យល់ដឹង៖ អ្នកនឹងមិនអាចយល់ អារម្មណ៍នេះទេ រហូតទាល់តែរឿងនេះ បានកើតឡើងទៅលើ សត្វចិញ្ចឹមរបស់អ្នកផ្ទាល់ ព្រោះថានៅពេលដែល អ្នកទទួលឬទិញសត្វយកមកចិញ្ចឹម គឺប្រៀបដូចជា អ្នកបានបើកចិត្ត ផ្តល់ក្តីស្រលាញ់ ហើយក៏ទុកសត្វទាំងនោះជា សមាជិកម្នាក់ទៀត នៅក្នុងគ្រួសារ របស់អ្នកទៅហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
សត្វចិញ្ចឹមគឺ ពិតជាអាចធ្វើឲ្យយើង មានអារម្មណ៍ថាអស្ចារ្យ ជាពិសេសនៅពេលដែលត្រឡប់មកពី បំពេញការងារហត់នឿយ ពេញមួយថ្ងៃ សត្វចិញ្ចឹមអ្នកតែរង់ចាំអ្នក ហើយរត់មកប្រលែងលេងជាមួយអ្នក រំពេចនោះទុក្ខកង្វល់ទាំងឡាយ ក៏ត្រូវបានរសាយ បាត់ទៅអស់ដែរ។ ពួកគេតែងតែ នៅរងចាំម្ចាស់ ដើម្បីឲ្យ អ្នកដាក់ចំណីឲ្យ។ ពួកគេអាចធ្វើ ឲ្យអ្នកសើច បើទោះបីជា ក្នុងពេលអ្នកមិនសប្បាយចិត្តក៏ដោយ ។
សត្វចិញ្ចឹមតែងតែជា មិត្តដ៏ល្អបំផុត សម្រាប់ម្ចាស់គ្រប់រូប ជាមិត្តដែលមិនធ្លាប់ ឈប់ស្រលាញ់អ្នកនោះទេ ជាមិត្តដ៏សោះត្រង់បំផុត ធ្វើឲ្យម្ចាស់មានអារម្មណ៍ ធូរស្រាល ហើយក៏ជាមិត្តដែល ស័គ្រ្មកំដរស្តាប់នៅរាល់បញ្ហារបស់ អ្នកគ្រប់ពេល ប្រសិនបើអ្នកត្រូវការ។ ពួកគេក៏ជាមិត្តរបស់ អ្នកគ្រប់គ្នា នៅក្នុងគ្រួសាររបស់អ្នក មិនថាក្មេងឬ ក៏ចាស់នោះទេ។ ហើយពួកគេក៏តែងតែ ត្រៀមខ្លួនជាស្រេច ដើម្បីផ្តល់ជូន អ្នកនូវក្តីស្រលាញ់ដោយ គ្មានលក្ខខ័ណ្ឌទៅកាន់អ្នក ហើយពួកគេក៏មិនចេះ ទាមទារផលតបស្នងអ្វីពី អ្នកនោះដែរ។
សត្វចិញ្ចឹមអ្នកតែងតែជា កម្លាំងចិត្តដល់អ្នក នៅពេលដែល អ្នកមានអារម្មណ៍លំបាកបំផុត ឬក៏ឯកា ពួកគេនឹងតែងតែនៅទីនោះ ជាមួយអ្នកធ្វើឲ្យ អ្នកមានអារម្មណ៍កក់ក្តៅ។ ពួកគេអាចមានញ្ញាណយល់ពី អារម្មណ៍របស់អ្នក ថាអ្នកកំពុងតែពិបាកចិត្តហើយ ពួកគេនឹងព្យាយាមធ្វើឲ្យ អ្នកមានអារម្មណ៍ល្អឡើងវិញ តាមរយៈថាមពលវិជ្ជាមាន និងគំនិតសុទិដិ្ឋនិយម ដែលមាននៅក្នុងខ្លួន របស់ពួកគេ។
ទាំងនេះហើយ ជាមូលហេតុដែល ធ្វើឲ្យម្ចាស់ស្ទើរតែទាំងអស់ ពិបាកបំផុតសម្រាប់ ក្នុងការនិយាយលាដល់ សត្វចិញ្ចឹមជាទីស្រឡាញ់ របស់ខ្លួន។ រាល់ពេលដែល អ្នកបាត់បង់សត្វចិញ្ចឹម វាតែងតែជា បទពិសោធន៍ដ៏ឈឺចាប់បំផុត ប្រៀបដូចជាការបាត់បង់ សមាជិកគ្រួសារម្នាក់ដែរ។ ព្រោះរាល់ពេល សប្បាយ កើតទុក្ខ ឯកា អ្នកតែងមានសត្វចិញ្ចឹម នៅក្បែរ និងផ្តល់នៅអារម្មណ៍ លួងលោម ទៅកាន់អ្នកជានិច្ច។
ជារួមការបាត់បង់ទាំងនោះ ពេលខ្លះវាអាច បង្កើតឱ្យមាន ការប៉ះទង្គិចផ្លូវចិត្តយ៉ាងធ្ងន់ធ្ងរមួយ ចំពោះម្ចាស់ម្នាក់ៗរហូតដល់ ពួកគេមិនចង់មាន សត្វចិញ្ចឹមម្តងទៀត។ ការឈឺចាប់នោះ គឺប្រៀបដូចជា ការនិយាយលា ចំពោះមិត្តល្អបំផុត របស់អ្នកជារៀងរហូត ព្រោះកន្លងមក អ្នកតែងគិតនិងសង្ឃឹមថា ពួកគេអាចនៅទីនេះ ជាមួយអ្នកជារៀងរហូត៕
Bong I.T