មិនញញើត! ពលរដ្ឋចិនរាប់ពាន់នាក់ ប្រជ្រៀតគ្នាដើរលេងថ្ងៃបុណ្យជាតិ ទាំងដែលអ្នកខ្លះមិនពាក់ម៉ាស់ការពារពីជំងឺកូវីដ-១៩ (មានវីដេអូ)

ចិន៖ ប្រជាពលរដ្ឋចិនរាប់ពាន់នាក់ សម្រុក និងប្រជ្រៀតគ្នាដើរលេងកម្សាន្តជាលើកដំបូងសម្រាប់ថ្ងៃបុណ្យជាតិរយៈពេល៨ថ្ងៃ ដែលគិតចាប់ពីថ្ងៃទី០១ ខែតុលាមក ក្រោយពីប្រទេសផ្ទុះឡើងខ្លាំងនៃជំងឺកូវីដ-១៩។

កាលពីថ្ងៃអាទិត្យទី០៤ ចុងសប្ដាហ៍មុននេះ មានវីដេអូមួយបង្ហាញឲ្យឃើញពីពលរដ្ឋចិនជាច្រើន បានធ្វើដំណើរកម្សាន្តនៅលើភ្នំ Huangshan ដែលជាតំបន់ទេសចរណ៍ដ៏ពេញនិយមមួយក្នុងខេត្ត Anhui ដោយប្រជ្រៀតស្មារទល់ស្មារគ្នា និងមានអ្នកខ្លះមិនពាក់ម៉ាស់ការពារពីការឆ្លងជំងឺកូវីដ-១៩ផងដែរ។

ទន្ទឺមនឹងនេះដែរ នៅពេលដែលតម្រូវការធ្វើដំណើរមានការកើនឡើងខ្ពស់ បន្ទាប់ពីប្រទេសជួបវិបត្តិជំងឺកូវីដ-១៩មក ខាងមន្ត្រីចិនបានហៅការដើរលេងកម្សាន្តនេះថា «ការធ្វើដំណើរសងសឹក» និងផ្ដល់ជូនការចូលទស្សនាដោយសេរីនៅតាមតំបន់ទេសចរណ៍មួយចំនួន ក្នុងគោលបំណងស្ដារសេដ្ឋកិច្ចឡើងវិញ។ ហើយតំបន់ទេសចរណ៍ដ៏ល្បីបំផុតនៅប្រទេសចិនរួមមានមហាកំផែង និងសៀងហៃ Disneyland ក៏ត្រូវបានបើកឲ្យចូលកម្សាន្តវិញដែរ ដែលមានអ្នកចូលលេងកម្សាន្តយ៉ាងច្រើនកុះករ។

យ៉ាងណាមិញ បើគិតត្រឹមព្រឹកថ្ងៃពុធទី០៧ ខែតុលានេះ ប្រទេសចិនមានករណីឆ្លងជំងឺកូវីដ-១៩សរុបចំនួន៨៥,៤៨៩ ដោយក្នុងនោះមានករណីស្លាប់ចំនួន៤,៦៣៤ និងករណីជាសះស្បើយវិញចំនួន៨០,៦៥០៕

សូមទស្សនារូបភាពនិងវីដេអូខាងក្រោម៖