Wolves កំពុងមានប្រៀបជាង Man UTD ក្នុងការទិញយកតារាឆ្នើមរូបនេះពី Juventus

បរទេស៖​ ក្លិប Wolverhampton កំពុងតែព្យាយាមតាមទិញខ្សែបម្រើប្រយុទ្ធមានបទពិសោធន៍ម្នាក់មកជំនួសតំណែងតារាវ័យ២៣ឆ្នាំ Diogo Jota ដែលទើបតែលក់ឲ្យទៅក្លិបហង្សក្រហម Liverpool ថ្មីៗនេះ។ ក្នុងនោះកីឡាករ Douglas Costa របស់ក្លិប Juventus គឺជាគោលដៅដ៏ធំមួយដែល Wolves កំពុងតាមចរចាទិញយកមករួមក្រុម។

ដោយសារតែមានរបួសញឹកញាប់ពេកទើបធ្វើឲ្យ Juventus សម្រេចចិត្តដាក់លក់ Costa ចេញនៅរដូវក្ដៅនេះ។ ហើយបើតាមរបាយការណ៍បានបញ្ជាក់ថា ក្លិបដែលដឹកនាំដោយលោក Andrea Pirlo បានទាមទារតម្លៃខ្លួនកីឡាករ​រូបនេះដល់ទៅ ៣២លានផោនឯណោះ (ឬប្រមាណ៤១លានដុល្លារ)។ 

ក្រៅពី Wolves នៅមានក្លិប Manchester United មួយទៀតដែលកំពុងចង់បាន Costa ទៅរួមក្រុមដែរនោះ។ ជាមួយគ្នានេះដែរលោក Solskjaer ចាត់ទុកកីឡាករវ័យ៣០ឆ្នាំរូបនេះជាគោលដៅទី២ ប្រសិនបើ Man Utd មិនអាចទិញ Jadon Sancho បានពីក្លិប Borussia Dortmund ទេនោះ។ យ៉ាងណាមិញនៅពេលនេះ Wolves ហាក់ដូចជាមានប្រៀបជាង Man Utd ក្នុងការទិញយក Costa មករួមក្រុមដោយសារតែទើបនឹងបានលុយធំពីការលក់ Jota ឲ្យក្លិប Liverpool ក្នុងតម្លៃខ្លួន៤៥លានផោននោះ (ឬ៥៨លានដុល្លារ)៕ 

ប្រភព៖ sportsmole