អាមេរិក៖ ក្រុមវេជ្ជបណ្ឌិតដែលព្យាបាលលោក ដូណាល់ ត្រាំ បាននិយាយថាប្រធានាធិបតីសហរដ្ឋអាមេរិករូបនេះ អាចនឹងចាកចេញពីមន្ទីរពេទ្យភ្លាមៗនៅថ្ងៃចន្ទ (ពេលវេលានៅសហរដ្ឋអាមេរិក) ប្រសិនបើស្ថានភាពរបស់លោកនៅតែប្រសើរ។ នេះបើតាមការចេញផ្សាយរបស់សារព័ត៌មានជប៉ុន NHK។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សពួកគេបាននិយាយកាលពីព្រឹកថ្ងៃអាទិត្យថា លោក ត្រាំ លែងត្អូញត្អែរពីការដកដង្ហើមខ្លីៗ ហើយថែមទាំងអាចដើរបានជាធម្មតាផងដែរ។ មួយវិញទៀត កម្រិតអុកស៊ីសែនក្នុងឈាមរបស់គាត់ បានវិលមកសភាពធម្មតាវិញហើយ។ ជាមួយគ្នានោះ ពួកគេមានសង្ឃឹមថា អាចមានគម្រោងអនុញ្ញាតឲ្យលោកប្រធានធិបតីត្រលប់ទៅសេតវិមានវិញ នៅព្រឹកថ្ងៃចន្ទ ប្រសិនបើស្ថានភាពរបស់លោកនៅតែល្អប្រសើរដូចជាថ្ងៃអាទិត្យ។
គួររម្លឹកថា ប្រធានាធិបតីវ័យ៧៤ឆ្នាំរូបនេះ ចាប់ផ្ដើមទទួលការព្យាបាលនៅមជ្ឈមណ្ឌលវេជ្ជសាស្ត្រយោធាជាតិ Walter Reed ចាប់តាំងពីថ្ងៃសុក្រ។ ពេលនោះ លោក ត្រាំ មានអាការគ្រុនក្ដៅខ្លាំង ហើយលោកត្រូវបានបំពាក់ម៉ាស៊ីនអុកស៊ីសែនជំនួយ បន្ទាប់ពីកម្រិតអុកស៊ីសែនរបស់លោកធ្លាក់ចុះ។ ហើយថ្ងៃសៅរ៍ ក្រុមវេជ្ជបណ្ឌិតបានប្រើថ្នាំ Dexamethasone គឺជាថ្នាំស្តេរ៉ូអុីត ដែលត្រូវបានគេប្រើសម្រាប់ជំងឺរលាកសួត បន្ថែមពីលើថ្នាំប្រឆាំងវីរុស។
តែទោះជាយ៉ាង ក្រុមវេជ្ជបណ្ឌិតបានបដិសេធមិននិយាយលម្អិតអំពីស្ថានភាពសួតរបស់លោកត្រាំនោះទេ ស្របពេលប្រព័ន្ធផ្សព្វផ្សារអាមេរិកមួយចំនួនកំពុងរាយការណ៍ថា ថ្នាំស្ដេរ៉ូអុីតត្រូវបានគេប្រើប្រាស់សម្រាប់អ្នកជំងឺដែលមានករណីធ្ងន់ធ្ងរ៕