ក្រោយយកបាន Dias លោក Pep នៅមានគម្រោងតាមទិញ ខ្សែការពារលំដាប់ A ២នាក់នេះទៀត

អង់គ្លេស៖ យោងតាមសេចក្ដីរាយការណ៍បានឲ្យដឹងថា អ្នកចាត់ការទូទៅក្រុមមេឃខៀវ Manchester City លោក Pep Guardiola កំពុងសម្លឹងរកមើលខ្សែការពារស្លាបឆ្វេងម្នាក់ទៀតមកពង្រឹងក្រុម។

Man City កំពុងរុះរើជើងផ្នែកជើងក្រោម ក្រោយភ្លាត់ចាញ់ក្រុម Leicester City យ៉ាងទក់សាច់នៅក្របខណ្ឌ​ Premier League កាលពីថ្ងៃអាទិត្យកន្លងទៅ ដោយលទ្ធផល ៥ទល់នឹង២។ ជាកស្ដែងក្លិបដែលកាន់កាប់ដោយមហាសេដ្ឋីជនជាតិអារ៉ាប់មួយនេះ ទើបចំណាយលុយ៦៤លានផោន (ឬប្រមាណ ៨២លានដុល្លារ) ផ្ទេរយកខ្សែការពារកណ្ដាល​ Ruben Dias ពីក្លិប Benfica អមជាមួយកិច្ចសន្យារយៈពេល៦ឆ្នាំ ។

ទន្ទឹមនឹងការមកដល់របស់ Dias ក្លិប Man City កីបានបញ្ចេញខ្សែការពារវ័យ៣២ឆ្នាំ កីឡាករ Nicolas Otamendi ទៅកាន់ក្លិប Benfica ផងដែរ ក្នុងតម្លៃធូរថ្លៃត្រឹម១៧លានដុល្លារ។

តាមពិតទៅ Dias ជាខ្សែការពារចំណូលថ្មីទី២ហើយ ក្នុងក្រុមលោក Pep តួយ៉ាងកាលពីដើមទីផ្សាដោះដូររដូវក្ដៅនេះ Man City យកបានកីឡាករ Nathan Ake ពីក្លិប Bournemouth ។ យ៉ាងណាមិញ ខ្សែការពារថ្មី២នាក់នេះ មិនទាន់គ្រប់គ្រាន់សម្រាប់គ្រូបង្វឹកសញ្ជាតិអេស្ប៉ាញនៅឡើយទេ។

ជាក់ស្ដែងបើយោងតាមរបាយការណ៍របស់កាសែត Daily Mail លោក Pep ហាក់អស់ជំនឿទុក្ខចិត្តទៅលើខ្សែការពារស្លាបឆ្វេង Banjamin Mendy ហើយ ក្នុងនោះដែរគ្រូបង្វឹកវ័យ៤៩ឆ្នាំ សម្លឹងឃើញកីឡាករ២រូបដែលអាចមក ដោះស្រាយបញ្ហាតំបន់ស្លាបឆ្វេងនេះ ពោលគឺកីឡាករ David Alaba របស់ Bayern Munich ឬ Nicolas Tagliafico របស់​ Ajax។

គូរឲ្យដឹងដែថា Alaba នៅសល់កុងត្រាជាមួយ Bayern តែ១ឆ្នាំទៀតប៉ុណ្ណោះ ខណៈរូបគេក៏ធ្លាប់រួមការងារជាមួយលោក Pep ដែរ ពោលកាលគ្រូបង្វឹករូបនេះ នៅដឹកនាំក្លិប Bayern ចន្លោះពីឆ្នាំ២០១៣ ដល់ ២០១៦។

ដោយឡែកសម្រាប់កីឡាករ Tagliafico វិញ នៅសល់កុងត្រាជាមួយ Ajax ២ឆ្នាំទៀត ខណៈក្លិបយក្សហូឡង់ទាមទារតម្លៃខ្លួនខ្សែការពារស្លាបឆ្វេងសញ្ជាតិអាហ្សង់ទីនរូបនេះ ក្នុងទំហំទឹកប្រាក់ ២៣លានផោន (ឬប្រមាណ២៩លានដុល្លារ)៕

ប្រភព៖ thesun