Neymar រកបាន Hat-trick ជួយឲ្យប្រេសុីលយកឈ្នះប៉េរូ ២-៤ ក្នុងការប្រកួតជម្រុះ World Cup ព្រឹកមិញនេះ (មានវីដេអូ)

បរទេស៖ ក្រុមជម្រើសជាតិប្រេសុីលបន្តឈរកំពូលតារាងក្នុងការប្រកួតជម្រុះ World Cup 2022 នៅតំបន់អាមេរិកខាងត្បូងក្រោយយកឈ្នះ ប៉េរូ ដោយលទ្ធផល២ទល់នឹង៤ កាលពីព្រឹកមិញនេះ។ ក្នុងនោះដែរសម្រាប់ពីរប្រកួតដំបូង ប្រេសុីលរកបាន៦ពិន្ទុពេញ ដោយមានគ្រាប់បាល់ចំណេញដល់ទៅ៧គ្រាប់។ 

សម្រាប់គ្រាប់បាល់របស់ជម្រើសជាតិប្រេសុីលព្រឹកមិញនេះ រកបានដោយខ្សែប្រយុទ្ធរបស់ក្លិប Paris Saint-Germain គឺកីឡាករ Neymar ចំនួន៣គ្រាប់ម្នាក់ឯង (ប៉េណាល់ទី២គ្រាប់) និងមួយគ្រាប់ទៀតរកបានដោយកីឡាករ Richarlison របស់ក្លិប Everton ។ ចំណែកឯពីរគ្រាប់របស់ប៉េរូវិញ ធ្វើបានដោយកីឡាករ Andre Carrillo និង Renato Tapia ។ លើសពីនេះនៅចុងតង់ទី២ កីឡាកររបស់ជម្រើសជាតិប៉េរូទទួលបានកាតក្រហមចំនួនពីររូប ពោលគឺកីឡាករ Carlos Caceda និង Carlos Zambrano ។

គួរឲ្យដឹងដែរថាបីគ្រាប់របស់ Neymar ព្រឹកមិញនេះបានធ្វើឲ្យគេវ៉ាដាច់អតីតតារាឆ្នើម Ronaldo ចំនួនពីរគ្រាប់ ក្លាយជាកីឡាករដែលរកគ្រាប់បានច្រើនជាងគេលំដាប់ទី២ ក្នុងប្រវត្តិសាស្ត្រក្រុមជម្រើសជាតិប្រេសុីល ពោលគឺរកបាន៦៤គ្រាប់ តាមពីក្រោយលោកតា Pele ដែលរកបានសរុបចំនួន៧៧គ្រាប់៕

ប្រភព៖ goal