វីឡាអណ្ដែតទឹកនៅសុីដនី ឆាបឆេះខ្ទេច ដែលបណ្ដាលឲ្យភ្ញៀវពីរនាក់លោតចូលទៅក្នុងទឹក (មានវីដេអូ)

អូស្ត្រាលី៖ វីឡាអណ្ដែតទឹកដ៏ប្រណិតមួយខ្នង នៅសណ្ឋាគារ Lilypad Palm Beach ត្រូវបានអគ្គិភ័យលេបត្របាក់កាលពីថ្ងៃអាទិត្យទី២០ ខែកញ្ញាចុងសប្ដាហ៍មុននេះ នាវេលាម៉ោង២:២០នាទីរសៀល។

យោងតាមសម្ដីរបស់អ្នកនាំពាក្យបានឲ្យដឹងថា មានភ្ញៀវចំនួនពីរនាក់បានលោតចូលទៅក្នុងទឹក ដើម្បីគេចខ្លួន នៅពេលដែលអគ្គិភ័យចាប់ផ្ដើមឆាបឆេះ ហើយពួកគេក៏មិនបានរងរបួសអ្វីឡើយ។ ចំពោះមូលហេតុវិញ មិនច្បាស់នៅឡើយទេ តែគេជឿជាក់ថា វាកើតឡើងដោយចៃដន្យប៉ុណ្ណោះ។

យ៉ាងណាមិញ នៅទីបំផុតក្រុមអ្នកពន្លត់អគ្គិភ័យក៏អាចពន្លត់បានដោយជោគជ័យ តែវីឡានោះត្រូវបានខូចខាតយ៉ាងខ្លាំងបាត់ទៅហើយ។ ជុំវិញហេតុការណ៍នេះដែរ ខាងប៉ូលិសនឹងធ្វើការស៊ើបអង្កេតបន្ដផងដែរ។

គួរឲ្យដឹងដែរថា សណ្ឋាគារ Lilypad Palm គឺជាសណ្ឋាគារអណ្ដែតទឹកដ៏ប្រណិតបំផុតក្នុងទីក្រុងសុីដនី ដែលអាចចូលទៅស្នាក់នៅបែបលក្ខណៈ​ឯកជន ដោយធ្វើដំណើរតាម​រយៈ​ទូក ឬកូនយន្ដហោះសមុទ្រ ហើយតម្លៃវិញមានចាប់ពី១,៤៥០ដុល្លារអាមេរិកឡើងទៅក្នុងមួយយប់៕

សូមទស្សនារូបភាពនិងវីដេអូខាងក្រោម៖