រាល់​សរីរាង្គ​ទាំង​អស់​សុទ្ធ​តែ​ចាំបាច់​នៅ​ក្នុង​កិច្ច​ដំណើរ​ការ​រាង​កាយ​មនុស្ស​យើង ខ្វះ​មួយ​ណា​ក៏​ពិបាក​ដែរ។ ក្នុង​នោះ បេះ​ដូង​ជា​ផ្នែក​សំខាន់​មួយ​ជួយ​បំពេញ​មុខ​ងាយ​របស់​រាង​កាយ តែ​វា​ក៏​អាច​កើត​ជំងឺ​កាច​សាហាវ​អាច​ផ្ដាច់​យក​ជីវិត​យើង​ពេល​ណា​ក៏​បាន​ដូច​គ្នា បើ​យើង​ថែ​មិន​បាន​ល្អ។

មនុស្ស​មួយ​ចំនួន​បាន​ជួប​បញ្ហា​ស្ទះ​សរសៃ​ឈាម​បេះ​ដូង ដែល​ជំងឺ​នេះ​ជា​ការ​ខូច ឬ​ស្លោក​សាច់​ដុំ​បេះ​ដូង​ស្រួច​ស្រាវ​។ ជំងឺ​ស្ទះ​សរសៃ​ឈាម​បេះ​ដូង ភាគ​ច្រើន​បណ្ដាល​មក​ពី​ការ​កក​ជាតិ​ខ្លាញ់​តាម​សរសៃ​ឈាម​បេះ​ដូង។ នេះ​បើ​តាម​ការ​ចុះ​ផ្សាយ​របស់​មន្ទីរពេទ្យ កាល់​ម៉ែត ។

ទោះ​បី​បញ្ហា​ស្ទះ​សរសៃ​ឈាម​បេះ​ដូង ជា​ជំងឺ​ដែល​មាន​គ្រោះ​ថ្នាក់​ធ្ងន់​ដល់​អាយុ​ជីវិត ត្រូវ​ការ​ព្យាបាល​ជា​បន្ទាន់​ក៏​ពិត​មែន ប៉ុន្តែ​គ្នា​យើង​អាច​បង្ការ​ខ្លួន ចៀស​ផុត​ពី​បញ្ហា​នេះ​ជាមួយ​តិចនិក​ខាងក្រោមនេះ៖

១. ហាត់​ប្រាណ​ឲ្យ​បាន​ទៀង​ទាត់ (៣០នាទី/ថ្ងៃ, ៥ថ្ងៃ/សប្ដាហ៍)
២. ឈប់​ជក់​បារី
៣. កាត់​បន្ថយ​សេព​គ្រឿង​ស្រវឹង​ឲ្យ​បាន​ច្រើន​បំផុត
៤. ចៀស​វាង​អាហារ​ប្រៃ​ខ្លាំង
៥. កាត់​បន្ថយ​អាហារ​ខ្លាញ់​ច្រើន និងសាច់
៦. កាត់​បន្ថយ​អារម្មណ៍​តានតឹង ឬ​ស្ត្រេស
៧. គ្រប់​គ្រង​សម្ពាធ​ឈាម​ឲ្យ​បាន​ល្អ (បើ​យើង​លើស​ឈាម)
៨. រក្សា​ទម្ងន់​ឲ្យ​បាន​ល្អ (កុំ​ឲ្យ​លើស​ទម្ងន់)
៩. គ្រប់​គ្រង​ជាតិ​ស្ករ​បាន​ត្រឹម​ត្រូវ​តាម​ការ​ណែនាំ​គ្រូពេទ្យ (បើ​យើង​លើស​ជាតិ​ស្ករ)
១០. ពិគ្រោះ ឬ​ពិនិត្យ​សុខភាព​ឲ្យ​បាន​ទៀង​ទាត់។ល។

បើ​យើង​ជា​មនុស្ស​មាន​សុខភាព​ល្អ​ធម្មតា មិន​ងាយ​នឹង​កើត​បញ្ហា​ស្ទះ​សរសៃ​ឈាម​បេះ​ដូង​នេះ​ទេ។ ផ្ទុយ​ទៅ​វិញ បើ​គ្នា​យើង​ជា​មនុស្ស​ដូច​ក្នុង​ការ​រៀប​រាប់​ខាង​ក្រោម ច្បាស់​ណាស់​នឹង​ងាយ​រង​គ្រោះ​ដោយ​សារ​បញ្ហា​នេះ​៖
– លើស​ទម្ងន់
– វ័យ​ចំណាស់
– លើស​សម្ពាធ​ឈាម
– លើស​ជាតិ​ខ្លាញ់
– ជក់បារី និង​ផឹក​ស្រា​ច្រើន
– គ្រួសារ​មាន​ជំងឺ​ស្ទះ​សរសៃ​ឈាម​បេះ​ដូង។ល។

មិន​តែ​ប៉ុណ្ណោះ ដូច​នឹង​ជំងឺ​សាហាវ​ដទៃ​ទៀត​ដែរ ជំងឺ​ស្ទះ​សរសៃ​ឈាម​បេះ​ដូង ក៏​មាន​ផល​វិបាក​យាយី​អ្នក​ជំងឺ​ដែរ​ដូច ខ្សោយ​បេះ​ដូង ចុះ​សម្ពាធ​ធ្ងន់ធ្ងរ មាន​វិបត្តិ​ចង្វាក់​បេះ​ដូង​ធ្ងន់ធ្ងរ គាំង​បេះ​ដូង ឬ​អាច​បណ្ដាល​ឲ្យ​អ្នក​ជំងឺ​ស្លាប់​តែ​ម្ដង។

ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕ 

អត្ថបទផ្ដល់សិទ្ធិដោយ Hello Krupet

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សម្រស់ & សុខភាព និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ