អង់គ្លេស៖ អ្នកចាត់ការក្រុមបិសាចក្រហម Manchester United លោក Ole Gunnar Solskjaer បានបញ្ជាក់ថា ខ្សែបម្រើ Paul Pogba នឹងបន្តនៅទឹកដី Old Trafford រយៈពេល២ឆ្នាំទៀត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Man UTD បានអនុវត្តន៍ជម្រើសបន្ថែម១ឆ្នាំទៀត ទៅលើកុងត្រារបស់ Pogba ដោយនឹងរក្សារូបគេ នៅក្រុមលោក Ole រហូតដល់ឆ្នាំ ២០២២។
កុងត្រាចាស់របស់ខ្សែបម្រើសញ្ជាតិបារាំង នឹងផុតកំណត់នៅរដូវក្ដៅឆ្នាំក្រោយ ដូច្នេះរូបគេអាចនឹងចាប់ផ្តើមចរចាជាមួយក្លឹបនៅក្រៅក្របខណ្ឌ Premier League បាន នៅខែមករាខាងមុខ ប្រសិនបើ Man UTD មិនអនុវត្តន៍ជម្រើសបន្ថែម១ឆ្នាំទៀតនេះ ឲ្យទាន់ពេលវេលា។
ទាក់ទងនឹងរឿង Pogba លោក Ole បានថ្លែងក្នុងសន្និសីទកាសែត កាលពីថ្ងៃសុក្រ ម្សិលមិញ យ៉ាងដូច្នេះថា៖
Paul គឺជាកីឡាកររបស់ពួកយើង គាត់នឹងបន្តនៅទីនេះរយៈពេល២ឆ្នាំទៀត។ ខ្ញុំជឿជាក់ថា គាត់កំពុងផ្ដោត ក្នុងការធ្វើឲ្យបានល្អបំផុតសម្រាប់ពួកយើង ហើយពួកយើងក៏ចង់ឃើញ ពីការលេចធ្លោរបស់ Paul ផងដែរ។ ខ្ញុំហ៊ានប្រាកដថា ក្នុងរយៈពេល ២-៣ ឆ្នាំទៀតយើងនឹងទទួលបានលទ្ធផលល្អបំផុតពីគាត់។
គួររម្លឹកដែរថា Pogba បានផ្លាស់ពីក្លិប Juventus ត្រឡប់មក Man UTD វិញ កាលពីឆ្នាំ២០១៦ ក្នុងតម្លៃផ្ទេរកប់ពពក ១០៥លានអឺរ៉ូ (ឬប្រមាណ ១២៣លានដុល្លារ)។ គិតមកទល់ពេលនេះ គេបង្ហាញខ្លួនឲ្យក្រុមបិសាចក្រហម បាន១៦៨ប្រកួត ស៊ុតបញ្ចូលទីបាន៣៣គ្រាប់៕
ប្រភព៖ espn
Bong I.T