កម្មករក្រុមហ៊ុន ស៊ិនទ្រី បានធ្វើកូដកម្ម ឈប់ប្រមូលសំរាមក្នុងរាជធានីភ្នំពេញ ដើម្បីទាមទារឲ្យក្រុមហ៊ុនបំពេញតាមលក្ខខណ្ឌរបស់ខ្លួនដែលបានតវ៉ា។ បន្ទាប់ពីកម្មករឈប់ប្រមូលសំរាម ស្ថាប័នពាក់ព័ន្ធបានបញ្ចេញកម្លាំងមន្រ្តី និងប្រជាការពារតាមមូលដ្ឋាន ឲ្យដើរប្រមូលសំរាមជាបណ្ដោះអាសន្ន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងស្ថានភាពនេះ សកម្មភាពប្រមូលសំរាមមិនទាន់ជាមួយនឹងការបញ្ចេញសំរាមរបស់ពលរដ្ឋរស់នៅក្នុងរាជធានីភ្នំពេញនោះទេ ដូច្នេះធ្វើឲ្យសំរាមនៅបន្ដមានច្រើនតាមដងផ្លូវមួយចំនួន។
ប្រាប់សារព័ត៌មានក្នុងស្រុក លោក ម៉េត មាសភក្ដី អ្នកនាំពាក្យសាលារាជធានីភ្នំពេញ នៅថ្ងៃទី០៦ តុលានេះ បានអះអាងថា រដ្ឋបាលរាជធានីភ្នំពេញ បានព្យាយាមសម្របសម្រួល ពន្យល់ណែនាំគ្រប់ទិដ្ឋភាព រួមទាំងទិដ្ឋភាពច្បាប់ការងារ ដល់បងប្អូនកម្មករប្រមូលសម្រាមដែលកំពុងទាមទារលក្ខខណ្ឌមិនសមស្របមួយចំនួន។
លោក មាសភក្ដី អំពាវនាវថា៖ «សូមអំពាវនាវដល់បងប្អូនកម្មករប្រមូលសំរាមដែលកំពុងធ្វើកូដកម្ម សូមភ្ញាក់រលឹក និងបញ្ឈប់សកម្មភាព ទាមទារខុសច្បាប់ការងារ។ ជឿជាក់ថា បងប្អូននឹងវិលត្រឡប់មកធ្វើការបំពេញតួនាទីរៀងៗខ្លួនឡើងវិញ ដើម្បីទីក្រុងយើងទាំងអស់គ្នាស្អាត» ហើយសូមបញ្ឈប់ការយកសំរាម ជាចំណាប់ខ្មាំងទៀតទៅ»។
អ្នកនាំពាក្យសាលារាជធានីភ្នំពេញ បានលើកឡើងទៀតថា ទោះឈរលើស្មារតីយោគយល់ចំពោះអាកប្បកិរិយារឹងរូសទាំងនេះក៏ដោយ ក៏ស្ថានភាពមិនអំណោយផលដល់ការបន្តរង់ចាំ ហើយជម្រើសនៃការប្រើកម្លាំងពលកម្មថ្មី ត្រូវតែបង្ខំចិត្តអនុវត្ត ដើម្បីកែប្រែស្ថានការណ៍ នៃការសំអាតទីក្រុងឡើងវិញ។ ហេតុដូច្នេះបានជា សាលារាជធានីភ្នំពេញ ប្រកាសជ្រើសរើសកម្មករដើម្បីប្រមូលសំរាមក្នុងរយៈកាលនេះ។
គួរបញ្ជាក់ថា តាំងពីល្ងាចថ្ងៃទី ០២ តុលា រហូតមកដល់ពេលនេះ កម្មករប្រមូលសំរាមរបស់ក្រុមហ៊ុនស៊ិនទ្រី បានធ្វើកូដកម្ម ដោយមិនចេញប្រមូលសំរាម ដែលធ្វើឲ្យមានសំរាមកកស្ទះនៅតាមដងផ្លូវនានាក្នុងរាជធានីភ្នំពេញ។ ការធ្វើកូដកម្មនេះ កម្មករបានទាមទារឲ្យក្រុមហ៊ុន ស៊ិនទ្រី ដោះស្រាយនូវ៖ «ប្រាក់បំណាច់អតីតភាពកាងារ ប្រាក់សំណងជំងឺចិត្ត ប្រាក់ជួសការជូនដំណឹងមុន ប្រាក់ខែចុងក្រោយ ការឈប់សម្រាកប្រចាំឆ្នាំដែលនៅសេសសល់»។ យ៉ាងណា មន្ត្រីសាលារាជធានីភ្នំពេលើកឡើងថា កម្មករប្រមូលសម្រាមទាំងនោះកំពុងទាមទារនូវលក្ខខណ្ឌមិនសមស្របមួយចំនួន៕