បែកគ្នាកាន់យូរ Shawn Mendesនិង Camila Cabello កាន់តែស្រលាញ់គ្នាទ្វេដង

អាមេរិក៖ ប៉ុន្មានថ្ងៃថ្មីៗនេះតារាចម្រៀងវ័យក្មេងកាណាដា​ Shawn Mendes បានឆ្លៀតពេលវេលាដើម្បីជួបមុខសង្សារ Camila Cabello ដែលបានបែកគ្នាអស់មួយរយៈធំ ដោយសារតែរវល់ការងារសិល្បៈផ្ទាល់ខ្លួន។

ដោយឡែក ប៉ុន្មានអាទិត្យមុនតារាវ័យ២២ឆ្នាំរូបនេះបាន ជិះឡានម៉ាកទំនើប Range Rover ជាមួយមិត្តស្រី នៅក្នុងទីក្រុងSanta Monica រដ្ឋ California ប្រទេសអាមេរិក តារាប្រុសរូបនេះចុះពីលើឡានជាមួយនឹងមិត្តស្រីដើម្បីចូលក្នុងហាងលក់សម្ភារៈមួយ​ ដើម្បីទិញយកស្រោមមុខបែបព្រឺព្រួច សម្រាប់បុណ្យ Halloweenនៅខាងមុខនេះផងដែរ បន្ទាប់មកប៉ុន្មានថ្ងៃមុននេះវិញ Shawn Mendes ក៏បានជួបជាមួយនឹងមិត្តស្រីម្តងទៀត ដើម្បីចេញក្រៅលំហែរកាយជាមួយគ្នាម្តងទៀត ដែលសកម្មភាពស្វីតបែបនេះខកខានកើតឡើងជាយូរណាស់មក ហើយ​ដោយសារតែគូស្នេហ៍មួយគូរនេះ រវល់ការងាររៀងៗខ្លួន។

គ្រាន់តែឃើញដូច្នេះរួចមក ហ្វេនក៏សរសើរអំពីតារាទាំងពីរដួងដែល មិនចែកផ្លូវគ្នា ទោះបីជាមិនបាននៅក្បែរគ្នានិង រក្សាភាពជិតស្និទ្ធនឹងគ្នាដូចគូស្នេហ៍ផ្សេងទៀត ក៏ពិតមែនប៉ុន្តែ ភក្តីភាពគឺនៅតែមាន ដោយពួកគេទាំងពីរមិនបានបោះបង់គ្នាដូចពាក្យចចាមអារ៉ាមមួយចំនួន បានលើកឡើងនោះឡើយ។

គួររម្លឹកដែរថាប៉ុន្មានខែមុននេះ​ Shawn Mendesនិង Camila Cabello បានសម្រេចចិត្តបែកគ្នាមួយរយៈ ដើម្បីប្រមូលអារម្មណ៍ផ្តោតទៅលើការងារដែលខ្លួនត្រូវធ្វើរៀងៗខ្លួនផងដែរ៕

សូមចូលមើលរូបភាពខាងក្រោម៖