ខ្សែបម្រើម្នាក់របស់ហង្សក្រហម Liverpool បានចូលរួមជាមួយ Porto ក្នុងលក្ខខណ្ឌខ្ចីជើង

គេហទំព័រផ្លូវការរបស់ក្លិបហង្សក្រហម Liverpool បានបញ្ជាក់ថាខ្សែបម្រើ Marko Grujic បានចូលរួមជាមួយ Porto ក្នុងលក្ខខណ្ឌខ្ចីជើង។

ទីផ្សារដោះដូរកីឡាករនៅព័រទុយហ្កាល់នៅតែបើកទ្វារនៅឡើយ ដែលធ្វើឱ្យកិច្ចព្រមព្រៀងនេះអាចធ្វើទៅបាន។ ការផ្ទេរក្នុងលក្ខខណ្ឌខ្ចីជើងត្រូវបានគេដឹងថា នឹងគ្រាន់តែជាកិច្ចព្រមព្រៀងខ្ចីជើងរយៈពេលវែងតែប៉ុណ្ណោះ ដោយគ្មានជម្រើសក្នុងការទិញផ្តាច់នោះឡើយ។

បើក្រឡេកមើលចាប់តាំងពីទីផ្សារដោះដូរកីឡាករត្រូវបានបើកទ្វារមក នេះគឺជាការផ្លាស់ប្តូរមួយដែលនឹកស្មានមិនដល់សម្រាប់ Liverpool ដោយគេអះអាងថា ក្លិបនឹងមិនដាក់ឱ្យ Grujic ត្រូវក្លិបផ្សេងខ្ចីជើងនោះទេ។

ខណៈដែលកីឡាករអន្តរជាតិសញ្ជាតិស៊ែប៊ីរូបនេះលែងចង់ស្នាក់នៅក្រុម Liverpool បន្តទៀតហើយនោះ ទើបក្រោយពីការជជែកគ្នាក្នុងលទ្ធផលបរាជ័យជាមួយក្លិបអាល្លឺម៉ង់ Werder Bremen ខ្សែបម្រើ Grujic ក៏បានព្រមព្រៀងកាលពីថ្ងៃចន្ទក្នុងការផ្ទេរទៅកាន់ក្លិប Porto របស់ព័រទុយហ្កាល់នៅថ្ងៃអង្គារនេះ។

កិច្ចព្រមព្រៀងរបស់ Marko Grujic ជាមួយ Liverpool នឹងផុតកំណត់នៅរដូវក្តៅឆ្នាំ ២០២៣។ កីឡាករសញ្ជាតិស៊ែប៊ីវ័យ ២៤ ឆ្នាំរូបនេះគឺជាកីឡាករដំបូងរបស់ Liverpool ដែលលោក Jurgen Klopp បានចុះហត្ថលេខា ប៉ុន្តែគាត់មិនបានជាប់ជាកីឡាករជម្រើសដំបូងទៀងទាត់នៅ Anfield នោះទេ៕

ប្រភព៖ Tribuna