤ ៣០០ ០០០SEK ឬប្រមាណ ជិតកន្លះលានដុល្លារអាមេរិកនេះ នឹងរួមចំណែកដោះស្រាយបញ្ហានេះ។ កញ្ចប់ថវិកានេះ នឹងផ្ដល់ឱ្យសហគមន៍ដែលងាយរងគ្រោះនូវឱកាសរកប្រាក់ចំណូលបានភ្លាមៗ តាមរយៈការដាំដើមឈើដើម្បីជួយឱ្យពួកគេអាចទប់ទល់នឹងវិបត្តិសេដ្ឋកិច្ចដែលកំពុងកើតមាន។ សកម្មភាពនេះក៏នឹងរួមចំណែក ដល់ការស្ដារប្រព័ន្ធអេកូឡូស៊ីដ៏មានសារៈសំខាន់ផងដែរ»។
លោកឯកអគ្គរាជទូត បន្ថែមទៀតថា៖ កម្មវិធី នេះនឹងបន្តអនុវត្តរហូតដល់ខែមិថុនា ឆ្នាំ២០២១ ដែលនឹងផ្ដល់ ឱកាសការងារភ្លាមៗដល់សហគមន៍ដែលមាន តម្រូវការចាំបាច់ជាងគេតាមរយៈសកម្មភាពដាំដើមឈើ។ កម្មវិធីនេះនឹងបណ្តុះកូនឈើនៅរដូវប្រាំង និងគាំទ្រដល់ សកម្មភាពដាំដើមឈើមួយជុំទៀត ចន្លោះពីខែឧសភា ដល់ខែ មិថុនា ឆ្នាំ២០២១។
ចំណែកឯកឧត្តម ទិន ពន្លក រដ្ឋលេខាធិការក្រសួងបរិស្ថានមានប្រសាសន៍ថា «កម្មវិធីសាច់ប្រាក់ពលកម្មគឺជាអន្តរាគមន៍ ទាន់ពេលវេលាដែលគេត្រូវការជាចាំបាច់ ដើម្បីឆ្លើយតបភ្លាមៗចំពោះតម្រូវការបន្ទាន់របស់សហគមន៍ជនបទ ដែលរងផលប៉ះពាល់ដោយសារជំងឺកូវីដ-១៩ និងភាពចាំបាច់ក្នុងការ ស្ដារប្រព័ន្ធអេកូឡូស៊ីសំខាន់ៗដែលកំពុងទទួលរងសម្ពាធ។»
ឯកឧត្តមបន្ថែមថា៖ «ការងារនេះនឹងជួយ បង្កើនគម្របព្រៃក្នុងតំបន់គោលដៅ ដែលជាប្រភពស្រូបយកកាបូន រួមចំណែកដល់ការបន្តប្រយុទ្ធប្រឆាំងទៅនឹង ការប្រែប្រួលអាកាសធាតុរបស់យើង។»
លោក Nick Beresford តំណាងនិវាសនដ្ឋាននៃ UNDP ប្រចាំនៅកម្ពុជាមានប្រសាសន៍ថា៖ «រដ្ឋាភិបាលប្រទេសស៊ុយអែត និង UNDP ប្ដេជ្ញាផ្ដល់ការគាំទ្រពេញទំហឹងដល់កម្ពុជាក្នុងអំឡុងពេលនៃការរាតត្បាតជាសកលនេះ។ កម្មវិធីដាំដើមឈើនេះ ជួយផ្ដល់ជាសាច់ប្រាក់ជាផ្នូរនឹងកម្លាំងពលកម្មនៅពេលដែលគេត្រូវការប្រាក់បំផុត។ ហើយតាមរយៈការវិនិយោគលើគម្របព្រៃឈើ យើងអាចរួមចំណែកដល់ការកសាងអនាគតកាន់តែបៃតង និងកាន់តែស្អាតសម្រាប់គ្រប់គ្នា»៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ
