ក្មេង​វក់​ហ្គេម​ខ្លាំង​​ពេក​! ចិន​ធ្វើវិសោធន​កម្ម​ច្បាប់​ហាម​ក្រុម​ហ៊ុនអនឡាញ​ ផ្តល់​សេវាកម្ម​ណា​ដែល​ធ្វើ​ឲ្យ​កុមារ​ងប់​ងល់​

ប្រទេសចិនមានការព្រួយបារម្ភចំពោះការប្រើប្រាស់ប្រព័ន្ធអនឡាញរបស់កុមារ។ តាមប្រភព​ពីសារព័ត៌មាន Reuters ដែលចុះផ្សាយកាលពីថ្ងៃ ១៨តុលានេះបានឱ្យដឹងថា ប្រទេសចិនបានធ្វើវិសោធនកម្មច្បាប់ដើម្បី ពង្រឹងការគាំពារកុមារអាយុក្រោម១៨ឆ្នាំ តាមប្រព័ន្ធ​អនឡាញ។​  ក្នុងនោះ គេទាមទារឱ្យក្រុមហ៊ុនដែលផ្ដល់សេវាកម្មតាម​ប្រព័ន្ធអនឡាញ​អនុវត្តតាមបទបញ្ជានានាដែលមានចែងតាមការចាំបាច់។ នេះបើតាម​នាយក​ដ្ឋានប្រឆាំងបទល្មើសបច្ចេកវិទ្យាចេញផ្សាយ នៅថ្ងៃ ១៩តុលា ២០២០នេះ។

ច្បាប់ថ្មីនេះ នឹងចូលជាធរមាននៅថ្ងៃទី ១ ខែមិថុនា ឆ្នាំក្រោយ។ ច្បាប់នេះ គឺហាម​ក្រុមហ៊ុន​អនឡាញមិនឱ្យផ្ដល់ផលិតផល ឬសេវាកម្មដល់កុមារដែល​នាំឱ្យពួកគេងប់ងល់។ ក្រុមហ៊ុនដែលផ្ដល់សេវាកម្មអនឡាញទាំងនោះរួមមានដូចជា ហ្គេម ការផ្សព្វផ្សាយផ្ទាល់​លើអនឡាញ (Livestreaming) ជាដើម ចំណែកចម្រៀង វីដេអូ និងប្រព័ន្ធទំនាក់​ទំនង​សង្គម ត្រូវមានមុខងារដែលអាចកំណត់រយៈពេលក្នុងការប្រើប្រាស់អនឡាញនេះ។ លើសពីនេះ​ទៅទៀត ក្រុមហ៊ុនត្រូវតែមានវិធានការក្នុងការទប់ស្កាត់ ការសម្លុត ឬធ្វើបាប​តាម​រយៈ​អនឡាញ (Cyberbullying) ហើយម្យ៉ាងវិញទៀត ច្បាប់នេះបានផ្ដល់​សិទ្ធិទៅ​ឱ្យអាណាព្យាបាល ឬឪពុកម្ដាយដើម្បីស្នើសុំឱ្យក្រុមហ៊ុនអនឡាញលុប ឬបិទតំណ​ភ្ជាប់ទាំងនោះ​បានថែមទៀតផងដែរ៕